O Taiala e Sefulu e Taitaiina ai Lou Olaga

E le o le faafitauli e taulia, ae pe faapefea ona e foia lena faafitauli.

Se’i iloilo mo sina minute e faapea, o oe o le inisinia o se nofoa afi. A’o alu atu le taavale i luga o le ala, sa e tilotilo atu i fafo i le faamalama. I se mamao sa e vaai atu ai i se faaputuga otaota tele o loo poloka ai lou auala. O le a le mea e te faia? Valaau atu i luma mo se fesoasoani? Taofi le nofoa afi ma foia le faafitauli e oe lava? Sasaa le koale i le afi ma sua atu i le faaputuga?

O le tulaga masani tatou te fetaiai uma lava ma faafitauli i o tatou olaga. O faafitauli faaletino e ono mafai ona atiina ae ai e faavavau. O le mea lea e tatau ai ona tatou filifili pe faapefea ona faafetaiaia na faafitauli.

E pei o le inisinia, e mafai ona tatou valaau mo se fesoasoani. O le tatalo, anapogi, ma le suesue punouai, e mafai ai ona tatou maua le fesoasoani a lo tatou Tama Faalelagi. E na te faamafanafana ia i tatou, faamalosi ia i tatou, ma faamalamalama i tatou e Lona Agaga Paia. E masani ona Ia tuuina mai ia i tatou fautuaga musuia e ala mai i matua ma taitai perisitua. O nisi taimi Na te faaleleia le ala i le aveeseina lea o faafitauli. O nisi taimi, e pei o se tagata e sui auala, e fesoasoani o Ia ia i tatou e suia o tatou ala. Ae mai lea taimi i lea taimi, pau le auala e aveeseina ai le otaota mai le ala o le taofi lea o le nofoa afi ma aveese le faafitauli.

E moni lava lenei mea pe afai o le faafitauli e mafua ia i tatou lava, e pei o lo tatou solia o poloaiga a le Alii. O le salamo ona pau lea o le auala e faamama ai le otaota o agasala ma agai i luma i o tatou olaga. “Tou te iloa faapea se ua salamo i ana agasala—faauta, na te tautau atu ma lafoai” (MFF 58:43).

I le faaiuga, e i ai taimi e faatonu ai i tatou e le Tama Faalelagi e sasaa le koale faaleagaga o le faatuatua ma le faamoemoe ma sua atu agai i luma. Po o le faaaogaina o le fuaitau faaletusitusiga paia “fetaomi atu i luma”:

“O le mea lea e tatau ai ona outou fetaomi atu i luma ma le faamaoni ia Keriso, ina ia i ai le faamoemoe atoatoa lelei, i le ma le alofa atu i le Atua atoa ma tagata uma. O lea afai tou te fetaomi atu i luma, o fiafia i le afioga a Keriso, ma tumau lava e oo i le iuga, faauta, o loo faapea ona fetalai mai le Tama: Tou te maua le ola e faavavau” (2 Nifae 31:20).

Tulimatai au sini ma lou agaga atoa, manatu, mafaufau, ma le malosi. O le a e toilalo pe afai e te tulimataiina au sini i se auala le mautonu.

O le tele o taimi tatou te faaleogolua ma le agai atu ai i luma ma le talitonuga mausali. Tatou te tau tagotago i le agai atu i le ala, e pei o loo tatou fefefe i le pogisa. E sili le lelei le kiina o le moli o le faatuatua ma agai i luma ma le malosi ma le naunautai.

Afai e sese lo tatou auala, o le a vave lava ona tatou iloaina ma faia ni fetuunaiga tatau ai. Ae a tatou tulimatai se auala faaleogolua ma le le mautonu, o le a faigata ona iloa pe sao pe sese i le taimi e toe faasao ai.

Na fetalai mai le Alii, “Ou te loto ina ia e maalili pe vevela” (Faaaliga 3:15).

E tatau ona tatou filifili nei e faia a tatou faaiuga ma le agaga tatalo ona tatou agai lea i luma ma le faatuatua, malosi, ma le naunautai.

O se aloiafi itiiti e maua ai se afi tele.

I le i ai i le ala agai i luma, o se mea masani le tutupu o ni feeseeseaiga laiti mai isi tagata. O le le malamalama, feeseeseai o manatu, ma le eseese o uiga faaalia ma aga e mafai ona amata ai se feteenaiga. Ia manatua, afai tatou te le faaeteete, o mea laiti e faigofie ona avea ma mea tetele.

Filifili nei e tapeina aloiafi o feteenaiga i le mafaufau lelei lea i isi. E pei ona aoao mai le Alii, “Ia vave ona oulua lelei ma le ua tagi i ana mea ua ia te oe, manu o i le ala oulua ma ia” (3 Nifae 12:25).

