Ha’afātata atu ā i te Fa’aora

’Ua fa’ata’a te Fatu ē, i roto i teie tau hope’a nā mua a’e tōna ho’ira’a mai, e tupu te « sītona », ’o tāna i parau ’o « te tamari’i o te bāsileia »,⁵ i pīha’i iho i te « zīzānia », ’oia ho’i te feiā ’aita i here i te Atua ’e ’o tē ha’apa’o ’ore i tāna mau fa’auera’a. E « tupu ’āpipiti » rāua,⁶ te tahi i pīha’i iho i te tahi.

’O tō tātou nei ïa ao ē tae noa ai e ho’i mai te Fa’aora, e rave rahi maita’i ’e e rave rahi ’ino i te mau pae ato’a.⁷

Pēnei a’e i te tahi taime e mana’o ’outou ē, e ’ere ’outou i te ’ata sītona pa’ari. ’A fa’a’oroma’i ia ’oe iho ! ’Ua parau te Fatu ē tē vai ra te sītona e vai marū noa te ’ōteu.⁸ E feiā mo’a ana’e tātou pā’āto’a nōna, ’e noa atu ē ’aita ā tātou i tae i te mau mea ato’a tā tātou e hina’aro ’ia riro, e mea pāpū rā tātou i roto i tō tātou hia’ai ’ia riro ’ei pipi mau nāna.

Tē ’ite nei tātou ē, ’a rahi noa ai te ’ino i roto i te ao, e ora mai tātou i te pae vārua, ’e rātou ato’a ’o tā tātou i here, maoti tō tātou fa’a’amu-hope-ra’a, te ha’apa’arira’a ’e te ha’apūaira’a i te mau a’a o tō tātou fa’aro’o ia Iesu Mesia. ’Ua a’o mai te ’āpōsetolo Paulo ’ia a’ahia tātou,⁹ ’ia tumuhia ’e ’ia mau¹⁰ i ni’a i tō tātou here i te Fa’aora ’e te fa’aotira’a pāpū e pe’e iāna. I teie mahana ’e i te mau mahana i muri nei, e tītauhia te tauto’ora’a pāpū a’e ’e te rōtahi a’e, ’e ’ia ha’apa’o maita’i tātou i te mau fa’a’ōnevanevara’a ’e te tāu’a-’ore-ra’a.¹¹

Noa atu rā te mara’ara’a o te mau mana o teie nei ao ’ati a’e ia tātou, ’eiaha tātou e mata’u. E’ita roa atu te Fatu e fa’aru’e i tona feiā nō te fafaura’a. E mana ho’ona, e mana nō te mau hōro’a pae vārua ’e te arata’ira’a hanahana e vai ra nō te feiā parauti’a.¹² Teie rā, ’aita teie ha’amaita’ira’a hau atu ā nō te mana pae vārua e fa’atopahia i ni’a ia tātou nō te mea noa tei roto tātou i teie nei u’i. E tae mai te reira ’ia ha’apūai tātou i tō tātou fa’aro’o i te Fatu ra Iesu Mesia, ’e ’ia ha’apa’o tātou i tāna mau fa’auera’a, ’e ’ua mātau tātou iāna ’e ’ua here ho’i iāna. I pure Iesu ē : « Teie ho’i te ora mure ’ore, ’ia ’ite rātou ia ’oe i te Atua mau ra, ’e ’ia Iesu i te Mesiai tā ’oe i tono mai ra. »¹³

Mai tā tātou i ’ite maita’i, ’ua hau atu te fa’atupura’a i te fa’aro’o ia Iesu Mesia ’e te vai-noa-ra’a ’ei pipi mau nāna, i te hō’ē fa’aotira’a hō’ē taime—’e te hō’ē ’ohipa hō’ē taime. E ’ohipa tau maoro mo’a ’e te tāmau, ’o tē tupu i te rahi ’e ’o tē fa’a’ā’ano i roto i te tau o tō tātou orara’a ē tae noa ai e tūturi tātou i tōna ra ’āvae.

Nō te sītona e tupu ra i rotopū i te zīzānia o te ao nei, nāhea tātou e fa’ahōhonu ai ’e e ha’apūai i tā tātou parau fafau i te Fa’aora, i te mau mahana i muri nei ?

