’Āmuira’a rahi
Te mana nō te parau
’Āmuira’a rahi nō ’Ātopa 2022

Te mana nō te parau

Nā Elder Mark D. Eddy

Nō te Hitu ’Ahuru

Tē vai ra te mana i roto i te mau parau a te mau peropheta tahito ’e nō teie tau ’āpī nō te mea ho’i tā rātou mau parau ra, ’o tā te Fatu ato’a ïa.

I roto i te Buka a Moromona, tē tai’o nei tātou, i roto i te tahi ’īrava herehia nō te pāpa’ira’a mo’a, hō’ē fa’aotira’a faufa’a rahi mau tei ravehia e te peropheta Alama. Nā mua a’e rā e hi’ohi’o ai i taua mau parau mātarohia ra, ’a feruri nā i te huru orara’a fifi i te taime ’a ravehia ai taua fa’aotira’a.

Tē vai rā hō’ē pupu ta’ata, tē pi’i nei ia rātou iho te ’āti Zorama, tei fa’ata’a ’ē ia rātou i te mau ’āti Nephi1 ’e tē fa’aea rā piri noa mai i te ’ōti’a fenua o te mau ’āti Lamana.2 Nō upo’oti’a noa mai nei te ’āti Nephi i ni’a i te ’āti Lamana i roto i te ’arora’a rahi i reira ho’i ’ua hau te ’ahuru tauatini o rātou i taparahihia,3 ’e ’ua « mata’u[hia e] fa’ahoa atu te mau ’āti Zorama i te mau ’āti Lamana ’e e riro ho’i te reira ’ei pau rahi nō te mau ’āti Nephi. »4 Hau atu i te māna’ona’ora’a o te ’arora’a, ’ua fa’aro’o Alama ē, te mau ’āti Zorama tei « a’ohia atu te parau a te Atua »,5 ’ua ha’amori atu i te ’īdolo ra ’e tē « ha’api’o rā […] i te mau ’ē’a o te Fatu ».6 Rahi te teimaha o teie mau mea i ni’a ia Alama ’e « nō reira ’ua ’oto roa tōna ’ā’au ».7

I roto i teie huru ’ātitirau ’e orara’a fifi, ’ua feruri Alama i te mea tāna e ti’a ’ia rave. E tai’o tātou i te mau parau tāna i fa’aoti, i fa’ahereherehia nō te fa’auru ’e nō te ha’api’i ia tātou ’a rātere ai i roto i te orara’a ’ātiti rau ’e te fifi o teie nei tau.8

« E teienei, nō te mea e mana rahi tō te a’ora’a i te parau a te Atua ’ia arata’i i te ta’ata ’ia rave i te ’ohipa ti’a––’oia ïa, ’ua hau atu tō te reira mana i ni’a i te ’ā’au o te ta’ata i tō te ’o’e, ’e tō te tahi mau mea ato’a tē tae ia rātou ra–– nō reira i mana’o ai Alama ē, e mea maita’i ïa ’ia tāmata i te mana o te parau a te Atua».9

I rotopū i nā rahira’a rāve’a e vai ra, ’ua arata’i te fa’aro’o o Alama ia rātou ’ia ti’aturi i te mana o te parau. E ’ere i te mea hape noa, i te mea ē, te tahi o te mau a’ora’a mana mau tei ’itehia i te mau vāhi ato’a i roto i te pāpa’ira’a mo’a, ’ua porohia ïa i muri noa i taua fa’aotira’a ra. I roto i te pene 32 ’e 33 a Alama, tē tai’o nei tātou i tāna a’ora’a ’aravihi nō ni’a i te fa’aro’o i te Fatu ra ia Iesu Mesia, ’e i roto i te pene 34 tē ’ite nei tātou i te mau ha’api’ira’a niu a Amuleka nō ni’a i te tāra’ehara a Iesu Mesia.