Aua le faitio. O se mea e te taua e uiga i isi e mafai (ma e masani lava ona taunuu) ona toe oo atu ia i latou. Vaai i le lelei i tagata, ma atiina ae lena lelei i lau faauoga le maluelue, taliaina, faamaoni, faatuatuaina, ma le alofa.

O o tatou malosiaga sili e mafai ona avea ma o tatou vaivaiga sili.

Atonu e i ai lou tomai ma le saunia lelei i nisi o vaega o lou olaga, ae o lena foi tulaga e mafai ona avea ma vaivaiga sili pe afai ua na o nei agavaa e te faalagolago i ai. Afai e te le faaeteete, o le tomai ua e mauaina e mafai ona avea ma auaunaga faaletagata pe a le paleni lelei, ma e ono avea ma tulaga e muta.

Mo se faataitaiga, afai e le mafai ona outou galulue faatasi ma isi tagata, o le a e toilalo. E tatau nei ona e faaaogaina le poto ua e maua e faamalosi ai le Ekalesia, lou aiga, lau galuega, le afioaga, ma au faigauo.

O o tatou malosiaga sili e mafai ona avea ma vaivaiga ia i tatou i soo se taimi tatou te faagaloina ai o a tatou meaalofa, taleni, ma le atamai ua tuuina mai ia i tatou e le Atua—soo se taimi tatou te faalagolago ai i le “tagata o le lalolagi” (Mosaea 3:19) ma faagaloina le Atua o le e tuuina mai meaalofa uma o le olaga. Afai tatou te taofia o tatou malosiaga mai le liua o ni vaivaiga, e tatau ona tatou “tautino … lana pule i mea uma, ma le usiusitai … i ana poloaiga” (MFF 59:21).

O le toilalo o se tasi o faiaoga sili pe afai e i ai lo tatou faatuatua e aoao mai ai.

Sa fetalai mai le Faaola, “E maua foi outou e le puapuaga i le lalolagi.” Ae talu ai ua Ia manumalo mai le lalolagi e mafai ona tatou “loto tetele” (Ioane 16:33)—e mafai ona tatou manumalo mai o tatou toilalo. O le mea lea e tatau ona tatou opogi le avanoa e aoao mai ia tatou mea sese, iloilo po o fea sa tatau ona lelei ai la tatou galue, ma faia ni fuafuaga mo le faaleleia.

I le faia ai o na mea, tatou te iloa ai o popolega ma ni tulaga le fiafia ua na “o sina ituaso itiiti” ma “e mo lo [tatou] lelei” (MFF 122:4, 7). Ma le faatuatua, e mafai ona tatou faamamafaina le fautuaga a le Alii ina “sailiili ia ma le filiga, tatalo e le aunoa, ma ia talitonu lava foi, ona galulue faatasi ai lea o mea uma mo lo outou lelei” (MFF 90:24).

E le o le auala e te amata ai le tuuga po o fea foi ua e i ai a’o alu le tuuga. Ae taua le auala e te kolosiina ai le laina tini.

O John Stephen Akhwari, o se tagata tamoe malafoni mai Tanzania, sa tauva i le Olimipeka o le Taumafanafana i le 1968. E ui sa tigaina o ia i le alu i luga o le ala i le vaivai, oso o maso o vae, leai se vai i le tino, ma le le mautonu, ae sa valaau mai pea se leo i totonu ina ia faaauau pea, ma sa ia alu atu pea. I le vaivai ma le tautevateva, sa avea ai John Stephen ma tagata mulimuli e oo atu i totonu o fale taalo. Ina ua fesiligia pe aisea sa ia faamae’a ai se tuuga e le mafai lava ona ia manumalo ai. Sa tali mai Akhwari, “E le’i aumaia au e lo’u atunuu i le 7,000 maila [11,200 km] e amataina le tuuga; sa latou auina mai au i le 7,000 maila ina ia faaiuina le tuuga.”

I le olaga, e lei aumaia i tatou i le lalolagi e na ona fananau mai i le tino. Sa tatou o mai ma se misiona ma se faamoemoega, ma o lena misiona ma faamoemoega o lo tatou tumau lea seia oo i le iuga.

Manatua le faataoto i le au faigaluega i le tovine. O i latou uma sa auauna i le Matai, ma o i latou uma sa maua totogi tutusa. Sa le taua le mulimuli taunuu o isi nai lo isi, ae sa taua lo latou oo uma mai. (Tagai Mataio 20:1–16.)

Afai sa i ai sou faaletonu i lou talavou, aua nei manumalo le faavaivai ia te oe. O le faamasinoga a le Alii e le o se tulaga faaleagaga e averesi le togiina—i le avea lea o agasala ua mavae ma mea sese e faaopoopo mo le togi faaiu. Sa Ia folafola mai “o le ua salamo i ana agasala, e faamagaloina o ia, ma o au le Alii, ou te le toe manatua lava” (MFF 58:42).

