Mafaufauga Musuia

“Ou te fia faasoaina atu la’u molimau ia te outou. Ou te iloa o loo soifua le Atua lo tatou Tama e Faavavau, o Ia o le Taitai sili o le atulaulau, ma o i tatou o Ana fanau, ma Na te faafofogaina ma tali mai i talosaga a Lana fanau. Ou te manao ia outou silafia ou te iloa o Iesu o le Keriso, o le Alo o le Atua soifua, ma na Ia tuua Lona aiga tautupu i le lagi ae afio mai i lalo nei i tagata—na itagia ma sauaina e tagata—ma sa Ia femaliuai ma agalelei atu [tagai Galuega 10:38]. Na faasatauroina o Ia ona o le ita o tagata; Na toetu mai o Ia i le aso tolu—o le ‘faapolopolo o e ua momoe’ (1 Korinito 15:20). Ou te manao ina ia outou iloa, na faaali mai le Tama ma le Alo i le taulealea o Iosefa Samita ma taitaia lenei tisipenisione ofoofogia —o le tisipenisione sili i le talafaasolopito i le lalolagi atoa” (sauniga mo tagata o le ekalesia, Seoul, South Korea, 31 Iulai 2005).

“Ou te matuai faafetai lava mo le talalelei a Iesu Keriso, mo se molimau i le Togiola a le Faaola. Ou te talitonu i ai ma lou loto atoa, ma ou te ola ai, ma ou te molimau i lena mea i lenei aso. Mai mea uma ua tutupu i le talafaasolopito o le tagata soifua, e leai se isi lava mea e tutusa lona taua ma le Togiola a le Faaola i lona uiga ma lona taunuuga. Ia faafetaia le Atua mo le meaalofa o Lona Alo pele, o lē tatou te faafetai i ai mo Lana taulaga e fai ma o tatou sui” (sauniga ma tagata o le ekalesia, Copenhagen, Tenimaka 22 Me, 2004).

“O i tatou o se aiga maoae ua fusia faatasi i le alofa ma le faatuatua e tasi. Ua maoae lo tatou faamanuiaga, o se faalapotopotoga ma tagata taitoatasi. Tatou te tauaveina i o tatou loto se tautinoga maumaututu e le faamaluelueina, o le misiona paia a le Alii o Iesu Keriso.

“O Ia o le Ieova sili o le Feagaiga Tuai, o le Foafoa, na faia mea uma lava i lalo o le taitaiga a Lona Tama, ‘ma e leai se mea e tasi na faia e le’i faia e ia’ (Ioane 1:3). O Ia o le Mesia folafolaina, na afio mai ‘ma le faamalologa i Ona apaau’ (Malaki 4:2). O ia o le tagata faivavega, o le fomai sili, o le Toetu ma le Ola. Ua na o Lona suafa i lalo o le lagi, e mafai ai ona faasaoina i tatou [tagai Galuega 4:12]… .

“Na ia afio mai o se meaalofa a Lona Tama Faavavau. ‘Aua ua faapea lava ona alofa mai o le Atua i le lalolagi, ua ia aumai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau’ (Ioane 3:16).

“Na faamaulalo o Ia e tuu Lona afioaga i luga, ae afio ifo i le lalolagi ina ia fanau mai i se fale povi, i se malo toilalo. Na savalia e Ia auala pefua o Palesitina, e faamalolo i e mamai, aoao atu mataupu faavae, ma faamanuia i latou uma e taliaina o Ia… .

“I luga o le mauga o Kalevario, na Ia tuuina atu ai Lona soifua mo i tatou taitoatasi. O le meaalofa sili lena e mafai ona maua e soo se tasi o i tatou. O le meaalofa o le Toetu ma le ola e faavavau [tagai MFF 14:7].

“Tatou te faamamaluina Lona fanau mai. Peitai a aunoa ma Lona maliu, o lena fanau mai ua na o se isi lava foi fanau mai. O le Faaolataga, lea na Ia faataunuuina i le Faatoaga i Ketesemane ma luga o le satauro o Kalevario, lea na avea ai Lana meaalofa ma tino ola pea, ma aofia ai le lalolagi atoa, ma e faavavau. O Lana taulaga o se togiola sili mo agasala a tagata uma. O Ia o le Toetu ma le Ola, ‘o le faapolopolo o e ua momoe’ (1 Korinito 15:20). Ona o Ia, o le a toe faatutuina mai ai tagata uma mai le tuugamau.

