O Se Malamalama Paia

Ata

I nai tausaga ua mavae atu, sa tofia ai Constance o se tamaitai aoga faatausimai e fesoasoani i se tamaitai sa manua lona vae i se faalavelave. Sa teena e le tamaitai se fesoasoaniga faafomai ona o le fefe. O le taimi muamua na asiasi atu ai Constance, sa faatonuina o ia e le tamaitai o loo manua e alu i fafo. I le taumafaiga lona lua, sa ia faatagaina ai Constance i totonu. O le taimi lea na matuai lilofia le vae o le tamaitai i putaputa, ma ua i ai nisi vaega o le aano ua pala. Ae sa le manao lava e togafitia o ia.

Sa avea lea mea ma se tatalo ia Constance, ma pe tusa ma se aso pe lua ae oo mai le tali. Sa ia aveina se vaimanua i le isi ana asiasiga. Talu ai ona e le tiga, sa faatagaina loa e le tamaitai matua lenei e faaaoga i lona vae. Ona la talatalanoa lea i nisi togafitiga sili atu i le falemai. Sa faamautinoa atu i ai e Constance o le a avea lona nofo i le falemai ma se mea sili ona manaia. Pe tusa ma le tasi pe lua aso ae maua e le tamaitai le lototele e alu atu ai i le falemai.

Ina ua asiasi atu Constance ia te ia, sa ataata le tamaitai ma faapea atu, “Ua e faatalitonuina au.” Sa le’i mafaufauina lona fesili atu ia Constance, “O le a le lotu e te auai ai?” Sa tau atu e Constance ia te ia, o ia o se tagata o le Ekalesia a Iesu Keriso o le Au Paia o Aso e Gata Ai. Sa faapea atu le tamaitai: “Na ou iloaina lava. Na ou iloaina na auina mai oe ia te au i le aso muamua lava na ou vaai ai ia te oe. Sa i ai se malamalama i ou foliga lea sa ou matauina foi i isi o la outou ekalesia. Sa ou talitonuina oe.”

Sa matuai pe lelei lena vae na papala ina ua mavae le tolu masina. Na toe faaleleia le fale o le tamaitai matua lenei e tagata o le uarota lea sa nofo ai ma toe teuteu lona fanua. Sa feiloai o ia ma faifeautalai, ma e le’i umi ae paptisoina o ia. Na mafua uma nei mea ona sa ia iloaina le malamalama i foliga o lena tamaitai tausimai.

O le auaunaga i lenei Ekalesia e aumai ai le malamalama i o tatou mata. Na fesili Alema pe ua tatou maua ea foliga o le Faaola i o tatou mata po o foliga (tagai Alema 5:14). E oo mai le malamalama paia i o tatou mata ma foliga pe a tatou maua se sootaga patino ma lo tatou Tama Faalelagi alofa ma Lona Alo, lo tatou Faaola ma le Togiola.

Mai lauga o le konafesi aoao ia Oketopa 2005