O le mea lea, afai e te le i oo i le mea e te manao e oo i ai, filifili nei loa e oo i ai.

O le iloiloina o lo tatou olaga o le a togia lea i le lelei ona tatou ola ai i feagaiga sa faia ia tatou sauniga o le faaolataga—papatisoga, mauaina o le Agaga Paia, mulumuluga, faauuga, faaeega, ma le faamauga.

E mafai ona e kolosiina le tini faatasi ma isi tagata uma lava.

“Ia agai i luma a e aua le solomuli. Ia loto toa, … ma ia agai atu, agai atu pea i le manumalo!” (MFF 128:22).

“Afai e te manao ia e maumea, ia faasao mea e te maua. E mafai e se tagata faavalevalea ona maua ni tupe; ae o se tagata poto na te faasao ma faaaoga mea i lona lava faitalia.”¹

E mo lo tatou lava lelei le atiina ae o le fiafia moni i o tatou olaga. Na aoao mai le Perofeta o Iosefa Samita o lenei “fiafia o le autu ma le faatulagaga lea o lo tatou ola ai.”² Ae paga lea, o loo tatou ola i se vaitau o le manao tele—le faamalieina, manaoga saisaitia mo mea faalelalolagi.

Ia manatua, o le faalelalolagi o lona uiga “e le tumau.” Ma o mea e le tumau e le aumaia ai se fiafia faavavau.

O lea ia tagai i luma. Ia silasila mamao. Ia onosai. Totogi au sefuluai ma taulaga. Ma faaputu au tupe. Aua e te taumafai e te mauaina i le taimi nei mea sa fia tausaga o sefesefe ai ma le onosai ou matua ina ia maua.

E fiafia i latou taitoatasi e mafai ona ola e tusa ai ma mea latou te maua i le aso ma fiafia ai.

E le mafai ona e aoao i le finagalo o le Alii e aunoa ma le faatinoina o lou saolotoga ma faia lou lava tiute mo au filifiliga

E tele taimi tatou te manatu ai e laititi pe leai foi se taumafaiga tatou te faia, ae o le Agaga Paia o le a tuuina mai tali ia tatou fesili. E pei o Oliva Kaotui, tatou te ave le “leai o se mafaufau i ai ae na o le ole” (MFF 9:7). Ma le faanoanoa, o nisi taimi tatou te le tatalo foi.

Ae e le o le auala lenei a le Alii. Sa Ia poloaiina i tatou e “filifili maea ai i [o tatou] mafaufau; [ma] afai … ole [ia te Ia] pe ua sao” (MFF 9:8; faaopoopo le faamamafa).

Mo se faataitaiga, pe a filifili se soa e faavavau, tatou te le tuuina atu se lisi o igoa i le Alii ma fai atu ia te Ia e filifili. Ae o lea, tatou te faaaogaina lo tatou saolotoga e ala i le auai i tafaoga faamasani. Tatou te taumafai ia iloa uiga i totonu o le isi tagata ma lana amio i fafo. Ona tatou faia lea o se faaiuga ma tuuina atu i le Alii.

I lenei auala, ua tatou talia ai lava a tatou faaiuga ma le matafaioi o le tatalo ina ia foia ni luitau e ono tutupu mai.

O le tele o mea e suia, o le tele foi lea o lo tatou tumau ai i le mea e tasi.

I le 1975 sa ou lauga ai i tamaiti aoga o le Iunivesite o Polika Iaga. Sa sii i luga lo’u lima agavale ma faapea atu, “Ua tatou i ai iinei.” Ona, aveese atu lea o lo’u lima taumatau mai lo’u lima agavale, ma ou fai atu, “Ua alu atu mamao ma mamao ese lava le lalolagi.” I lena taimi, sa ou mafaufau ai o auala a le lalolagi ua selau ma selau maila le mamao ese mai auala o le talalelei. Ona, toe faasino lea i lo’u lima agavale, ma ou faapea atu, “Ae o loo i ai lava iinei le Ekalesia.”

Ua toe itiiti 32 tausaga talu ai. O le taimi nei, ua maoae le mamao ese atu o le lalolagi mai lo lena. Mai i lo’u iloa, ou te faapea atu ua afe ma afe maila le mamao—masalo e mamao tele—ae, toe faapea atu, e le o minoi lava le Ekalesia.