“Tatou te alolofa ia te Ia. Tatou te faamamalu ia te Ia. Tatou te faafetai ia te Ia. Tatou te tapuai ia te Ia. Ua Ia faia mo i tatou taitoatasi ma tagata uma, le mea e le mafai e se tasi ona faia. Ia faafetaia le Atua mo le meaalofa o Lona Alo Pele—o lo tatou Faaola, le Togiola o le lalolagi, o le Tamai Mamoe e le pona lea na ofoina atu e fai ma taulaga mo tagata uma” (faigalotu a faifeautalai, Aai o Sate Leki, Iuta, ISA, 15 Tes. 2002).

“Ou te mafaufau i le afiafi nei i le mea maoae na tupu ina ua faamatala e Paulo lona aafiaga i le ala i Tamaseko. Sa ia vaaia se malamalama mai le lagi ma faalogo i se leo na fetalai atu ia te ia. Ma na pau o ia i le eleele ma faapea atu, ‘Le Alii e, o ai ea oe?’

“Ona fetalai mai lea o [Iesu], ‘Tulai ia i luga o ou vae: aua o le mea lea ua faaali ai au ia te oe … ia tofia oe e fai ma auauna ma molimau … ,

“‘E faapupula i o latou mata, ia liliu mai mai le pouliuli i le malamalama, mai le pule foi a Satani ia liliu i le Atua’ (Galuega 26:15–16, 18).

“O lenei, ou te talitonu o lena lava poloaiga na tuuina atu e le Alii ia Paulo e faatatau foi ia i tatou taitoatasi. O Lana fetalaiga, ‘Tulai, ia i luga o ou vae: aua o le mea lea ua faaali ai au ia te oe … ia tofia oe e fai ma auauna ma molimau.’

“Ua tofu outou uma taitoatasi ma se matafaioi o le tulai e fai ma molimau o le upumoni e faavavau o le talalelei a Iesu Keriso. O lau matafaioi o le faapupula o fofoga o isi ‘ia liliu mai mai le pouliuli i le malamalama, mai le pule foi a Satani ia liliu i le Atua’” (sauniga mo tagata o le ekalesia, Nairobi, Kenya, 4 Aok. 2005).

“Ua tatou ola i taimi ua matautia le faigata. Ua tatou fetaiai ma faafitauli e aupito sili ona ogaoga. O nisi o i tatou ua fetaiai ma ma’i, ma faigata o le tamaoaiga, ma le popole ma atugaluga i mea e tele. O lo tatou sulufaiga, o lo tatou filemu, o lo tatou manuia e maua mai i le savavali i le ala a le Alii” (faasalalauga faasatelite o le konafesi faalesiteki a Ausetalia, 12 Fep. 2005).

“Ou te luiina tamā ma tane uma ina ia tagai ua agavaa o ia e aveina atu lana ava ma le fanau i le malumalu. E leai se mea i lenei lalolagi atoa e mafai ona suitulaga ai. O le faamanuiaga aupito maoae lea e mafai ona oo mai i soo se ulugalii. Aua nei tolopoina. Afai e tatau ona e salamo, amata nei loa ma ia agavaa ai e maua se pepa faataga o le malumalu” (sauniga mo tagata o le ekalesia, Santiago, Chile, 11 Mat. 2006).

“Ua amata ona matauina i tatou o ni tagata lelei, o ni tagata o le agalelei, o le alofa ma le naunau e aapa atu ma fesoasoani ma faamanuia i latou uma e siomia i tatou. O loo soisoi mai le lagi ia i tatou, ma e alagatatau ia i tatou uma ona faaali atu le agaga faafetai i le ola lea i se olaga amiotonu ma faia le finagalo o le Alii” (konafesi faalesiteki, St. George, Iuta, ISA, 27 Fep. 2005).

“Ua tatou ola i se lalolagi o le eleelea ma le le mama ma faigata. Ia tulai maualuga ai [le lalolagi], tulai maualuga ae, lafoai ese le lalolagi, ma savali [i le ala] ua finagalo le Alii e te savali ai… .

