Patura’a i te hō’ē orara’a e ’aroti’a i te ’ati

I te roara’a o te mau matahiti, mai mua atu i teie purupiti nehenehe i roto i teie pū ’āmuira’a, ’ua fāri’i tātou i te mau a’ora’a, te mau fa’aurura’a, te mau ha’api’ira’a ’e te mau heheura’a fa’ahiahia mau. Nō te reira, ’ua fa’a’ohipa te feiā a’o i te tahi mau fa’aaura’a e tū’ati i tō rātou huru ’ite ’e te ’ohipa i tupu nō te fa’ahōho’a maita’i ’e te pūai i te hō’ē parau tumu o te ’evanelia a Iesu Mesia.

Nō teie rāve’a, ’ei hi’ora’a, ’ua ha’api’i mai tātou nō ni’a i te mau manureva ’e tō rātou mau rerera’a, nā roto i te hō’ē ruri-’ē-ra’a iti, e arata’i ia tātou i te hō’ē vāhi ātea i tō tātou vāhi tāpaera’a.¹ Nā roto ato’a i teie rāve’a, ’ua ha’api’i mai tātou i te hō’ē fa’a’aura’a nō te ’ohipara’a tō tātou māfatu pae tino ’e te mana pūai o te tauira’a o te ’ā’au e tītauhia nō te pāhono i te anira’a a te Fatu ’ia pe’e iāna.²

I teienei taime, tē hina’aro nei au ma te ha’eha’a e tu’u atu i te hō’ē fa’a’aura’a fa’auruhia nō roto mai i te hō’ē rāve’a nō tō’u fa’aineinera’a nō te tōro’a ’ohipa. Tē parau nei au nō te ao o te ’ī’ite tīvira. Mai te ’ōmuara’a o tā’u ha’api’ira’a tuatoru, ’ua moemoeā vau i te mahana e hope roa ai te mau ha’api’ira’a i tītauhia, ’ia mā’itiha nō te haere atu i te piha ha’api’ira’a ’o tē ha’api’i mai iā’u e nāhea ’ia pāpa’i hōho’a i te mau fare patu ’e te tahi atu mau fare rarahi ’o tē nehenehe e fa’arirohia ’ei « mea ’āueue ’ore ».

Tae mai ra taua mahana ra nō tā’u ha’api’ira’a mātāmua nō teie tumu parau. Teie te mau parau mātāmua a te ’orometua ha’api’i : « E hina’aro rahi mau tō ’outou e ha’amata i teie ha’api’ira’a ’e ’ia ’apo mai e nāhea ’ia pāpa’i hōho’a i te mau fare rarahi ’āueue ’ore », nō te reira ’ua tā’iri’iri te rahira’a o mātou i te upo’o ma te ’ana’anatae. I muri iho ’ua parau mai te ’orometua, « ’eiaha e ’ino’ino mai, e ’ore roa te reira e tupu, nō te mea e’ita e ti’a iā’u ’ia ha’api’i atu e nāhea ’ia pāpa’i hōho’a i te hō’ē fare tahua e ārai, e ‘fa’a’ore‘ ’aore rā e pāto’i i mua te ’āueuera’a fenua ’Aita tō te reira e aura’a » ’ua parau ’oia, « nō te mea e tupu mau iho ā te mau ’āueuera’a fenua, ’aita e paraura’a ».

’Ua parau fa’ahou mai ’oia i muri iho, « te mea tā’u e nehenehe e ha’api’i ia ’outou maori ra e nāhea ’ia pāpa’i hōho’a i te mau fare rarahi e ’aroti’a i te ’āueuera’a fenua, te mau fare tahua pāutuutu i mua i te pūai o te ’āueuera’a fenua, ’ia ti’a i te fare rahi ’ia ti’a noa ma te ’ore e rahi te ’ino ’e ’ia tāmau ā i te tāvini nō te reira tumu ’oia i hāmanihia ai ».