Teie e toru mana’o :

’A tahi, e nehenehe tātou e utuhi hope atu ā ia tātou i roto i te orara’a o Iesu, tāna mau ha’api’ira’a, tōna hanahana, tōna mana ’e tāna tusia tāra’ehara. ’Ua parau te Fa’aora, « ’A hi’o mai iā’u nei i tō mau mana’o ato’a na ».¹⁴ Tē fa’aha’amana’o mai nei te ’āpōsetolo Ioane ē : « Tē hina’aro nei tātou iāna, nō te mea ’oia na tei hina’aro mai na ia tātou nei. »¹⁵ ’A ’ite rahi ai tātou i tōna here, e here rahi atu ā tātou iāna, ’e terā iho ā tē tupu i muri iho, e pe’e maita’i atu ā tātou i tōna hi’ora’a nō te herera’a ’e te aupurura’a i te ta’ata ’ati a’e ia tātou. I te mau haere’a parauti’a ato’a iāna ra, e ’ite pāpū atu ā ïa tātou iāna.¹⁶ E ha’amori tātou iāna, ma te tāmata i roto i tā tātou mau rāve’a iti ’ia pe’e i tōna hi’ora’a.¹⁷

I muri iho, ’ia mātau maita’i a’e tātou i te Fa’aora ’e ’ua here maita’i a’e iāna, e hia’ai rahi atu ā tātou i te parau fafau atu i tō tātou ha’apa’o maita’i ’e tō tātou ti’aturi. E rave tātou i te mau fafaura’a iāna ra. E ha’amata tātou i tā tātou mau parau fafau i te bāpetizora’a, ’e e ha’apāpū tātou i te reira mau parau fafau ’e tē vai atu ra, nā roto i te tātarahapara’a i te mau mahana tāta’itahi, ’e te tīa’i-’ana’anatae-ra’a ’ia fāri’i i te ’ōro’a i te hepetoma tāta’itahi. E hōreo tātou ē, e « ha’amana’o ā iāna ē a muri noa atu, ma te ha’apa’o maita’i i tāna mau fa’aue. »¹⁸

’Ua ineine tātou ra, e fāri’i tātou i te mau ’ōro’a ’e te mau fafaura’a nō te hiero. Nō te putapūra’a i te mana nō te tau mure ’ore i roto i tō tātou mau taime mo’a ’e te hau i roto i te fare o te Fatu, e rave ïa tātou i te mau fafaura’a i mua i te Atua ma te ’oa’oa, ma te ha’apūai i tō tātou fa’aotira’a e ha’apa’o i te reira.

Maoti te ravera’a ’e te ha’apa’ora’a i te mau fafaura’a e ti’a ai i tō tātou here i te Fa’aora ’ia puta hōhonu atu ā i roto i te ’ā’au. I roto i te Liahona nō teie ’āva’e, ’ua parau te peresideni Russell M. Nelson : « E arata’i [tā tātou mau] fafaura’a ē fātata roa atu iāna […] E’ita te Atua e fa’aru’e i tōna tā’amura’a i te feiā e fa’atupu i te reira huru natira’a ’e ’ōna. »¹⁹ ’E mai tā te peresideni Nelson i parau nehenehe i teie po’ipo’i : « Nā roto i te ha’amo’ara’a o te hiero ’āpī tāta’itahi, e tae mai te hō’ē pūai hanahana hau atu i roto i te ao nei nō te fa’aitoito ia tātou ’e nō te pāto’i i te mau tauto’ora’a pūai a te ’enemi. »²⁰

Tē ’ite ra ānei tātou nō te aha te Fatu i fa’aue i tāna peropheta ’ia ha’afātata atu ā i te mau hiero mo’a ia tātou nei, e ti’a ïa ia tātou ’ia haere pinepine i roto i tōna fare ?

’Ia tomo tātou i roto i te hiero, e ti’amā ïa tātou, nō te hō’ē taime, i te mau mana o teie nei ao ’o tē putuputu i ni’a ia tātou, ’a ha’api’i ai tātou nō ni’a i tā tātou fā i roto i te orara’a ’e te mau hōro’a mure ’ore tei pūpūhia ia tātou nā roto i tō tātou Fa’aora Iesu Mesia.