“E tele naua mea e tatau ona tatou ofoina atu. Tau lava o le mafaufau i mea e mafai ona tatou ofoina atu. E le malamalama isi tagata i le uiga moni o le natura o le Atua. O loo fusia lava i latou i le talitonuga tuai o le Nicene Creed o le seneturi lona fa, lea ou te le malamalama i ai. Ae ua tatou maua se malamalama atoatoa e uiga i le natura o le Atua, lea ua oo mai e ala i le Uluai Faaaliga a le Perofeta o Iosefa. Sa vaai o ia i le Atua. Sa ia faalogo o fetalai mai o Ia. Sa vaai o ia i Lona Alo. Sa ia faalogo o fetalai mai o Ia, ma na mafai ona talanoa atu o ia ia te’i Laua. Sa le fesiligia e lona mafaufau le natura moni o le Atua. O se mea mataina tele lena. Fai mai le mau, ‘O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea’ (Ioane 17:3).

“O se meaalofa maoae ma ofoofogia lena, lea e tatau ona tatou tuuina atu i le lalolagi—o se malamalamaaga moni e uiga i le Atua. O i tatou o Lana fanau. E le afaina pe o a o tatou tagatanuu. E le afaina po o fea na tatou fananau ai. E le afaina pe enaena pe uliuli o tatou lauulu. E le afaina foliga o o tatou mata. O i tatou taitoatasi o se atalii/afafine o le Atua. O Ia o le Atua maoae o le atulaulau, ae o Ia foi o lo tatou Tama, o le e mafai ona tatou o atu i ai i le tatalo. Ua tatou iloa, ua ou iloa, ua e iloa, e faafofoga ma tali mai o Ia i a tatou tatalo… . O se mea matagofie ma ofoofogia tele lena” (sauniga mo tagata o le ekalesia, Vladivostok, Rusia, 31 Iulai 2005).

“O atu ma talai atu le galuega. O le tiute muamua lava na tuuina mai i lenei Ekalesia, e oo foi a’o le’i faavaeina [le Ekalesia], o le tiute o le o atu ma talai atu le talalelei. E le’i aveeseina lava lena tiute. O loo i ai lava ia i tatou talu mai lena taimi” (sauniga a faifeautalai, Columbia, South Carolina, ISA, 20 Nov. 2004).

“E ese le matagofie o le faamanuiaina tele e le [Atua] o lenei tisipenisione mulimuli, o le tisipenisione o le atoaga o taimi, ina ua Ia toefuataiina mai Lana galuega faatasi ma ona mana uma, faatasi ai ma ona mamalu uma ma ona upumoni uma ma le pule uma o tisipenisione uma na i ai muamua i le vaitaimi faaiu ma le maoae lenei… .

“Ou te iloa o loo soifua le Atua o lo tatou Tama Faavavau ma e alofa ia i tatou; o Iesu o Lona Alo Pele, o lo tatou Togiola, o lo tatou Faaola, o lo tatou Alii, o la tatou Uo; o Iosefa Samita o se perofeta; ma e moni lenei Ekalesia; ma o le La galuega lenei ua toefuatai mai i luga o le fogaeleele mo lo tatou manuia ma lo tatou fiafia” (konafesi faarisone, Aai o Sate Leki, Iuta, ISA, 4 Me 2003).

A uma ona e suesue ma le agaga tatalo i lenei savali, ona fetufaai atu lea e faaaoga ai se metotia e uunaia ai le auai o tagata o loo e aoaoina. O ni nai faataitaiga nei:

1. Tuu atu i se tagata o le aiga e faitau leotele se parakalafa se tasi pe lua mai vaega taitasi o vaega muamua e tolu, e uiga i le Faaola. Ia valaaulia tagata o le aiga e faasoa atu o latou lagona e uiga i le Alii, Lana taulaga, ma Lana misiona. Ia faasoa atu foi la oe lava molimau.

2. Ia faasoa atu i tagata o le aiga ni vaega filifilia o loo i ai se lui mai ia Peresitene Hinckley. Tuu atu i tagata o le aiga e faalogologo ma tau mai lui taitasi mai le perofeta. Ia valaaulia le aiga e filifili se lui se tasi e galulue faatasi ai.

3. Faaali atu i le aiga se ata se tasi mai le tusitusiga. Fesili atu i ai pe o le a le mea o loo tupu i le ata, aisea e taua ai, ma o le a foi se mea e mafai ona tatou aoao mai ai. Faitau saunoaga mai ia Peresitene Hinckley e faatatau i le ata. Ia faaiuina i lau molimau.