Fa’ahōho’ara’a o Te mana o te parau

’Oia mau, i roto i te pāpa’ira’a mo’a tē tai’o nei tātou i te mau ha’amaita’ira’a temeio mau tei ni’ini’ihia i ni’a i te feiā i mā’iti ’ia tāmata i te mana o te parau a te Atua i roto i tō rātou orara’a.10 Tē tītau manihini nei au ia ’outou ’e o vau nei ’ia feruri i ni’a i nā hi’ora’a e toru ’a rōtahi ai tātou i ni’a i te Buka a Moromona––e buka tei parauhia e te peresideni Russell M.Nelson ’ei « arata’i fa’aora nō tātou i te mahana hope’a nei ».11

’A tahi, ’a fa’aha’amana’o ai ’oia i tōna nūna’a nāhea te Fatu i te fa’aorara’a i tō rātou mau metua, ’ua ha’api’i Alama : « Inaha, nāna ho’i tō rātou ’ā’au i fa’afāriu mai ; nāna i fa’aaraara ia rātou i te vare’a tā’oto rahi, ara a’era rātou i te Atua ra. Inaha, tei roto roa rātou i te pōiri ; ’ua ha’amāramaramahia rā tō rātou ’ā’au i te māramarama o te parau mure ’ore ra ».12 Penei a’e tē mana’o ato’a rā ’outou ē, tei roto ’outou i te pōiri. Tē hīa’ai nei ’outou i te ha’amāramaramara’a ? Mai te peu terā iho ā, tāmata na i te mana o te parau a te Atua.

’A piti, ma te feruri i tō te Fatu fa’afāriura’a i te ’āti Lamana, tāna iho i ’ite mata roa atu ’ei misiōnare, ’ua parau Amona, « Inaha, te mau tauatini o tō tātou mau taea’e tei tātarahia e ana i te mau ’ati o hade ra ; ’e ’ua roa’a ia rātou te hina’aro ’ia hīmene i te aroha fa’aora, nō te mea tei roto ia tātou nei te mana nō tāna raparau. »13 Te mau taea’e ’e te mau tuahine, e rave rahi o tātou tē hīa’ai nei ’ia roa’a, i te feiā tā tātou i here, te hina’aro ’ia hīmene i te aroha fa’aora. E ha’amana’o na, i roto i tā tātou mau tauto’ora’a ato’a, ’ia tāmata i te mana o te parau a te Atua tei roto ia tātou.

’A toru, tē tai’o nei tātou i roto i te Buka a Helamana ē, « ’Ua ’ite ato’a tātou ē, o rātou o te hina’aroe ti’a ia rātou ’ia tāpe’a mai i te parau a te Atua, ’o tei riro ’ei mea ora ’e te pūai ho’i ’e ’o te fa’ata’a ’ē i te mau mea ha’avare ato’a ’e te mau mārei ’e te mau parau a te diabolo, ’e e arata’ihia ai te ta’ata a te Mesia nā taua ’ē’a apiapi ’e te piriha’o ra e tae ai i terā pae mai o te ’abuso hope ’ore o te mauiui […] ’e e tae ai tō rātou vārua […] i te rima ’atau o te Atua, i te bāsileia o te ao ra ».14 Tē tāmata rā anei ’outou i te ’ape i te mau mea ha’avare ato’a ’e te mau mārei ’e te mau ’ōpuara’a ’ino a te diabolo tei ’itehia i roto i te mau philosophia o teie nei tau ? Tē hina’aro rā anei ’outou ’ia ha’apūrara i te mau ata o te ta’a-’ore-ra’a nō te rahira’a o te mau ha’amāramaramara’a, ’ia ti’a ia ’outou ’ia rōtahi i ni’a noa i te ’ē’a o te fafaura’a ? ’A tāmata na i te mana o te parau a te Atua.

