Avea ma se Tufugaaao o le Atua e ala i le Faamalosia o Lau Molimau Patino e uiga ia Iesu Keriso

Alema 32:27: “Tofotofo i au upu, ma faaaoga sina faatuatua itiiti lava, ioe, afai tou te le mafaia se mea e sili i le manao i le fia faatuatua, ina tuu ia lenei manao e galue i totonu ia te outou.”

Elder Richard G. Scott o le Korama a Aposetolo e Toasefululua: “Ia iloiloina ma le faamaoni lou lava olaga. O le a le malosi o lau molimau? Pe o se mana moni ea o lagolagoina ai lou olaga, pe ua na o se faamoemoe ea e moni mea ua e aoaoina? … O le a faamalosia lau molimau pe a e faaaoga le faatuatua ia Iesu Keriso, i Ana aoaoga, ma Lona mana e le faatuaoia… .

O le a e maua se molimau mamana mai taimi filemu o le tatalo, ma le manatunatu loloto… . E maua mai se molimau malosi i lea fuaiupu ma lea fuaiupu, o lea mataupu ma lea mataupu. E manaomia ai le faatuatua, taimi, usiusitai i taimi uma, ma le naunau e taulagaina” (“O Le Mana o se Molimau Malosi,” Liahona, Ian. 2002, 101–3).

Epikopo Keith B. McMullin, Fesoasoani Lua i le Au Epikopo Pulefaamalumalu: “O le mauaina o se molimau … e le oo mai … e aunoa ma se taumafaiga a le tagata lava ia. E tatau i le tagata ona manao e fia iloa, suesue ina ia iloa, ola ina ia agavaa, ma tatalo ina ia maua. Pe afai e fai i le lotomaualalo ma le faatuatua, o le a oo mai le malamalama, ma o lenei malamalama e oo mai ai foi ma le faamautinoaga matagofie, o le a lelei mea uma faapea ma le malosi i totonu e faia ai ia lelei” (“Iesu, a Mafaufau ia Oe,” Liahona, Me 2004, 33).

Moronae 10:32: “O mai ia ia Keriso, ina ia faaatoatoaina outou e ia, ma ia teena e outou le amioletonu uma; ma alolofa atu i le Atua ma o outou loto atoa, ma o outou manatu, ma lo outou malosi uma, ona lava ai lea lona alofa tunoa mo outou, ina ia atoatoa ai outou ia Keriso i lona alofa tunoa.”

Elder Dallin H. Oaks o le Korama a Aposetolo e Toasefululua: “E le lava … mo i tatou le na ona talitonu i le talalelei; e tatau ona tatou amio a’i ma mafaufau i ai ina ia tatou liua ai. Pe a faatusatusa i faapotopotoga a le lalolagi ia o loo aoaoina ai i tatou ia iloa se mea, o le talalelei a Iesu Keriso o loo luitauina i tatou ina ia avea faapei o se tasi… . Tatou te faia lenei mea e le na ona faia o le mea sao, ae faia mo mafuaaga sao—ma le alofa mama o Keriso… . o le Alofa Mama, ‘o le alofa mama o Keriso’ (Moronae 7:47), e le o se amioga ae o se tuutuuga po o se tulaga o le faatinoina. E atiina ae le alofa mama i faatinoga faifai pea e taunuu ai i le liua. O le alofa mama o se mea lea e mafai ona avea ai se tasi” (“O Le Luitau ia Avea ma se Tasi,” Liahona, Ian. 2001, 40–42).

Anne C. Pingree, fesoasoani lua i le au peresitene aoao o le Aualofa: “E mafai ona tatou fiafia faatasi i le talalelei toefuataina a Iesu Keriso, ma faailoa atu ma le agaga faafetai le faamanuiaga o le i ai o se molimau i le Faaola ma Lana Togiola mo i tatou taitoatasi. Ou te iloa le mea lenei—o a tatou taumafaiga taitasi e avea ma tufugaaao o le Atua, e le faigofie ma e fesoasoani tatou te tuputupu ae ai faaleagaga, e faamauoaina ai a tatou faigamalaga i le olaga nei i ni auala e sili ona patino ma matagofie” (“Iloaina o le Finagalo o le Alii mo Oe,” Liahona, Nov. 2005, 114).