Faaaloalogia o le Malumalu

O malumalu o maota ia o le Alii. O le mea moni, o loo tusia i luga o malumalu uma ia upu, “O Le Maota o le Alii, E Paia i le Alii.” O nofoaga aupito paia ia mo tapuaiga i luga o le fogaeleele. Ona o le paia o le malumalu ma ona o le paia o galuega o loo faataunuuina ai, o lea o i latou uma o e auai atu i le malumalu e tatau ona mama ma agavaa. I se faaaliga i le Perofeta o Iosefa Samita, na folafola mai ai e le Faaola:

“Afai foi e atiina ae ia te a’u e lo’u nuu se fale i le igoa o le Alii, ma le faatagaina se mea eleelea e oo atu i ai, … o le a i ai i lea mea lo’u mamalu;

“Ioe, ou te i ai foi iina, aua ou te oo atu i ai, o e loto mama uma foi o e oo mai i ai o le a vaaia le Atua” (MFF 97:15–16).

O lona uiga ea la o i latou uma o e o atu i le malumalu o le a vaai i le Atua? Na faamalamalama mai e Elder David B. Haight (1906–2004) o le Korama a Aposetolo e Toasefululua e faapea:

“E moni lava o nisi ua vaai tino i le Faaola, peitai a tagai i le lomifefiloi, o le a silafia ai e tele uiga o le upu vaai, e pei o le iloa o Ia, malamalama ia te Ia, iloa o Ia ma Lana galuega, silafia o Lona taua, po o le malamalama ia te Ia.

“O na malamalama ma faamanuiaga faalelagi e avanoa ia i tatou uma.”¹

Na saunoa Louis Groenewald, o le peresitene o le malumalu a Johannesburg, e faapea e mafai ona faamoemoe le autalavou a le Ekalesia e aoao mai ni mea se tele e uiga i le Faaola ma ni mea se tele e uiga ia i latou lava i totonu o nei maota paia. Fai mai a ia, “O le malumalu e le gata ina maua ai se avanoa paia e fai ai galuega mo e ua maliliu, ae e fesoasoani foi i le sauniaina o le tatou autalavou e maua ni olaga atoatoa i lenei olaga ma le olaga a sau.” O faamanuiaga mai le auauna atu i totonu o le malumalu e tele naua.

Muamua, fai mai a Peresitene Groenewald, a’o auai atu le autalavou i le malumalu, o le a latou maua le avanoa e latalata atili atu ai i lo latou Tama oi le Lagi ma le Faaola i totonu o Lona maota. O le uiga lena o le saunoaga a Elder Haight ina ua ia taua o le malumalu o se nofoaga e iloa ai le Alii.

Lona lua, o le avanoa e auauna atu ai ma le le faatuaoia. Fai mai Peresitene Groenewald o lenei ituaiga o auaunaga “o le faavae o le alofa mama ma le Agaga o Keriso.” Sa faaauau lana saunoaga i lona faapea mai: “E faamoemoe lava o le a maua e le autalavou ni aafiaga se tele o le o mai e fai papatisoga mo e ua maliliu, ma o le a iu ina latou oo atu ai i le mauaina o o latou lava faaeega paia ma le avanoa paia o faamauga. O nei sauniga e oo atu ai i faamanuiaga e le mafaitaulia i le faavavau.”

O sauniga o le malumalu o le faamanuiaga silisili lona tolu lea na taua e Peresitene Groenewald: “A aunoa ma nei sauniga e le mafai ona tatou maua se atoatoaga o le olaga po o le faaeaga.” O le faaeega paia ma le faaipoipoga faaselesitila o le lua ia o nei sauniga. O le faaeega paia e aofia ai ni aoaoga e i ai folafolaga po o tautinoga tatou te faia, ia ola amiotonu ma mulimuli i aoaoga a le Faaola. O le faaipoipoga faaselesitila o le sauniga lea i le malumalu e faamauina faatasi ai se tane ma le ava ma le la fanau mo le faavavau.

Ma lona fa, “o le malumalu e tuufaatasia ai mea uma lava,” o le saunoaga lea a Peresitene Groenewald. Na ia saunoa, o mea uma lava ua aoaoina ai le autalavou i totonu o le Ekalesia, e toe faamamafaina ma aumaia faatasi i totonu o le malumalu. Ma o na aoaoga uma e faavae i le Togiola a Iesu Keriso ma le ata o le faaolataga. I totonu o le malumalu, “e avea ai le talalelei o se aafiaga atoa ma tele e tasi.”

“O le maota lenei o le Alii, o lea e tatau ai ona tatou faaalia le faaaloalo ma ia fifilemu,” o le tala lea a Vincent Maiete, 17 tausaga, o le Uarota a Ridgeway. Na sau Vincent i le malumalu i le taeao po lava faatasi ma isi talavou mai lana uarota, e aofia ai Roxanne Cockrell, Jimmy Plaatjies, ma Kyle Zeeman.

Fai mai Roxanne, 14 tausaga, “O la’u filifiliga ia ou sau i le malumalu ae le o le moe.” Ae o le alapo sa matuai talafeagai lava. Ua fiafia o ia ua latou filifili faatasi ma ana uo e faataunuu papatisoga mo e ua maliliu. “Sa ou fesoasoani i tagata. O se aafiaga manaia tele.”

