Faufa’a ’āi’a nō te fa’aitoitora’a

E a’u mau taea’e ’e e a’u mau tuahine here, tē māuruuru nei au i te putuputura’a mai ia ’outou i roto i teie ’āmuira’a rahi a Te ’Ēkālesia a Iesu Mesia i te Feiā Mo’a i te Mau Mahana Hope’a Nei. ’Ua ’ite mātou i tō ’outou fa’aro’o ’e tō ’outou here i te mau vāhi ato’a tei reira ’outou. ’Ua ha’amaita’ihia tātou nā roto i te mau ha’api’ira’a fa’auruhia, te mau ’itera’a pāpū pūai ’e te mau hīmene nehenehe.

Tē fa’aitoito atu nei au ia ’outou ’ia tāmau noa i te tūtava ’ia ineine nō te ho’i i mua i te Metua i te ao ra ’e ia Iesu Mesia. Noa atu te vāhi i ni’a i te ’ē’a nō te fafaura’a tei reira ’outou, e fārerei ’outou i te hō’ē ’arora’a i te mau tāmatara’a pae tino o te tāhuti nei ’e i te pāto’ira’a a Sātane.

Mai tā tō’u metua vahine i parau mai iā’u, ’ia amuamu ana’e au nō te fifi o te hō’ē mea, « e Hal, e mea fifi iho ā. Mai te reira iho ā. E tāmatara’a te orara’a nei ».

E nehenehe tāna e parau i te reira ma te marū ’e ma te ’ata’ata ato’a, nō te mea ’ua ’ite ’oia e piti ’ohipa. Noa atu te ’arora’a, te ’ohipa faufa’a mau, ’o te taera’a ïa i te fare i pīha’i iho i tōna Metua i te ao ra. ’E ’ua ’ite ’oia e nehenehe tāna e rave i te reira nā roto i te fa’aro’o i tōna Fa’aora.

’Ua ’ite ’oia ē, tei pīha’i iho ’oia iāna. I te mau mahana ’a ’ite ai ’oia ē, tē fātata ra ’oia i te pohe, ’ua paraparau mai ’oia iā’u nō ni’a i te Fa’aora ’a tārava noa ai ’oia i roto i tōna piha. Tē vai ra hō’ē ’ōpani nō te haere i te tahi atu piha i pīha’i iho i tōna ro’i. ’Ua ’ata’ata ’oia ’e ’ua hi’o i te ’ōpani, ’a parau ai ’oia ma te marū nō ni’a i te taime e fātata maira e ’ite ai ’oia iāna. Tē ha’amana’o noa nei ā vau i tō’u hi’ora’a atu i te ’ōpani ’e i te ferurira’a i te piha i muri mai i te ’ōpani.

Tei roto ’oia i te ao vārua i teienei. ’Ua vai noa tōna mata i ni’a i te rē tāna i hina’aro, noa atu te mau matahiti tāmatara’a o te tino nei ’e tōna iho.

Te faufa’a ’āi’a nō te fa’aitoitora’a tāna i vaiiho mai nā mātou, ’ua fa’ata’a-maita’i-hia ïa i roto i te Moroni 7, ’a fa’aitoito ai Moromona i tāna tamaiti ia Moroni ’e i tōna nuna’a. E faufa’a ’āi’a nō te fa’aitoitora’a i te hō’ē hua’ai mai tā tō’u metua vahine i vaiiho mai i tōna ’utuāfare. ’Ua fa’atae mai Moromona i te reira faufa’a ’āi’a nō te fa’aitoitora’a i te mau ta’ata ato’a e hina’aro pāpū ’ia ineine rātou, nā roto i tō rātou mau tāmatara’a tāhuti nei ato’a, nō te ora mure ’ore.

Tē ha’amata nei Moromona i roto i te mau ’īrava mātāmua o te Moroni 7 ma te hō’ē ’itera’a pāpū nō ni’a ia Iesu Mesia, te mau melahi ’e te Vārua o te Mesia, ’o tē tauturu ia tātou ’ia ’ite i te maita’i ’e te ’ino ’e i reira e ti’a ai e mā’iti i te maita’i.