E rave te ’ī’ite i te mau nūmerara’a e fa’a’ite ra i te mau fāitoti’a, te pāutuutura’a ’e te mau huru hōho’a o te mau papa, te mau pou, te mau te’a, te mau patu tīma ’e te tahi atu mau mātēria patura’a e fa’anahohia ra. E tu’uhia teie mau nūmera hope’a i ni’a i te ’ōpuara’a ’e te mau ha’apāpūra’a anoha’a, ’ia ti’a i te reira ’ia pe’e-maite-hia e te ta’ata hāmani, ’ia nehenehe i te fare ’ia pāutuutu maita’i ’e ’ia ’ohipa mai te au i te ’ōpuara’a ’e i te hāmanira’a i fa’ata’ahia.

Nō reira, ’ua hau i te 40 matahiti i ma’iri i teienei mai teie ha’api’ira’a mātāmua o te ’ī’ite nō te ’aroti’a i te ’āueuera’a fenua, tē ha’amana’o pāpū nei au i te taime ’a ha’amata ai au i te fāri’i mai i te hō’ē hāro’aro’ara’a hōhonu atu ā, ’e te rava’i maita’i nō te faufa’a mau o teie fa’anahora’a e ’itehia mai i roto i te mau fare rarahi, ’o tā’u e pāpa’i hōho’a atu i roto i tō’u orara’a i te pae tōro’a ’ohipa nō a muri iho ’Eiaha noa te reira, hau atu rā i te faufa’a rahi—’ia vai tāmau mai te reira i roto i te patura’a i tō’u orara’a ’e i roto i te feiā i reira vau e fa’a’ohipa ai i te fa’aurura’a maita’i.

’Oia mau, ’ua ha’amaita’ihia tātou ’ia ti’aturi i ni’a i te ’itera’a i te ’ōpuara’a nō te fa’a’orara’a tei fa’anahohia e tō tātou Metua i te ao ra, ’ia fāri’i i te ’evanelia a Iesu Mesia tei fa’aho’i-fa’ahou-hia mai, ’e ’ia turu’i i ni’a i te mau ’arata’ira’a fa’auruhia a te mau peropheta ora ! ’Ua riro te mau hāmanira’a ato’a tei pāpa’i-hōho’a-hia ’ei « ’ōpuara’a » hanahana ’e te « ha’apāpūra’a anoha’a » ’o tē ha’api’i māramarama ia tātou e nāhea tātou ’ia patu i te hō’ē orara’a ’oa’oa—te mau orara’a e ’aroti’a i te hara, e ’aroti’a i te fa’ahemara’a, e ’aroti’a i te mau ’arora’a a Sātane, ’o tē ’imi ’ono’ono nei e fa’a’ere i tō tātou ’ananahi mure ’ore ’e tō tātou Metua i te ao ra ’e tō tātou mau ’utūafare herehia.

Te Fa’aora iho, i te ’ōmuara’a o tāna misiōni, « tei vaiihohia ’e ’ia fa’ahemahia e te diabolo ».³ ’Ua manuia mai rā Iesu nā roto mai i teie tāmatara’a rahi. Nāhea te roa’ara’a i te hō’ē huru pāto’i ia Sātane ’aore rā pāto’i te fa’ahemara’a i te tauturu iāna ? Te mea tei ha’amanuia ia Iesu nā roto mai i taua mau taime fifi rahi ra, ’o tāna ïa fa’aineinera’a pae vārua, ’o tei fa’ati’a iāna ’ia ti’a pāutuutu nō te ’aroti’a i te mau fa’ahemara’a a te ’enemi.

E aha te tahi mau tumu tei tauturu i te Fa’aora ’ia fa’aineine iāna nō taua taime mau ra ?

A tahi, ’ua ha’apae ’oia i te mā’a e 40 mahana ’e e 40 ru’i, hō’ē ha’apaera’a mā’a ’o tei ’āpitihia mai ’e te pure tāmau. Nō reira, ta’a noa atu tōna paruparu pae tino, e mea pūai ’ū’ana tōna vārua. Noa atu, e maoti ra, ’aita tātou i ’anihia e ha’apae te mā’a i tera roara’a—nō te maorora’a noa e 24 hora ’e hō’ē noa taime i te ’āva’e—e hōpoi mai te ha’apaera’a mā’a i te pūai pae vārua ’e e fa’aineine ia tātou ’ia ’aroti’a i te tāmatara’a o teie orara’a.

