E Matagofie Le Filemu e Aumai e le Malumalu

Mai lava a’o [ma] laiti, sa i ai so ma naunautaiga ina ia faaipoipoina i le malumalu. Sa ma saunia ma tausia i maua lava ia agavaa e ulu atu i totonu o se malumalu paia i se aso. Ina ua ma filifili ma te faaipoipo, sa faapea ona oo mai se faamanuiaga maoae: o se isi ulugalii sa mafai ai ona ma o atu i le Malumalu o Hong Kong Saina, e matuai mamao ese mai o ma aiga i Initoneisia, ma sa faamauina i maua iina i le aso 17 o Fepuari 2004.

Sa ma lagonaina se olioli tele a’o ma tootutuli ai i luma o le fata faitaulaga ma na maua ai se faamautinoaga o lo ma alofa e faavavau, ma o le a avea i maua ma se ulugalii mo le taimi nei ma le faavavau. Ma te faafetai tele mo le mauaina o faamanuiaga o le malumalu. Ma te faafetai tele ona o le mafai ona ma papatiso e fai ma sui o o ma augatama ma mafai ai ona latou maua le faaeega paia ma faamauina o ni aiga e faavavau. E leai se isi lava fiafiaga e mafai ona sui tulaga i le olioli o le faataunuuina o sauniga o le malumalu.

Edi ma Lisa Rochadi, Indonesia

A’o ou nofo i Atenitina, e faalua ona ou malaga atu i le malumalu o Buenos Aires—o le tasi ina ia maua o’u lava faaeega paia ma le isi e faataunuu sauniga mo e ua maliliu. E le mafai e upu ona faamatala ou lagona pe a ou i ai i totonu o le malumalu. O le mea e mafai ona ou tauina atu, o lou lagonaina iina o le mamao mai le lalolagi ma lo’u fiafia pe a ou mafaufau e toe alu atu i le malumalu. E mafai ona ou molimau e uiga i le mafutaga, alofa, ma le mafanafana o le Agaga Paia. Ua ou iloa ma le mautinoa le alofa ua faaalia e lo’u Tama Faalelagi ia te au ma ou tuagane ma uso e ala i le tuuina mai ia i tatou o le talalelei ma perofeta.

Norma Rodríguez, Isaraelu

A’o matou nonofo ma lo’u toalua ma le fanau tama laiti e toalua i San Diego, Kalefonia, na ou maua ai le avanoa matagofie e asiasi atu i le malumalu i vaiaso taitasi. O se tasi taimi, a’o ou auai i sauniga o le malumalu e fai ma sui i se uso ua maliu, na ou lagonaina e pei lava na faatoa ou faia ia sauniga mo le taimi muamua. Sa ou saofai ma o’u mata na atoatoa le pupula, ma faalogologo ma le totoa i mea uma na ou aoaoina. Sa naunau moni lo’u agaga i mea uma na aoaoina. E maofa lava pe a mafaufau atu i faamanuiaga na folafolaina i lenei uso ma ana fanau e ala i sauniga o le malumalu. O lagona o le olioli ma le agaga faafetai na ou maua sa toetoe lava a le mafai ona faamatalaina. Sa ou tagi aliali ai lava. Sa ou manao ou te alaga i le fiafia ma fusi mai tagata uma na ou vaai i ai!

Ina ua ou toe foi atu i le potu e sui ai lavalava, sa ou fusiina se tagata faigaluega lea na faateia ai o ia, ma faamatala atu i ai o’u lagona. Sa ou maofa i le moni o lo’u avea ma se tufugaaao i le aumaia o upumoni e faavavau i se tasi ua maliu.

Ritva Hokkanen, Finelani

Ia Aokuso 2002, na faafuasei ona susu mai Peresitene Gordon B. Hinckley i le Aai o Niu Ioka ma saunoa mai ia i matou e faapea, “O le asō matou te fia faasilasila atu ai o le isi lua tausaga o le a maua ai so outou lava malumalu. Ou te faamoemoe ia ou i ai iinei e vaai i ai.” Na alu aso, ma na tuputupu ae foi o matou faamoemoega. Mulimuli ane, na faasilasilaina ai o le a amataina le fale tatala i le amataga o Me 2004. Sa tusia lo’u igoa i lisi uma mo tagata volenitia na mafai ona ou maua, ma ona sa tauave o’u aso malolo i le galuega, o lea na mafai ai ona ou faigaluega mo ni aso se 11 e aunoa ma le faalavelaveina i le malumalu.

I le avea ai o se tagata e taitaia maimoaga taamilo, na ou lagonaina le Agaga i maimoaga uma lava, ma o le taui aupito sili o le faalogoina lea o finagalo faaalia o tagata asiasi. Ou te manatua se tasi alii puta, sa savali i se tootoo. Ina ua uma le maimoaga, faatasi ai ma le fiafia o ona foliga, sa ia faapea mai, “Ou te le’i mafaufau lava o le a ou maua se nofoaga lea e aumaia ai lena filemu e pei ona ou lagonaina iinei i le aso.” O le fale tatala o le malumalu na aumaia ai le tele o vavega e pei o lenei. Sa ootia ai le tele o loto ma na faaosofia ai le toatele e mafaufau ma lagona le agaga sili ona faapitoa o loo i ai iina.

O se tasi aso sa ou feiloai ai i se tamaitai talavou mai Chile na galue o se faasino ala i le taimi o le fale tatala. Sa fiafia lava o ia ma ofo mai e fesoasoani i soo se mea na manaomia ai o ia. Sa fai mai ia te au, sa i ai o ia i le Iunaite Setete e matamata mo na o ni nai vaiaso, ma e le toe umi ae foi atu i lona atunuu. Na ou fesili i ai pe o le a le umi na avea ai o ia ma se tagata o le Ekalesia, ae na ou te’i i lona faapea mai, e le’i papatiso o ia.

Atonu sa ia matauina lo’u lē magagana, o lea na ia faamatala mai ai lana tala. O le aso lona lua o lana tafaoga, sa ia vaaia ai se faasalalauga i le nusipepa e faasilasila ai le fale tatala o le malumalu. Sa na fia iloa ma tonu loa e asiasi mai. I le taimi o le maimoaga taamilo sa ia lagona ai le ootia tele ona o le matagofie ma le filemu sa ia lagonaina, o lea na le mafai ai ona taofiofi ona loimata. Ina ua mae’a le maimoaga, sa fai atu o ia i faifeautalai e faamatala atili atu ia te ia le Ekalesia. Ina ua uma ona aoaoina o ia, sa faia loa lana faaiuga ina ia papatiso. Sa sau o ia iinei e tafao, ma na saunia e le Alii le ala e faalogo ai o ia i le talalelei. Ma e ui lava ina e le’i avea ma se tagata o le ekalesia i lena taimi, ae sa talosaga lava e galue o se faasino ala mo le fale tatala!

E aunoa ma se masalosalo, e tutupu vavega i totonu o le malumalu, soo se taimi lava e maua ai e se tasi le faaeega paia pe papatisoina e fai ma sui o se tuaa ua maliu po o se ulugalii lalelei e faamauina mo le taimi nei ma le faavavau. Ma a’o lei faapaiaina foi le Malumalu o Manhattan Niu Ioka, ae sa i ai iina le Agaga. I le saunoaga a Peresitene Hinckley: “O se nofoaga lenei o le malamalama, o se nofoaga o le filemu, o se nofoaga o le alofa, lea tatou te taulimaina ai mea o le faavavau.”

Carlos González, Mekisiko