Te toru o te mana’o : i roto i teie tītaura’a mo’a, e ha’afaufa’a tātou, ma te vai ara, ma te pāruru ’e ma te fa’aherehere, i te hōro’a nō te Vārua maita’i. ’Ua fa’ahiti te peresideni M. Russell Ballard nā mua atu ’e ’o Elder Kevin W. Pearson ina’uanei i te fa’aara peropheta a te peresideni Nelson ’o tā’u e fa’ahiti fa’ahou ā : « I te mau mahana rā i muri nei, e’ita tātou e ora mai i te pae vārua mai te peu ’aita te mana arata’i ’e te fa’atere ’e te tāmāhanahana ’e te tāmau o te Vārua Maita’i. »²¹ E hōro’a tao’a rahi roa teie. E fa’aitoito mau roa tātou i te vai ara i te mau ’ohipa e tupu i te mahana tāta’itahi, ’ia vai noa mai te mana o te Vārua Maita’i ia tātou nei. E māramarama tātou nō tō te ao, ’e ’ia tītauhia rā, e ineine tātou i te mā’iti ’ia fa’a’ite i te hi’ora’a ta’a ’ē i tō vetahi ’ē. ’Ua u’i a’enei te peresideni Dallin H. Oaks i te feiā ’āpī pa’ari : « Tē fa’aitoito ra ānei ’outou ‘’ia vai ta’a ’ē ?’ […] E mea faufa’a [ta’a ’ē] […] te mau mā’itira’a tā ’outou e rave i roto i tō ’outou iho orara’a […] Tē haere ra ānei ’outou i mua ma te fa’aū i te pāto’ira’a a tō te ao nei ? »²²

I roto i te hō’ē a’enei piara’a natirara, ’ua ui au i te mau hoa pipi ’ia fa’a’ite mai i te mau mā’itira’a tā rātou i rave nō te ti’a ta’a ’ē ’eiaha mai tō te ao nei. E hānere pāhonora’a tā’u i fāri’i.²³ Teie te tahi ri’i noa :

Amanda : E utuutu ma’i au i tā mātou fare ’āuri. Tē tāmata nei au i te utuutu i te mau mau ’āuri mai te Mesia te huru.

Rachel : E ta’ata hīmene au i te « opéra », ’e e mea pinepine rātou i te mana’o ē e ’ō’omo noa vau i te ’ahu tā rātou e hōro’a mai, noa atu e ’ere i te ’ahu tano. [Nō te mea ’ua fāri’i au i tō’u ’ōro’a hiero], ’ua parau vau [i tō mātou mau ti’a] ē ’ei ’ahu [tano]. ’Aita rātou i au roa… ’ua fa’atano rā rātou i te ’ahu. E’ita vau e ’aitaui i te mana’o hau nō te ti’ara’a ’ei ’ite nō te Mesia i te mau taime ato’a.

Chriss : E ta’ata inu ’ava vau (’ua ’ore rā), e mea ti’amā nō te hiero ’e e melo ho’i nō te ’Ēkālesia. ’Aita vau e māmū nei nō ni’a i te ma’i fa’atītī tā’u i fa’aruru, ’e nō ni’a i te roa’ara’a tō’u ’itera’a pāpū nō te tāra’ehara [a Iesu Mesia].

Lauren : Tē pāpa’i ra mātou tō’u mau hoa ha’api’ira’a tuarua i te hō’ē hōho’a ’ārearea. I hina’aro ai rātou ’ia hitimahuta te ta’ata māmahu tā’u e ha’uti, ma te tuō haere i te mau parau tuhi. ’Ua onoono noa mai rātou, ’aita rā vau i fāri’i, ’ua tāpe’a noa vau.

Adam : E rave rahi ta’ata ’aita e ti’aturi mai nei ’ia parau atu vau ē, tē ha’apa’o ra vau i te ture nō te vi’ivi’i ’ore, ’e ’aita e hōho’a faufau. ’Aita rātou e ta’a ra i te faufa’a nō te ’oa’oa ’e te mana’o hau o te reira.

Ella : E melo tō’u metua tāne nō te pupu LGBTQ. Tē tāmata noa nei au i te fāri’i i te mana’o o te ta’ata ’a ti’a ato’a ai ’ei ’ite nō te Mesia, ma te ha’apa’o mau i te mea tā’u e ti’aturi.

Andrade : ’Ua fa’aoti au e haere noa i te purera’a i te fa’aotira’a tō’u ’utuāfare e’ita fa’ahou rātou e haere.

’E i te hope’a, ’o Sherry : Tei te hō’ē ’ōro’a mātou, i te fare o te tāvana rahi. ’Ua ha’amata rātou i te ’ōpere i te mau hāpaina tihapēni nō te « manuia ». ’Ua ani atu vau i te pape, noa atu te mau rave ’ohipa i parau ē e ’ohipa fa’a’ino’ino te reira. ’Ua tu’u mātou i te hāpaina i ni’a nō te tāvana rahi, e pape rā tā’u ! ’Aita te tāvana rahi i ’ino’ino ri’i a’e.