Te piti, i roto i te ’ā’amu nō te fa’ahemara’a ’o tā te Fa’aora i fa’aruru, tē ’ite nei tātou ē ’ua pāhono noa ’oia ia Sātane ma te mau pāpa’ira’a mo’a i roto i tōna ferurira’a, te mau fa’ahitira’a parau ’e te fa’a’ohipara’a i te reira i te taime mau ra.

I tō Sātane fa’ahemara’a iāna ’ia taui i te mau ’ōfa’i ’ei mā’a, ’ia ti’a iāna e ha’amāha i tōna po’ia nō tāna ha’apae mā’a roa, ’ua parau atu te Fatu iāna, « ’ua pāpa’ihia ē, e ’ore te ta’ata e ora i te mā’a ana’e ra, i te mau mea ato’a rā i ha’apa’ohia e te Atua ».⁴ I muri iho, i tō te Fatu ti’ara’a i ni’a i te poretito o te hiero, ’ua tāmata te diabolo i te fa’ahema iāna nō te fa’a’ite i tōna mana, i reira iho pāhono atu ra te Fatu ma te mana , « ’ua pāpa’i-ato’a-hia, ’eiaha ’oe e a’a i tō Atua ra ia Iehova ».⁵ ’E i te toru o te fa’ahemara’a a Sātane, ’ua pāhono atu te Fatu, « ’ua oti hoʼi i te pāpaʼihia, ’o tō Atua o Iehova tā ’oe e haʼamori, e ʼoia anaʼe ra tā ’oe e faʼaroʼo ».⁶

Te tupura’a o te ’āueuera’a fenua e vaiiho te reira i tāna tāpa’o i ni’a iho i te mau pou o te fare tahua tei pāpa’i-hōho’a-hia ’e tei patuhia ma te maita’i—te fifi e ’itehia mai te tahi mau ’āfafara’a, te maruara’a te mau teiaha fare ’aore rā te mau aroaro, te mau ha’amāramarama tei pararī ’e te vai atu ā. Terā rā, teie fare patu tei pāpa’i-hōho’a-maita’i-hia ’e tei patu-maita’i-hia e fa’a’ī i tāna ’ōpuara’a ’ia pāruru i te feiā i roto, ’e ma te tahi mau tāta’ira’a e hō’i fa’ahou mai te reira mai te mātāmua.

Mai te reira ato’a nō te mau ’āueuera’a a te ’enemi e nehenehe e fa’atupu ato’a mai i te mau « ’āfāfāra’a » ’aore rā te mau vāhi pāpararī i roto i tō tātou orara’a, noa atu tā tātou mau tauto’ora’a nō te patu i tō tātou orara’a ’ia au i te pāpa’i hōho’a hanahana maita’i roa. E nehenehe teie mau « ’āfāfāra’a » e tupu mai nā roto i te mau mana’o ’oto ’aore rā te mana’o tātarahapa nō te ravera’a i te mau hape ’e i te ’orera’a i rave ma te maita’i roa, ’aore rā tē mana’ora’a ē e ’ere tātou i te mea maita’i mai tā tātou i hina’aro.

E aha rā te mea tano a’e, ’oia ho’i nō te pe’era’a i te mau ’ōpuara’a ’e te mau ha’apāpūra’a hanahana tei fa’anahohia, ’oia ho’i te ’evanelia a Iesu Mesia, ’ia ti’a noa tātou. ’Aita te patu o tō tātou orara’a i vāvāhihia e te mau tauto’ora’a a te ’enemi ’aore rā e te mau tupura’a fifi ’o tā tātou i fa’aruru ; maoti rā, ’ua ’ineine tātou nō te haere i mua.

Te ’oao’a tei fafauhia i roto i te pāpa’ira’a mo’a ’ei tumu nō tō tātou orara’a⁷ ’eiaha ’ia māramaramahia ē, e’ita tātou e fāri’i i te mau fifi ’aore rā i te mau māuiui, ’e e’ita tātou e « ’āfāfā » ’ei tumu nō te mau fa’ahemara’a, nō te hepohepo ’aore rā nō te mau tāmatara’a mau o tō tātou orara’a i te fenua nei.

