Tasi le Tagata, Tasi le Pakete

I le aso 12 o Iulai, 2004, sa ou ala mai ai pe tusa o le 5:20 i le taeao ma sa ou autilo i fafo o le faamalama e pei ona masani ai. O la foi e ala le leoleo o le faitotoa o lo matou lotoa. Sa i ai se tamaitai o la e faalala lona lima i mata [o le leoleo], a o loo tutu ai isi fafine e 25 e faalagolago i le pa, e tofu le tagata ma le pakete ma isi mau pakete po o pesini e leai ni mea o i ai. Sa topetope le faiga o o’u ofu ma ou alu loa i fafo.

O le aso ananafi na tape ai le vai i Tema—o se nuu e 100,000—ma e tele maila faataamilo. E leai se tasi na i ai ni vai mo le tusa ma le 24 itula, ma sa amata ona tupu le le to’a. Matou te lei iloaina le faafitauli aua o le Nofoaga Autu e Aoao ai Faifeautalai i Ghana, lea sa ou galue ai o se peresitene o le MTC, sa i ai se tane vai tele, ma sa matou pamuina mai le vai mai lena tane i soo se taimi matou te manaomia ai. E ui lava la ina leai se vai fou e faaopoopo i ai, ae na matou ola ai lava i lena tane vai.

E le gata i lea, e i ai lava foi se mafuaaga, sa i ai lava ni vai i le paipa i fafo o lo matou falelotu (i le lotoa lava lea e tasi e leoleoina), ma sa i ai se tagata na faama’iteina i tagata nei o loo i ai vai a Mamona. Sa latou taufai o mai i soo se itu ma a latou pakete e la’u ai vai. Na muamua taunuu le teufale nai lo a’u i le falelotu, ma sa musu e tatala mai se tasi i totonu. Sa talitonu o ia, e le o toe umi ae leai foi ni a matou vai.

Sa ou aamia le leoleo ma le teufale. Sa ou fesili i le teufale pe mata o le a se mea e fai e le Faaola. Sa ou fai atu ia te ia e mafaufau i le lelei po o le leaga o le a tula’i mai i la matou faaiuga. Sa ou fai i ai, atonu o le a uma le vai o le matou paipa, peitai o le a sili atu pe afai e uma i se pakete a se tuaoi o le a mauaina se mataua mulimuli. Sa ioe o ia, ma sa matou tatalaina le faitotoa ma taumafai e fai se faiga faatulagaina lelei o le motu o tagata ua matua faatoateleina, o e sa taufetuli mai ina ia oo mai i totonu. Sa matou talosagaina i latou ina ia faagata a latou vai i le “tasi le tagata, tasi le pakete.” Pe tusa nei ua ta le 6:15. Sa umi le laina, ma ua vaivai foi le malosi o le vai, peitai, sa sua mai pea le paipa.

Sa matou talitonu o le a pe le vai. Sa leai se mea i le taulaga na maua ai se vai. Sa matou fai atu i tagata uma ina ia matou tatalo faatasi e ole atu i le Tama Faalelagi ina ia faaauau pea ona sua lenei paipa ina ia maua ai vai mo nei tagata ua matua galala i le fia feinu. E lei pe lava le paipa. Ma sa matua faafetai tagata.

E i ai se isi mea matagofie na tupu i le taimi o lenei mala. Sa matou siakiina le tane a le MTC, sa afa. Sa matou le mananao e faailoa atu o loo i ai a matou vai na, aua sa matou manatu e tatau ona matou teuina mo faalavelave moni faafuasei, pe afai e umi o faifai pea lenei mala. Peitai, na oo mai i totonu o le lotoa se loli ma ni paelo tetele o i tua. E sau mai le Falemai Tele o Tema. Sa i ai foi sa latou tane vai tele mo faalavelave faafuasei, peitai ua uma, ae o loo i ai a latou ma’i o loo fia feinu. O lea sa matou faataga ai i latou e solomuli mai le latou loli i le tane a le MTC e faatutumu ai a latou paelo mai la matou sapalai faaleoleo. Sa matou fai atu ia te i latou, e toe foi mai pe afai e toe manaomia. O le a matou tufa atu pea seia oo ina uma la matou sapalai. Sa latou fiafia ma faafetai.

Pe tusa o le 3.00 p.m. i lena lava afiafi, sa toe maua ai le vai i le nuu, ma sa fetagofi i latou sa tutu i le laina ia latou pakete ma taufetuli i o latou aiga. Peitai, sa tumau ai pea lagona lelei.