’Ua parau te peresideni Nelson : « Tē ora nei ʼoutou i roto i te ao nei, e mea taʼa ʼē rā tā ʼoutou mau ture i tō te ao, nō te tauturu ia ʼoutou ’ia ʼape i te viʼiviʼi o tō te ao nei. »²⁴

Tei te fare ma’i ’o Anastasia, e metua vahine ’āpī nō ’Ūterenia, tē fānau ra i tāna ’aiū tamāroa ’a tūpitahia ai te ’oire nō Kiev i te ’āva’e Fepuare ra. ’Īriti ihora te utuutu ma’i i te ’ūputa ma te parau rū ē : « ’A rave mai i tā ’oe pēpe, ’a vehi i te ’ahu ta’oto ’e ’a haere mai i rāpae i te piha—i teienei ! »

’Ua parau Anastasia i muri mai ē :

« ’Aita vau i mana’o a’e nei ē, tō’u mahana mātāmua ’ei metua vahine, e mea fifi mai te reira […] terā rā […] tē rōtahi nei au i ni’a […] i te mau ha’amaita’ira’a ’e te mau semeio tā’u i ’ite […]

« I teie nei taime […] e au ē e’ita e haere e fa’a’ore i te hapa o rātou i fa’atupu i terā vāvāhira’a rahi ’e te hāmani ’ino […] ’ei pipi rā nā te Mesia, tē vai nei tō’u fa’aro’o ē, e haere iā’u ’ia [fa’a’ore i te hapa] […]

« ’Aita vau i ’ite e aha tē tupu mai ananahi […] ’ua ’ite rā vau ē ’ia ha’apa’o vau i tā’u mau fafaura’a, e ti’a i te Vārua ’ia pārahi noa ia tātou nei […] e ti’a ïa ia tātou ’ia putapū i te ’oa’oa ’e te tīa’ira’a […] noa atu e tau ’ati rahi. »²⁵

Tōʼu mau taeaʼe ʼe mau tuahine, ’ua ha’amaita’ihia vau ’ua fāri’i rahi roa vau i te here o tō tātou Fa’aora Iesu Mesia. ’Ua ’ite au ē tē ora nei ’oia ’e te arata’i nei i tāna ’ohipa mo’a. ’Aita e nava’i tā’u mau parau nō te fa’a’ite i tō’u here nōna.

E mau « tamari’i tātou nō te fafaura’a » tei parare nā te ao nei i roto i te mau fenua ’e te mau ta’ere i ni’a i te mau fenua ra’ituāta’a ato’a, ’ua mirioni ti’ahapa, tē tīa’i ra i te ho’ira’a hanahana o tō tātou Fatu ’e tō tātou Fa’aora. Ma te ’ana’ana atu ’ei māramarama nō te feiā ’ati a’e ia tātou, tē feruri nei tātou ’e te fa’atano nei ho’i i tō tātou mau hia’ai, mau mana’o, mau mā’itira’a ’e mau ’ohipa. Nō te ’imi ma tō tātou ’ā’au ato’a ’ia ’ite ’e ’ia here i te Fa’aora, tē fa’ata’a ’ē nei tātou ia tātou iho i teie nei ao nā roto i te mau fafaura’a i te Atua, e mea ta’a ’ē maita’i ïa tātou, ’e te hi’ora’a mātau ’ore i roto i te ao ’e te ta’a ’ē mau, i te fa’aturara’a iāna ’e tāna mau ha’api’ira’a, ma te ’ore e tāpū ia tātou i te mau ta’ata e ti’aturi ’ē tō rātou.

E tere fa’ahiahia mau te vaira’a e sītona i rotopū i te zīzānia, e mea pe’ape’a i te tahi taime ’e te ’oto, terā rā e noa’a noa mai te hau nā roto i te maura’a pa’ari ’e te tāmarū o tō tātou fa’aro’o. ’Ia vaiiho ’outou i tō ’outou here nō te Fa’aora, ’e i tōna here nō ’outou ’ia puta hōhonu i roto i tō ’outou ’ā’au, tē parau fafau atu nei au i te ti’aturi rahi atu ā, ’e te hau ’e te ’oa’oa i mua i te mau fifi o tō ’outou orara’a. ’E tē parau fafau mai nei te Fa’aora : « [E ha’aputuputu vau] i tō’u mau ta’ata, mai te au i te parabole nō te sītona ’e te zīzānia, ’ia ti’a i te sītona ’ia ha’aputuputuhia i roto i te mau vaira’a, ’ia noa’a te ora mure ’ore, ’e ’ia fa’akoronahia i te hanahana tiretiera. »²⁶ I te i’oa o Iesu Mesia ra, ’āmene.