’Ei ta’ata tei tauihia e te mana o te parau, tē fa’a’ite pāpū nei au nō te parau mau i ha’api’i nehenehehia e tō tatou peropheta here, te peresideni Russell M.Nelson : « Nō’u nei, ’ua riro te mana o te Buka a Moromona ’ei tumu pāpū o te tauira’a rahi te tae mai i roto i te orara’a o te feiā tē tai’o nei i te reira ‘ma te ’ā’au hina’aro mau, ma te mana’o pāpū, ma te fa’aro’o i te Mesia’. Mea rahi o rātou i fa’afāriuhia tei mo’ehia ē, ’ua mau pāpūhia na e rātou, i te hō’ē taime, i te ha’apa’o noa i te mau parau a teie buka… E riro teie ’ei mauha’a maita’i nō te ’āfa’i mai i te mau vārua ia Iesu te Mesia ».15

TeTumu o te mana

I roto i teie ’e te tahi mau fa’ahōho’ara’a, tē ’ite nei tātou i te mana o te parau a te Atua i roto i te orara’a o tāna mau tamari’i. E riro ’outou i te ui ē, e aha te tumu o te mana ’aore rā o te mana ?

’A feruri ai tātou i teie uira’a, mea faufa’a ’ia ha’amana’o ē, e piti aura’a tō te pereota « te parau » i roto i te pāpa’ira’a mo’a. ’Aita i maoro a’e nei ’ua ha’api’i mai Elder David A. Bednar ē, « hō’ē o te mau i’oa o Iesu Mesia ’oia ho’i ïa o ‘te Parau’ » ’e « te mau ha’api’ira’a a te Fa’aora, mai tei pāpa’ihia i roto i te mau pāpa’ira’a mo’a, ’o te mau ‘Parau’ ato’a ïa ».16

’Ua fa’ahōho’a te peropheta Nephi i te tā’amura’a o nā aura’a e piti ’a pāpa’i ai ’oia : « ’a fa’aro’o mai na i teie nei mau parau, ’e e fa’aro’o ho’i i te Mesia ra; ’e ’ia ’ore ’outou ’ia fa’aro’o i teie nei mau parau, e fa’aro’o i te Mesia ra. ’E ’ia fa’aro’o ’outou i te Mesia ra, e fa’aro’o ato’a ïa ’outou i teie nei mau parau, nō te mea, ’o te parau ïa te reira a te Mesia, ’e ’ua hōro’a mai ’oia i taua mau parau nei iā’u nei ».17 Tē vai ra te mana i roto i te mau parau a te mau peropheta tahito ’e nō teie tau ’āpī nō te mea ho’i tā rātou mau parau ra, ’o tā te Fatu ato’a ïa.18 E au mau hoa here, e mea faufa’a mau te fāri’ira’a i teie parau mau mure ’ore nō tō tātou oraora’a pae vārua i te mau mahana hope’a nei19 i te taime iho, mai tei tohuhia, e tae mai « te o’e i ni’a i te fenua, e ’ere rā i te o’e mā’a ’ore, ’e te hia’ai i te pape, i te fa’aro’o rā i te parau a Iehova ».20

I te pae hope’a, te mana o te parau a te Atua oia ho’i ’o te Fatu ra ’o Iesu Mesia.21 ’A hāro’aro’a rahi ai tātou i te reira, e ’itehia mai ia tātou te fa’atūeara’a o te aura’a i rotopū i te ti’ara’a o te mau peropheta ’e tō te Tāra’ehara iho. Nā tō tātou here nōna, tō tātou hina’aro ’ia piri atu iāna, ’e ’ia vai i roto i tōna here,22 e arata’i ia tātou ’ia tāmata i te mana o te parau i roto i tō tātou orara’a––nā tura ato’a e piti tei tahe mai nō ’ō mai iāna ’ei Fa’aora ’e ’ei Tāra’ehara nō tātou iho nei23 ’e te mana tei tahe mai nō ’ō mai iāna ra nā roto i te mau parau « a te mau fāri’i-mā’iti-hia a te Fatu ».24 E tae atu ïa tātou ’ia fa’ata’a ē, noa atu te tauturura’a rahi o tā tātou mau tuatāpapara’a nō te Fa’aora ’e te parau o tāna mau peropheta, e’ita roa atu te reira e riro ’ei monora’a nō rātou. E ti’a ia tātou ’ia inu rahi atu ā ’e ha’apinepine,25 nō ’ō mai i te puna mau.26

