O Le Pusaaisa a Mama

Ou te le manatua na ou vaai o tagi lo’u tama i le taimi o le maliu o lo’u tina po o se isi lava taimi i nai ona aso mulimuli. Na foliga mai o ia le tagata na nafa ma le faamafanafanaina o isi tagata uma. Ae o se tasi po ina ua uma le falelauasiga, na ou vaaia ai lo’u tama o tagi i luma o le matou pusaaisa tuai, a’o ia vaavaai atu i mea uma na tuu ai iina e Mama. Na lilofia le pusaaisa i mea faamanatu o le olaga o lo’u tina.

Ina ua faaipoipo o’u matua, sa la faataua se pusaaisa na faaaoga muamua. O lea na manatu ai lo’u tina e vali le pusaaisa i se vali lanu samasama e ese lava, lea ou te le’i vaai muamua lava i ai i se isi pusaaisa. (Sa i’u lava foi ina vali atu ai ma le fola o le fale, ma nisi meafale, ma se ofu fou lava.) Ae na pau le taimi na faatoa matou iloa ai le lanu samasama ese, o le taimi na leaga ai le pusaaisa, lea na aveese ai e Mama mea uma na i ai, ina ia tuu i ai se totoga fou.

Na natia lona lanu ona sa faalilofia e tina i soo se ituaiga mea: o se ata komi malie mai le nusipepa, o se muagagana lauiloa, o le ata o tama, o mau e taulotoina, o le pepa mai le fale tata lavalava, o se faasalalauga o se oloa, o se tusi e tatau ona tali, o se fua o se kuka, o le lisi o le faatauga, o le lisi o telefoni a tagata o le uarota, e oo lava i o matou lipoti o le aoga. A’o faasolo ina matou matutua, sa ia tuuina i luga lisi o matou tofiga faalevaiaso, fuafuaga faatulagaina, ma savali mo le aiga. Sa le i ai sa matou laupapa tusitusi i le sioka, po o se laupapa puletini, o lea na faapipii ai foi e o matou matua ata o le talalelei i luga o le pusaaisa.

A oo ia Fepuari, e tuu e tina se fatu lapoa lava ua tusi uma ai o matou igoa; o Mati, o le ata o lana faaipoipoga ma se lisi o nisi o mea e manao i ai mo lona aso fanau. O Iuni e ofo alofa atu ai ia Tama, aua o le masina lena o lona aso fanau—na te faia lava faapena i masina na matou fananau ai. O Setema, na faaalia ai se fu’a a Mekisiko. O Novema, o le masina lea e manatua ai e o’u matua o la’ua augatuaa, e faapipii ai e Mama ni ata o e pele, ma maua ai se avanoa e talanoa ai e uiga ia i latou. O Tesema, na te faapipiina ai se vaaiga itiiti o le soifuaga [o Iesu Keriso] lea sa ia fatuina i ni fasiieie.

O taimi uma lava matou te o ese taitoatasi atu ai i se misiona, e faapipii e Mama se ata o le faifeautalai i luga o le pusaaisa ma e le aveesea lava seia oo ina matou toe foi mai. Ina ua maliu le tuagane e toatasi o Mama, sa ia faapipiiina i luga o le pusaaisa se la ata ma e le’i toe aveesea lava. Na te le ‘i taua lava foi, ae o le vaaia o ia o mafaufau loloto i lena ata, na matou iloa ai le pele tele o lona tuagane ia te ia.

Sa galulue faatasi le pusaaisa ma lo’u tina i le tuufaatasia o lo matou aiga.

O le taimi nei i lo’u lava aiga, o loo i ai se pusaaisa, e ui ina e fou ma e le lanu samasama ese foi, ua aoaoina foi lona tiute o le tuufaatasia ma le aoaoina o le aiga. O le ata tuai o le faaipoipoga a o’u matua, o le isi o se olomatua o lo’u aiga, ma ata tusi e leai ni foliga na faia e lau fanau laiti, o loo pipii ai iina. Ma a ou vaai i nei mea faitino, ou te manatuaina lo’u tina ma faafetai ia te ia mo lona aoaoina o au ia ou malamalama i le auala e mafai ai e se pusaaisa ona fafagaina [i matou] i ni auala se tele nai lo le na o le faamaluluina o meaai.