’Ua tu’u ’oia ia Iesu Mesia nā mua, e mea nā reira tā te mau ta’ata ato’a e manuia nei i te fa’aitoitora’a i te feiā, e ’aro nei nō te ta’uma atu i ni’a i te ’ē’a o tō rātou nohora’a i te ra’i ra.

« E mai te au i te mau parau a te Mesia ra, e ’ore roa te ta’ata e ora, maori rā ’o tē fa’aro’o i tōna ra i’oa ; nō reira, i fa’a’orehia taua mau mea nei, ’ua fa’a’ore-ato’a-hia te fa’aro’o, ’e ’ua riro tō te ta’ata huru ’ei mea ahoaho ; tē vai noa ra ho’i rātou mai te mea ra ē, ’aita e rāve’a i fa’atupuhia e ora ai te ta’ata ra.

« Inaha rā, e a’u mau taea’e here, tē mana’o nei au i te mea huru maita’i a’e ia ’outou, tē manaʼo nei hoʼi au ē, e faʼaroʼo tō ʼoutou i te Mesia nō tō ʼoutou ha’ehaʼa ; ’āhiri hoʼi ʼaita o ʼoutou e faʼaroʼo iāna, ʼaita atoʼa ʼoutou e au ʼia tai’ohia i rotopū i te feiā o tāna ʼēkālesia i reira ».¹

’Ua fa’ariro Moromona i te ha’eha’a ’ei tāpa’o nō te pūai o tō rātou fa’aro’o. ’Ua ’ite ’oia ē, tei ni’a tō rātou turu’ira’a i te Fa’aora. ’Ua fa’aitoito ’oia ia rātou nā roto i te tāpa’ora’a i te reira fa’aro’o. ’Ua tāmau noa Moromona i te hōro’a i te fa’aitoitora’a ia rātou nā roto i te tauturura’a ia rātou ’ia ’ite ē, e patu tō rātou fa’aro’o ’e tō rātou ha’eha’a i tō rātou vai-pāpū-ra’a ’e tō rātou ti’aturira’a nō te manuia o tā rātou ’arora’a :

« ’E teie nei, e a’u mau taea’e here, e parau atu vau ia ’outou i te tīa’i ra E nāhea ʼoutou i te roaʼaraʼa te faʼaroʼo, maori rā o te tīaʼi atoʼa tō ʼoutou ?

« ’E e aha tā ʼoutou e tīa’i ra ? Inaha, tē parau atu nei au ia ’outou, e tīa’i outou ’ia faʼati’ahia ʼoutou i te ora mure ʼore nā roto i te tāraʼehara a te Mesia ʼe te mana o te ti’afaʼahouraʼa, ʼe teie, nō tō ʼoutou faʼaroʼo iāna mai te au i tei parauhia mai ra.

« Nō reira, e faʼaroʼo tō te taʼata, ’ia roaʼa atoʼa te tīa’i iāna e ti’a ai ; ʼaita ho’i e faʼaroʼo ʼaita atoʼa e tīa’i.

« E inaha, e parau atu vau ia ʼoutou ē, e ʼore e roaʼa te faʼaroʼo ʼe te tīaʼi ia ʼoutou maori rā ʼo te ha’ehaʼa ʼe te marū te ʼāʼau ».²

I muri iho, ’ua fa’aitoito Moromona ia rātou nā roto i te fa’a’ite-pāpū-ra’a ē, tei ni’a rātou i te ’ē’a nō te fāri’i i te hōro’a o tō rātou ’ā’au, ’ia fa’a’īhia i te here mau o te Mesia. ’Ua fa’atupu ’oia nō rātou i te mau ’ohipara’a o te fa’aro’o ia Iesu Mesia, te marū, te ha’eha’a, te Vārua Maita’i ’e te ti’aturira’a pāpū ’ia fāri’i i te ora mure ’ore. Mai teie tāna fa’aitoitora’a ia rātou :

