Sa Faamalosiau atu Elder Ballard i le Au Paia ma Faifeautalai i Europa

Sa ta’uina atu talu ai nei e Elder M. Russell Ballard o le Korama a Aposetolo e Toasefululua i tagata o le ekalesia ma faifeautalai i Europa, o loo latou soifua ma galulue faatasi ai ma ni “tagata lelei o loo manaomia ni tulaga taua ma aoaoga o le talalelei, ma afai o le a aoaoina lelei, o le a latou talia ia mea moni.”

I lona silafia ai o nisi o faifeautalai o loo auauna atu i Europa o loo fefefe ona ua latou le mautonu pe maua ni papatisoga, sa folafola atu ai e Elder Ballard e faapea, “Faatasi ai ma le faatuatua ma le lototele, e mafai ona tatou mauaina i latou o le a taliaina le talalelei. E le tatau i se faifeautalai ona alu atu ma se manatu ua uma ona faia, ma o le aoaoina ma le papatisoina ua tea atu lea ma le tulaga e mafai ai… . E tatau ona o atu i le misiona ma talitonuga e mafai ona latou atiina ae le Ekalesia.”

I se asiasiga sa amata i le aso 17 o Aokuso, 2006, sa taitaiina ai e Elder Ballard ni semina faatasi ai ma peresitene o misiona e 50 mai Eria o Europa i Sisifo, Europa i Sasae, ma Europa Ogatotonu, ma luitauina ai le manatu faapea e le mafai ona auai tagata Europa i le Ekalesia. Sa faia semina i Birmingham, i Egelani; St. Petersburg, i Rusia; ma Dresden, i Siamani. Sa faapea foi ona ia lauga atu i le toatele o faifeautalai ma tagata o le ekalesia i ia eria, faapea foi ma isi sauniga mo tagata o le ekalesia i Iukerane, Aremania, ma Suitiselani.

“O tagata o le ekalesia e manaomia le faamasani i faifeautalai faamisiona ma aoao auala e faasoa atu ai le talalelei i nisi tagata,” sa ia saunoa ai. “O tagata o le ekalesia e tatau ona faamalosi atu i faifeautalai e o atu ma le faatuatua, ma le iloa latou te mauaina i latou e faamaoni i o latou loto, e aoao ma papatisoina i latou.”

Sa faatasi atu ma Elder Ballard ia Elder Earl C. Tingey o le Au Peresitene o Fitugafulu ma Elder Jon M. Huntsman Sr., Fitugafulu Eria. O Elder Dennis B. Neuenschwander o le Au Fitugafulu sa faapea foi ona faatasi ai ma Elder Ballard i le Eria o Europa i Sasae.

“O faifeautalai o loo galulue malosi,” sa saunoa mai ai Elder Tingey. “E matua lelei ona aoaoina i latou. O loo aoao ma auauna e pei ona faatonuina ai i le Talai La’u Talalelei. O tagata fou ua latou talia la latou ekalesia, sa faaalia i lo latou faimalaga atu i se mamao tele ina ia auai ia latou sauniga.”

O se tasi o faatumutumuga o le asiasiga o le feiloaiga lea ma le peresitene o Aremania o Robert Kocharian i lona maota i Yerevan. O le peresitene o se uo mamae a Elder Huntsman, o se faigauo sa faafaileleina i le 18 tausaga ua tea ao faia e Elder Huntsman ni foai tetele mo tagata lautele mo le toe fausiaina o le atunuu ina ua maea ona faaleagaina e le mafuie o le 1988, lea sa maliliu ai, manunua, po ua leai ai foi ni fale mo le sili atu ma le tasi vaetolu o le tolu miliona o tagata o le atunuu.

O le asiasiga mo le itula e tasi i le maota o le peresitene sa faapea ona i ai se faalauiloaina lautele e le au tusitala ao faailoa atu e Elder Huntsman i le peresitene fuafuaga ua i ai mo le fausiaina o le falemai mo le kanesa i totonu o le laumua.

O taitai o le Ekalesia, sa talimalo ai le Minisita o le Va i Fafo o Aremania, o Vartan Oskanian, lea sa faafeiloaia i latou i lo latou taunuu atu ai. Sa ia faatasi ai ma Elder Ballard ma isi i le latou asiasiga lea sa i ai, ma se asiasiga i le aai o Gyumri, lea sa faafeiloai ai taitai o le Ekalesia e tamaiti aoga ma faaalia lo latou agaga faafetai mo foai mai ia Elder Huntsman lea sa fesoasoani mo le fausiaina o la latou aoga. Sa asiasi atu foi taitai o le Ekalesia i se nofoaga o ni fale maualuluga e nonofo ai tagata, lea sa fausia ma foaiina atu e le aiga o Huntsman. O Elder Huntsman, o lona atalii o Peter Huntsman, ma se paaga o David Horne sa amataina galuega fesoasoani mo tagata lautele i Aremania i le 1988. O a latou taumafaiga sa fesoasoani i le faailoaina atu o le Ekalesia i le 1994.

E tusa ma le 800 o le 2,000 o tagata o le Ekalesia i totonu o Aremania sa mafai ona auai i le sauniga faatasi ai ma Elder Ballard ma Elder Tingey.

O Elder Neuenschwander, lea sa avea ma Peresitene o le Eria a Europa i Sasae, sa saunoa mai: “O loo lelei le tulaga o le Ekalesia i totonu o Europa i Sasae. O lea faatoa matou faamaeaina ni gaoioiga maoae o le taumafanafana mo le au talavou ma le au talavou matutua nofofua. I le 15 tausaga talu ona faatuina le talalelei i totonu o Europa i Sasae, ua tupu le aofai o tagata e aofia ai le 26 itu ma le siteki.”

O Aremania ua leva ona avea o se atunuu Kerisiano. O tagata o le Ekalesia Orthodox o Aremania e tau atu lo latou tupuaga i Aposetolo o Tataio ma Patolomaio o e sa talaiina le talalelei iina i le tau amataga o le vaitaimi o le Au Kerisiano.

Sa valaaulia e tagata faafaifeau o le Orthodox ia Elder Ballard, Elder Tingey, Elder Neuenschwander, ma Elder Huntsman ma lona atalii e asiasi atu i lo latou nofoaga paia, lea sa taitaiina ai i latou e Father Ktrij Devijian i se maimoaga i le lotoa ma fale, ma faailoa atu ai nisi o faavae ua talitonuina e oo atu i le A.D. 304.

Sii mai le Church News, 16 Set. 2006