Lagolagoina o Epikopo Sheets
“Matou te talitonu e ao ina valaauina le tagata e leAtua, i le valoaga, ma le faaee atu o lima, o e o i ai le pule” (Mataupu Faavae o le Faatuatua 1:5).
O i latou uma e mafai ona lagolagoina Brother Rulon T. Sheets o lo tatou epikopo fou, faamolemole faaali mai i le sii o le aao taumatau.”
Sa vave ona sii lo’u lima i luga o le ea. Sa ou fiafia e avea Brother Sheets ma o matou epikopo fou. O lona afafine, o Peti, o sa’u uo. E ui lava e matua o ia i ni nai tausaga, ae masani ona ia valaaulia au i gaoioiga i lona fale. E oo atu Brother Sheets i nei gaoioiga ma toe alu ese, faaali mai ia i matou ni laa o le siva faatasi ma Peti po o le maua foi o lona avanoa i se taaloga matematega. O nisi taimi na te faia ai ni popukoni ma nofo i lalo matou te talanoa mo se taimi.
Sa ou fiafia e lagolagoina Brother Sheets e avea ma o matou epikopo fou. Ao sii i luga lo’u lima i le lotu ma vaavaai solo i le falesa tumu i le tele o lima o loo siiina, sa ou mafaufau po o le a le ituaiga o lagolago e mafai e lo’u lima laitiiti e na o le 11 tausaga le matua ona ofoina atu i lenei tagata maoae.
O le mea muamua lava sa ou faia o le faaaogaina lea o ou lima e faia ai kuki mo lo matou epikopo fou. Sa fai mai lo’u tina e faaaluina e le epikopo le tele o lona taimi i le falesa ma o nisi taimi e misia ai e ia taumafataga i lona aiga, o lea sa matou faia ai ma le fiafia se faaputuga o a matou kuki sili ona manaia. Sa ou saeuina le falaoamata seia oo ina tau lelei. Ina ua saunia kuki, sa ou aveina atu ma le faaeteete i lona fale. Sa matua fiafia o ia, ae sa ou manao ou te fia fesoasoani atili.
I ni nai vaiaso mulimuli ane, sa ou i ai i se gaoioiga i le fale o Peti. Sa ia tuuina au e vaaia le musika. Sa ou faaaogaina ou lima e ki ai le nila o le leitio, ma faalogologo mo se alaleo e talafeagai ni musika. Ona ou kiina lea i lalo o le leo ina ia aua nei leotele. O le fale lenei o le epikopo, ma sa ou manao e fesoasoani ia avea o se nofoaga filemu.
Ina ua amata aoga, sa valaaulia e le aiga o le epikopo se tamaitai latou te le aiga e nofo ia i latou. O le taimi muamua na ou feiloai ai ia te ia sa tuu atu lo’u lima ma faafeiloai ia te ia. Sa ou iloa o le a fesoasoani i le epikopo pe afai e mafai e Carla ona maua nisi uo fou.
A’o mavae atu masina, sa gasegase le epikopo ma sa ia faaaoga se tootoo e fesoasoani ai e savali. Sa fai mai lo’u tina o loo gasegase o ia ma e manaomia e ia a matou tatalo ma le lagolago sili atu.
Ina ua lata mai lo’u aso fanau o lo’u 12 tausaga, sa faia lo’u faatalanoaga e Epikopo Sheets. Sa ma savavali atu ma lo’u tina i le falesa ma taunuu tonu i le taimi na oso ese ai le epikopo mai lana taavale. Sa ia talo mai ma le fiafia ma taumafai e savali atu i le auala savali. Sa ou matauina, e ui lava o le Aso Toonai, ae sa ia laeina se suti ma le fusiua mo lo’u faatalanoaga. Sa ou lagona le faaaloalogiaina.
Ina ua taunuu le epikopo i le sooga o le sima ma le auala, sa malolo ai ma ona foliga popole. Sa ou iloa ua vaivai o ia e laa i luga. Sa ou tamoe atu ia te ia.
“Tago mai i lo’u lima,” sa ou fai atu ai. “E mafai ona ou fesoasoani atu ia te oe.”
Ma le agaga faafetai, sa ia uumau i lo’u lima ma faatu mai o ia i luga. Ona ou tamoe lea i luma ma tatala mai faitotoa mamafa o le falesa.
“Sa tatau ona ou faia lena mea mo oe,” sa ia fai mai lemu ai. “Faafetai lava.”
Sa nofo ifo o ia i lona nofoa i totonu o lona ofisa ma mapuea. Ona fai mai lea ia te au e fai se tatalo. Sa ou piilima ma le faaaloalo, ma e ui ou te lei taua le epikopo i lau tatalo, ae i lo’u loto sa ou tau atu i lo’u Tama Faalelagi ia faamanuia ma faamalosi ia te ia.
Ina ua uma le tatalo, na foliga mai le epikopo i ona foliga masani. Sa nofo sao o ia i luga i lona nofoa, ma sa i ai se malamalama i ona fofoga. I le faaiuga o le faatalanoaga sa ia tuuina mai ia te au se faatalofa malosi, lea sa ou toe tuuina atu foi ma le fiafia.
A’o ma savavali atu ma lo’u tina i le fale mai lo’u faatalanoaga, sa ou mafaufau e uiga i le tele o lo’u alofa ia Epikopo Sheets, ma sa ou iloa sa valaauina o ia e le Atua. Sa ou faafetai e ui ina laiti ou lima, sa mafai lava ona ou maua ni auala e fesoasoani ma lagolago ai lo’u epikopo alofagia.
“O tofiga o le epikopo ma le peresitene o le paranesi ma fesoasoani e paia i lenei Ekalesia. O alii ua umia nei tofiga e faaaloalogia e le Alii… . Tatou te faamamalu ma alolofa ia te i latou, ma tatou te faaalia lea i lo tatou manatu mo i latou.”
Elder Dallin H. Oaks o le Korama a Aposetolo e Toasefululua, “Epikopo, Fesoasoani Mai!” Liahona, Iulai 1997, 27.