« ʼĀhiri i nā reira, ʼua riro tōna faʼaroʼo ʼe tōna tīaʼi ʼei mea faufaʼa ’ore, ʼaore hoʼi te taʼata e ʼitehia i mua i te Atua, maori rā ʼo te marū ʼe te ha’ehaʼa te ʼāʼau ; ʼe ʼo te marū ʼe te ha’ehaʼa te ʼāʼau, ʼe te faʼi ʼoia nā te mana o te Vārua Maitaʼi ē, ’o Iesu ʼo te Mesia ïa, ’ia vai atoʼa te aroha i roto iāna e ti’a ai ; ʼaita hoʼi ʼōna e aroha e au ʼoia i te aore ; nō reira ia tupu tōna aroha e ti’a ai ».³

’A hi’o ai au i muri, tē ’ite nei au i teienei e mea nāhea taua hōro’a o te aroha ra—te here mau o te Mesia—i te ha’apūaira’a, te arata’ira’a, te pāturura’a ’e te tauira’a i tō’u metua vahine i roto i te ’arora’a i ni’a i te ’ē’a nō te ho’ira’a.

« E fa’a’oroma’ira’a roa tō te aroha ’e te hāmani maita’i, e ’ore te aroha e fe’i’i, e ’ore te aroha e fa’arahi, e’ita e ’imi i te maita’i nōna iho, e’ita e riri vave, e’ita e mana’o ’ino ia vetahi ’ē e’ita e ’oa’oa i te parauti’a ’ore e ’oa’oa rā i te parau mau, e fa’a’oroma’i i te mau mea ato’a ra, e fa’aro’o i te mau mea ato’a ra, e tīa’i i te mau mea ato’a ra, e ha’amāhu i te mau mea ato’a ra.

« Nō reira, e a’u mau taea’e here, ’aore o ’outou e aroha, ’aita roa a ’outou e faufa’a e ’ore ho’i te aroha e mou. Nō reira ’a ta’ati i te aroha, ’o tei hau i te mau mea ato’a ra, e mou ho’i te mau mea ato’a ra—

« ’O te aroha rā ’o te hina’aro mau ïa i te Mesia, e ’ore roa ïa e mou ; ’e ’o te ’itea te aroha i roto iāna i te mahana hope’a ra, e maita’i ïa tōna.

« Nō reira, e a’u mau taeaʼe here, e pure atu i te Metua ma te pūai hope o te ʼāʼau ia ’ī ʼoutou i teie nei aroha, ’o tāna i hō mai i te taʼata atoʼa e peʼe mau i tāna tamaiti ia Iesu Mesia, ’ia riro ʼoutou ʼei tamariʼi nā te Atua ’e ʼia fā mai ʼoia ra ʼua riro tātou mai iāna ra te huru, e ʼite hoʼi tātou iāna i tōna ra huru mau ʼe ʼia vai māite ā teie nei tīaʼiraʼa i roto ia tātou, ’e ’ia tamāhia hoʼi tātou atoʼa mai iāna i mā ».⁴

’Ua māuruuru roa vau nō te fa’aitoitora’a o te hi’ora’a maita’i ’e te ha’api’ira’a a Moromona. ’Ua ha’amaita’i-ato’a-hia vau nā te faufa’a ’āi’a a tō’u metua vahine. Te mau peropheta mai ia Adamu ’e tae mai i teie mahana, nā roto i tā rātou ha’api’ira’a ’e tō rātou hi’ora’a maita’i, ’ua ha’apūai rātou iā’u.

Nō te fa’atura i te feiā tā’u i mātau ’e tō rātou mau ’utuāfare, ’ua fa’aoti au ’eiaha e hi’opo’a i te mau tupura’a o tā rātou mau ’arora’a ’aore rā ’ia paraparau i mua i te ta’ata i tō rātou mau hōro’a rahi. Noa atu rā i te reira, te mau mea tā’u i ’ite, ’ua fa’aitoito te reira iā’u ’e ’ua taui iā’u i roto i te maita’i.

E hōro’a poto noa atu vau nō ni’a i te fa’aitoitora’a a tā’u vahine, noa atu e nehenehe te reira e ha’afifi i te mo’emo’e o tōna orara’a. E ha’apa’o maita’i au. E ta’ata mo’emo’e ’oia ma te ’ore e ’imi ’aore rā e fāri’i i te ha’apoupoura’a.