Sa tilotilo solo Kyle, 17 tausaga, i le lotoa matagofie o le malumalu. Sa fai si susu teisi o mea uma ina ua uma le timu i le vaveao. “O loo i ai se toafilemu iinei lea e te le lagonaina i se isi lava mea,” o lana tala lea. “O nisi taimi e ao ai ona e faia ni osigataulaga laiti e te sau ai iinei, ae e manaia le sau. Ou te fia faaipoipo i totonu o le malumalu.”

“O le i ai o se malumalu iinei i Aferika i Saute e matuai aoga tele,” o le tala lea a Jimmy, 20 tausaga. “Ua mafai ona matou faia nei sauniga faapitoa, o le papatiso mo tagata o o matou aiga ua maliliu. O se faamanuiaga tele mo i matou. E ese le malosi o le Agaga, aemaise lava, pe a e i ai i totonu o le malumalu. E tusa lava foi pe e te i fafo, e te lagonaina lava le filemu.”

O Palesa Mqokozo, 14 tausaga, o le Paranesi a Ennerdale, o taimi uma lava e laeiina ai ona laei e sili ona lelei pe a sau i le malumalu. “E fai faapenei o’u lavalava ona o lo’u faaaloalo i lo tatou Tama Faalelagi,” o lana tala mai lea. E ia te ia lena faaaloalo ona o le lagona na te mauaina pe a sau i le malumalu. “A e ulu atu i le maota o le Alii, e te le lagonaina se faaosoosoga ma e te iloaina e sa’o mea uma iinei. E te le sese lava.”

Na ataata Peresitene Groenewald ma faapea mai, “E fai lelei laei o le autalavou pe a o mai i le malumalu. O a laei talafeagai? O lou laei aupito sili ona lelei e fai i le Aso Sa.” O laei lava e te ofuina i le sauniga faamanatuga. “E tatau ona mama o latou laei, ia talafeagai mo le Aso Sa, o o latou laei e sili ona lelei o loo i ai,” o lana saunoaga lea. “O le tulaga faatonuina lena.”

O Henry Mkhonza, 18 tausaga, e sau foi mai le Paranesi a Ennerdale, na tutu ma piilima ao talanoa o ia e uiga i le malumalu. E foliga foi Henry o se faifeautalai—o se valaauga ua leva ona ia sauniuni i ai. “O le faaaloalo o le mea lena e vaaia e tagata—o le faiga o ou lavalava, o au amioga. E atagia tele ai po o ai oe,” o lana tala lea. “Afai e te le faaaloalo i le faiga o ou lavalava, e te le tau ta’uina atu lava. E mafai lava ona iloa mai e tagata le mea e taua atu ia te oe.”

“E i ai se taua o le faiga o o tatou lavalava,” o le faaopoopo mai lea a Stephanie Madhav, 16 tausaga, o le Paranesi a Ennerdale, “aua e matuai matagofie tele le malumalu. O le maota o le Alii, ma o lea e fai ai o tatou lavalava e pei lava o loo tatou i ai i le afioaga o le Alii.”

O le mea ua malamalama i ai nei tagata talavou, o le fai faalelei o lavalava ma foliga vaaia, e faaalia ai lo latou faaaloalo ma le migao. “E avea ai o se faatusa o se tofi maoae,” na saunoa ai Peresitene Groenewald. “Mo se faataitaiga, e le faatatau i le ofutino paepae; ae o le mea moni e faatatau i le faatusa o le mama. O i latou o e le i ai se malamalamaaga manino, latou te vaaia le faatusa o se mea taua, nai lo le mea o loo suitulaga ai le faatusa. O se ofutino paepae o se faatusa o le mama. E le o le tulaga o se ituaiga [laei] po o se sitaili; o se tulaga faaalia i fafo e faapea i lou loto ma lou mafaufau ou te manao e mulimuli i perofeta soifua.”

O le filemu i le loto ma le mafaufau, o le olioli mai le auaunaga, o le lagona mautinoa o le tagata lava ia, ua manino mai i foliga o nei alii ma tamaitai talavou mai Johannesburg. Ona ua latou maua se lagona mautinoa o le natura paia o le malumalu ma faamanuiaga o loo maua ai i nei maota paia, o i latou o ni faataitaiga o le amiotonu i isi.

O faamanuiaga o le malumalu o loo iloga i olaga o le autalavou i Aferika i Saute, e pei lava ona folafola atu e Peresitene Groenewald. “Ua atiina ae e le autalavou se lagona o lo latou usoga filifilia,” o lana saunoaga lea. “Ua sili atu lo latou lotototoa e o atu ma faia le galuega a le Alii. O lenei lagona o le a faatasi ma i latou i taimi lelei ma taimi faalelelei. Ioe, i le malumalu, e saunia ai e le Alii le autalavou mo o latou lumanai.”

Ata

“Ia faaaoga tatau le avanoa e papatiso ai e fai ma sui o e ua maliliu. Ma ia avea lena avanoa paia ma se taula i o outou olaga, ma ia faapea ona pulea outou lava i taimi uma ma tulaga uma e oo mai, pe a oo mai le taimi e tatau ai, e maua ai se kata fai aitalafu ma le Alii, o le pepa faataga lea i Lona Maota paia, o iina e maua ai faamanuiaga ma avanoa taua uma.”

Peresitene Gordon B. Hinckley, “Tausia o le Malumalu ia Paia,” Liahona, Iulai 1990, 67.