’Ua here au ia ’outou, e tō’u mau taea’e ’e mau tuahine. I roto i teie here, tē tāparu nei au ia ’outou ’ia fa’a’ohipa i te mana o te parau a te Atua, nō roto mai i te Buka a Moromona, i te mau mahana ato’a o tō ’outou orara’a. ’Ia nā reira ’outou, e noa’a ia ’outou i te parau fafau a te peropheta Russell M. Nelson ē : « Tē parau fafau atu nei au ia ’outou ē, ’ia tuatāpapa ’outou i te Buka a Moromona nā roto i te pure i te mau mahana ato’a, e rave ïa ’outou i te mau fa’aotira’a maita’i a’e i te mau mahana ato’a. Tē parau fafau atu nei au ē, ’ia feruri māite ’outou i tā ’outou i tuatāpapa, e matara mai ïa te mau ha’amāramarama o te ra’i ’e e fāri’i mai ’outou i te pāhonora’a i tā ’outou iho mau uira’a ’e te arata’ira’a nō tō ’outou iho orara’a. Tē parau fafau atu nei au ē, ’ia utuhi ’outou ia ’outou i roto i te Buka a Moromona i te mahana tāta’itahi, e nehenehe ’outou e pāruruhia i te mau ’ino o terā mahana ».27

Tē fa’a’ite pāpū nei au ē, ’ua hōro’a mai tō tātou Metua i te ao ra i te parau ia tātou nei nō tōna here mau ia tātou ’e tē hina’aro nei ia tātou tāta’itahi ’ia ho’i i te fare ’e ’ia ora iāna ra ē a muri noa atu. Tē fa’a’ite pāpū nei au « I riro mai nei te Parau (te Logo)… ’ei ta’ata »,28 ’oia ho’i ’o Iesu te Mesia, ’e nō tōna mana nō te fa’aora ia tātou ’Ua ’ite au ē, e tahe mai tōna maita’i nā roto i te mau parau a tōna mau peropheta, tei ma’iri ’e nō teie ’anotau.

Teie te pure o tō’u ’ā’au, ’ia roa’a ia tātou i te pa’ari ’e te mārū nō te mau pāpū30 i te parau a te Atua ’e ’ia fa’aea i ni’a i te ’ē’a o te fafaura’a ’o tē arata’i i te fa’ateiteira’a ’e i te ora mure ’ore.30 ’Ia tāmau ā tātou i te fāri’i i te tauira’a rahi e roa’a nō roto mai i te mana o te parau a te Atua.31 I te i’oa o Iesu Mesia ra, ’āmene.

Fa’ata’ara’a

  1. Hi’o Alama 30:59.

  2. Hi’o Alama 31:3.

  3. Hi’o Alama 28:2.

  4. Alama 31:4. ’A ha’amana’o na ē, ’ua « fa’ahoa » atu ’o Alama ’e tōna nūna’a i te mau ’āti ’Amaliki ’e te mau ’āti Lamana ’e i riro ho’i te reira ’ei ’oto rahi ’e te pau rahi (hi’o Alama 2:21–38 ; 3:1–3).

  5. Alama 31:8

  6. Alama 31:1

  7. Alama 31:2

  8. Hi’o Moromona 8:34–35

  9. Alama 31:5 ; ha’apāpūra’a i ’āpitihia atu.

  10. ’Ei hi’oraa, ’a hi’o 1 Nephi 15:24 ; Alama 32:41–43 ; 36:26 ; 37:8, 44–45.