Teie ’oa’oa e au ïa i tā Nephi hi’ora’a nō ni’a i te orara’a ’a parau ai ’oia : « ’ua ’ite au i te mau ’ati e rave rahi i tō’u ra pu’e mahana, ’āre’a rā ’ua fa’ahereherehia vau e te Fatu i tō’u mau mahana ato’a ».⁸ I tōna mau mahana ato’a ! Noa atu te mau mahana tā Nephi i fa’aruru i te mau taime ta’a ’ore ’e te tu’ura’ahia ’oia i te hiti e tōna mau taea’e, ’oia ato’a i te ru’uru’ura’ahia ’oia i ni’a i te pahī, tae noa atu i te mahana ’a pohe ai tōna metua tāne ’o Lehi, ’oia ato’a ’a riro ai Lamana ’e ’o Lemuela ’ei ’enemi ’ino rahi nō tōna nūna’a. Noa atu i taua mau mahana fifi ra, ’ua ’ite Nephi ’ua fa’aherehere-rahi-hia ’oia e te Fatu.

E nehenehe tātou e vai hau noa i te ’itera’a ē, e’ita te Fatu e fa’ati’a ’ia fa’ahemahia tātou i ni’a a’e i te mea e ti’a ia tātou ’ia ’aroti’a. Tē ani mai nei Alama ia tātou « ’ia ara ’e ’ia pure ma te fa’aea ’ore, ’ia ’ore [tātou] ’ia fa’ahemahia hau atu i tō [tātou] pūai, ’e ’ia arata’ihia e te Vārua Maita’i, ’ia riro ’ei feiā ha’eha’a, te marū, te auraro māite, te fa’a’oroma’i, te ’ī ho’i i te aroha ’e te fa’a’oroma’i roa ».⁹

E nehenehe teie ā mea e fa’a’ohipahia i te mau tāmatara’a o te orara’a. Tē fa’aha’amana’o mai nei Amona ia tātou i te mau parau a te Fatu : « ’’A haere […] ’e ’a fa’a’oroma’i i tō ’outou mau ’ati, ’e nā’u ’outou e ha’amanuia i reira ».¹⁰

’Ua hōro’a tāmau mai te Fatu ia tātou i te hō’ē tauturu ’ia fa’aruru ana’e tātou i te ’ati, te fa’ahemara’a, te ta’a-’ore-ra’a, te paruparu, tae noa atu i te pohe. ’Ua parau ’oia, « ’e i teienei, ’oia mau tē parau atu nei ia ’outou na, e ’o tā’u e parau atu nei i te hō’ē ra, ’o tā’u ato’a ïa e parau atu nei i te tā’āto’ara’a, ’a ’oa’oa nā e te mau tamari’i ri’i ; nō te mea tei rotopū vau ia ’outou nā, ’e ’aita vau i fa’aru’e atu ia ’outou ».¹¹ ’E ’ore roa ’oia e fa’aru’e ia tātou !

Tē pure nei au ē, ’ia tāmau noa tātou i te patu i tō tātou orara’a ma te pe’e i te mau ’ōpuara’a ’e te mau ha’apāpūra’a anoha’a o te hōho’a pāpa’i hanahana tei ravehia e tō tātou Metua ’e tei fa’atupuhia e tō tātou Fa’aora, o Iesu Mesia. Nō reira, nō te aroha tei tae mai ia tātou nei nā roto i te tāra’ehara a tō tātou Fa’aora, e manuia tātou i te patura’a i te hō’ē orara’a nō te pāto’i i te hara, nō te pāto’i i te fa’ahemara’a, ’e ’ia ha’apa’arihia i te roara’a o te mau taime ’oto ’e te mau fifi o tō tātou orara’a. Hau atu ā, e ineine tātou nō te fāri’i i te mau ha’amaita’ira’a tei fafauhia mai e te here o tō tātou Metua ’e tō tātou Fa’aora. I te i’oa o Iesu Mesia, ’āmene.