E 60 matahiti i teienei tō māua fa’aipoipora’ahia. Nā roto ho’i i taua ’ohipa ra i ta’a ai au i teienei i te aura’a o teie mau parau o te pāpa’ira’a moa : Fa’aro’o, ti’aturi, ha’eha’a, fa’a’oroma’i, ’eiaha e ’imi i tā tātou iho, e ’oa’oa i roto i te parau mau, ’eiaha e feruri i te ’ino, ’e nā ni’a roa a’e i te mau mea ato’a, te aroha.⁵ Nō te mea ho’i ’ua roa’a iā’u teie ’ite, e ti’a iā’u ’ia fa’a’ite pāpū ē, e nehenehe te ta’ata e rave i terā mau peu maita’i nehenehe i roto i tō rātou orara’a i te mau mahana ato’a, ’a ratere ai rātou i roto i te mau ’ārepurepura’a o te orara’a.

E rave rahi mirioni o ’outou e fa’aro’o mai nei, tei ’ite i terā huru ta’ata. E rave rahi o ’outou mai terā te huru. E hina’aro tātou pā’āto’a i te mau hi’ora’a fa’aitoitora’a ’e te mau hoa here mai terā te huru.

’Ia pārahi ana’e ’outou ’e te hō’ē ta’ata ’ei tuahine ’aore rā ’ei taea’e aupuru ; tē mono nei ’outou i te Fatu. ’A feruri i te mea tāna e rave ’aore rā e parau. E ani ’oia ia rātou ’ia haere mai iāna ra. E fa’aitoito ’oia ia rātou. E ’ite ’oia ’e e ha’apoupou ’oia i te ha’amatara’a o te mau tauira’a e tītauhia ia rātou ’ia rave. ’E e riro ’oia ’ei hi’ora’a maita’i roa nō rātou ’ia pe’e.

’Aita e ta’ata i rave hope roa mai te reira i teie taime, terā rā ma te fa’aro’ora’a i teie ’āmuira’a, e ’ite ’outou ē tei ni’a ’outou i te ’ē’a maita’i. ’Ua ’ite te Fa’aora i te hu’ahu’ara’a o tā ’outou mau ’arora’a. ’Ua ’ite ’oia i tō ’outou pūai rahi nō te tupu i te rahi i roto i te fa’aro’o, te tīa’ira’a ’e te aroha.

Te mau fa’auera’a ’e te mau fafaura’a tāna e pupu mai nei ia ’outou, e ’ere ïa i te mau tāmatara’a nō te arai ia ’outou. E mau hōro’ara’a nō te fa’ateitei ia ’outou i te fāri’ira’a i te mau hōro’a ato’a a te Atua, ’e nō te ho’ira’a i te fare i pīha’i iho i tō ’outou Metua i te ao ra ’e i te Fatu, tei here ia ’outou.

’Ua ’aufau Iesu Mesia i te ho’o nō tā tātou mau hara. E nehenehe tātou e tītau i te reira ha’amaita’ira’a o te ora mure ’ore, mai te mea ’ua nava’i tō tātou fa’aro’o iāna nō te tātarahapa ’e nō te riro mai te hō’ē tamari’i ri’i, te vi’ivi’i ’ore ’e te ineine i te fāri’i i te hōro’a rahi a’e i te mau hōro’a ato’a a te Atua.

Tē pure nei au ’ia fāri’i ’outou i tāna anira’a ’e ’ia hōro’a i te reira i te tahi atu o te mau tamari’i a tō tātou Metua i te ao ra.

Tē pure nei au nō tā tātou mau misiōnare ’ati a’e te ao nei. ’Ia fa’auruhia rātou nō te fa’aitoito i te ta’ata tāta’itahi ’ia hina’aro ’e ’ia ti’aturi ē, teie anira’a nō ’ō mai ïa ia Iesu Mesia ra nā roto i tāna mau tāvini tei rave i tōna i’oa i ni’a iho ia rātou.

Tē fa’a’ite pāpū nei au ē, tē ora nei ’oia ’e tē fa’atere nei ’oia i tāna ’Ēkālesia. E ’ite au Nōna. ’O te peresideni Russell M. Nelson te peropheta ora a te Atua nō te mau fenua tā’āto’a. ’Ua ’ite au e parau mau te reira. Nā roto i te i’oa mo’a o Iesu Mesia, ’āmene.