  11. Russell M. Nelson, « ’A fāri’i i te ’ananahi ma te fa’aro’o », Liahona, Novema 2020, 75.

  12. Alama 5:7 ; ha’apāpūra’a i ’āpitihia atu.

  13. Alama 26:13 ; ha’apāpūra’a i ’āpitihia atu.

  14. Helamana 3:29–30 ; ha’apāpūra’a i ’āpitihia atu.

  15. Russell M. Nelson, « The Book of Mormon: A Miraculous Miracle », (Ha’api’ira’a nā te mau peresideni misiōni ’āpī, 23 nō Tiunu 2016), fa’ahitihia te tahi tuha’a i roto Moroni 10:4.

  16. David A. Bednar, « ’Aore rā mātou i ha’apa’o noa atu ia rātou », Liahona, Mē 2022, 16.

  17. 2 Nephi 33:10 ; ha’apāpūra’a hau atu.

  18. Hi’o Te Ha’api’ira’a Tumu ’e te mau Fafaura’a 1:38.

  19. Hi’o Te Ha’api’ira’a Tumu ’e te mau Fafaura’a 1:14–18.

  20. Amosa 8:11.

  21. Hi’o Alama 34:6.

  22. Hi’o Ioane 15:10.

  23. Hi’o Mareko 5:25–34.

  24. Moroni 10:32.

  25. « Te vai nei te hō’ē rāve’a maita’i atu nō te fa’aineinera’a, nō te mea e mea poto te orara’a o te fa’aro’o. E nehenehe tātou e mā’iti i te tuatāpapa tāmau i te mau pāpa’ira’a mo’a ’e i te mau ha’api’ira’a a te mau peropheta ora. Teie ïa tā’u e rave. E ho’i ïa vau i roto i te Buka a Moromona ’e ’ia tai’o rahi atu ā » (Henry B. Eyring, « ’Ia ineine noa i te pae vārua : ’a ha’amata vave ’e ’ia haere itoito noa i mua », Liahona, Nov. 2005, 39).

  26. « Nō’u iho nei, te tuatāpapara’a o te mau pāpa’ira’a mo’a e ’ere ïa i te hō’ē ’ohipa ’imira’a ’ite ha’api’ira’a. E ’ohipa here rā teie i te parau a te Atua ’e a tāna mau peropheta […]

    ’Aita vau e ha’afaufa’a rahi i te tai’ora’a i te mau parau roaroa ’e te rahi mai tei fa’ata’ahia nō te fa’arahi noa mai te ’itehia i roto i te mau pāpa’ira’a mo’a. Terā rā, mea au a’e nā’u i te fa’aea i pīha’i iho i te puna, e tāmata i te pape tei ’ore i tauihia i te niu o te parau mau, te parau a te Atua mai tei hōro’ahia ’e tei pāpa’ihia i roto i te buka tā tātou e parau nei te pāpa’ira’a mo’a […] Nā roto i te tai’ora’a i te pāpa’ira’a mo’a, e roa’a ia tātou te ha’apāpūra’a a te Vārua ē, te mea tā tātou e tai’o nei, nō ’ō mai ïa i te Atua nō te tūrama, nō te ha’amaita’i ’e te nō te ’oa’oa o tāna mau tamari’i » (Gordon B. Hinckley, « Feasting upon the Scriptures » Tambuli, Tiunu 1986, 2, 4).

  27. Russell M. Nelson, « Te Buka a Moromona : E aha te huru tō ’outou orara’a ’āhani ’aita te reira ? », Liahona, Novema 2017, 62–63.

  28. Ioane 16:33.

  29. Hi’o 1 Nephi 8:30.

  30. Te ’ē’a nō te fafaura’a, ’o te ’ē’a hō’ē roa ïa e tae atu ai i te fa’ateiteira’a ’e te ora mure » (Russell M. Nelson, « Te mana o te haerera’a i mua i te pae vārua », Liahona, Mē 2022, 98).

  31. Hi’o Alama 5:11–13.