I le avea ai o se tagata o lena Ekalesia, e tatau ona e iloa e ese oe mai au uo i le lalolagi. E tatau ona e iloa o le a faateleina le va. Ae aua e te faanoanoa. O i latou e i ai mata e vaai ai o le a iloa oe o se malamalama i luga o le mauga, ma o le a latou o mai mai le pouliuli o nei aso mulimuli e faatasi ma oe ma fiafia i lou malamalama.

O le malumalu o le Atua o se iunivesite silisili.

O le malamalama o mea moni o le talalelei toefuataiina a Iesu Keriso o le malamalama aupito taua lea o le a e mauaina.

Alu i le malumalu. O le faaeega paia o le mataupu e faavavau. O iina ua aoaoina ai i tatou i le mea na tatou o mai ai ma le mafuaaga ua tatou i ai iinei i le lalolagi, ma ua tuuina mai ai foi le folafolaga o le mauaina o le ola e faavavau i le malo selesitila pe a tatou usiusitai i poloaiga ma feagaiga.

I le i ai o nei taiala e 10 i le mafaufau, ou te manao e tuuina atu lau molimau ia te outou ma tuuina atu ia te outou se folafolaga. I le taumafai ai e avea ma se atalii po o se afafine faamanuiaina o le Atua, e le mafai ona e fetuutuunaia mea o le malo. Po o fea o i ai lau misiona mamalu tofia, e le mafai ona faasalaina oe i lou soifua ai i le talalelei. Ae peitai, a e fetuutuunaia mataupu faavae e faavavau a le Atua mo ou lava manaoga faalelalolagi, o le a aveesea faamanuiaga faavavau sa faasino tonu mo oe.

I le avea ai ma se tama Niu Ioka, sa ou ola a’e o se tasi o le na o le toalua po o le toatolu o tagata o le Ekalesia i se aoga maualuga e i ai le faitauafe o tamaiti. I se faatasiga talu ai nei mo le 50 tausaga, sa manatua e au uo sa i ai lo’u ola ai e tusa ma au tautinoga ma talitonuga. Sa ou iloa ai iina o sina sese e tasi o le Upu o le Poto po o se solitulafono o le ola mama o lona uiga e le mafai ona ou fai atu, “O le mea lenei ou te talitonu i ai” ma faatuatuaina e au uo.

E mafai foi ona tatou faasoa atu le talalelei i le mea e gata ai lo tatou ola ai. I lou olaga i kolisi, i le militeli foi o se fesoasoani i le taitai au ma se pailate tau, i aoga mo faailoga, po o lau galuega i fefaatauaiga ma le maketiina, o se peresitene o se vaega o tagata, po o se sui peresitene o se vaega i le ofisa autu—e lei manaomia lava le fetuutuunaiina o a’u tautinoga po o talitonuga.

Pe sa faigofie?

Ou te le iloa. Ou te le’i saili mo le faigofie.

Pe sa faigata?

Ou te lei saili foi mo le faigata. Ona pau lava o le mea ua i ai.

Pe sa i ai ni alii ma ni tamaitai sa luitauina au i ou talitonuga i ni taimi?

O lea lava.

Pe a ou taofimau i ou talitonuga, pe sa latou faaaloalo ma faamamalu i le tautinoga sa ou faia ia ola ai i le talalelei?

I tulaga uma.

Afai e te manatua po o ai oe ma amio e tusa ai; afai e te foi mai ma le faamamaluina mai valaauga uma, gaoioiga, ma tofiga; afai e te faamaoni i le suafa o le Faaola ma agavaa mo ana faamanuiaga faavavau, o le a i ai pea ia te oe le malamalama o le Agaga Paia e faatasi ma oe, e taitai ia te oe, ma faatonu oe, ma siitia oe. O le a e le manao lava po o le a le mea e tatau ona tau atu ae pe faapefea foi ona faatino. O le a tuuina atu ia te oe.

O le auala e te ola ai, o mea e te faaalia, o le auala e te tausia ai au paaga, ma le auala e te faamamalu ma tausi ai lau soa ma lou aiga, o le a sosolo atu ai le aafiaga o lo tatou Faaola o Iesu Keriso. Aua e leai se isi auaunaga Faakerisiano i lo le faapei o Ia, talia le fautuaga a Lona Agaga Paia, ma faia Lona finagalo.

A’o faagasolo tausaga, o le a e mauaina nisi taiala e faaalia ai ou lava aafiaga i le ola ai i le talalelei. Aoao i ai ma ola ai i lou olaga e tusa ai.

Ia faamanuia le Alii ia te outou ma tausi ia te outou ina ia outou maua se olaga lelei, ia avea outou ma e ua outou mananao ia avea ai, ma faataunuuina nei a outou miti, ma foi atu ma le mamalu i le faavavau.

Mai le lauga o le faauuga sa tuuina atu i le aso 14 o Aukuso 2003, i le Iunivesite o Polika Iaga.