Te riroraa ei mauhaa i roto i te rima o te atua no te atuatu i te feia vĕvĕ e te nava’i ore

Elder Russell M. Nelson no te Pŭpŭ no te Tino Ahuru ma Piti Aposetolo : « Te haape‘ape‘a nei to tatou Metua i te Ao ra no te [feia vĕvĕ e te nava’i ore]. E mau tamarii ana‘e ratou paatoa na’na… Te feia vĕvĕ—te mau vahine ivi ihoa ra, te mau otare, e te taata ê—e mana‘ona‘oraa maoro teie na te Atua e te feia parau-ti‘a… Ua fafauhia te mau haamaitairaa i te feia tei atuatu i te feia vĕvĕ » (« In the Lord’s Own Way », Ensign, Me 1986, 25).

Mataio 25:37–40 : « Ei reira te feia parau-ti‘a ra e na ô a‘e ai te parau ia’na, E te Fatu, i nafea matou i ite ai ia oe i te poiaraa, e ua faaamu ia oe ? e te poihâraa, e ua faainu atu ia oe ?

« I nafea matou i te ite atu ai ia oe, e e taata ê, e ua ite atu ia oe ? e te veveraa, e ua faaahu ia oe ?

« I nafea matou i ite atu ai ia oe i te poheraa i te ma’i, e i roto i te tapearaa, e ua haere atu ia oe ra ?

« E na ô a‘e te arii i te parau ia ratou, na ô a‘era, Oia mau ta‘u e parau atu ia outou nei, O outou i na reira i te hoê taeae iti haihai roa i roto i tau mau taeae nei, ua na reira mai ïa outou ia‘u ».

Mosia 4:26 : « Ia horo‘a outou i ta outou tao‘a na te mau taata veve, o te taata atoa i tei au i ta’na ra faufaa, i te faaamuraa i tei poia, e te faaahuraa i tei tahaa noa ra, e ia utuutu i tei ma’ihia, e ia poihere ia ratou i te pae varua e i te pae tino hoi, mai te au i to ratou ra hinaaro ».

Elder Henry B. Eyring no te Pŭpŭ no te Tino Ahuru ma Piti Aposetolo : « Eita ïa vau e hi‘o faahou i te hahaereraa utuafare aore râ te tuahine haahaere ei mau faanahoraa ana‘e… Ua riro taua huru ohipa ra ei ravea, e ere râ te hoê hopoi‘a… Ua fafau te mau melo atoa i te hoê fafauraa ia rave i te mau ohipa hamani maitai mai ta te Faaora i rave. No reira e ere te mau piiraa atoa no te faaite i te parau e no te atuatu ia vetahi ê ei titauraa ia rave hau atu i te mea i titauhia ; e haamaitairaa râ tei faataahia e te hoê Metua here i te Ao ra e Ta’na Tamaiti, o Iesu Mesia… Ua riro te mau piiraa atoa ei taime no te faaite eaha te mau haamaitairaa o te tahe mai na roto i te riroraa ei nunaa fafauhia, e ua riro te piiraa tata‘itahi ei ravea o ta outou e farii tatou ia riro ei tiaau » (« Witnesses for God », Ensign, Novema 1996, 31).

Te Episekopo H. David Burton, Episekopo Faatere : « Ua haapii te peropheta Iosepha Semita e e hopoi‘a na tatou ‘ia faaamu i tei poia, ia faaahu i tei tahaa noa, ia utuutu i te vahine ivi, ia tamaro i te roimata o te otare, ia tamahanahana i tei roohia i te ati, i roto anei i teie ekalesia aore râ i roto i te tahi ê atu ekalesia, aore râ aore roa e ekalesia, i te mau vahi e ite oia ia ratou’ (Times and Seasons, 15 no Mati 1842, 732). Ia horo‘a noa tatou i to tatou taime e i ta tatou mau ô no te atuatu i tei mauiui » (« Go, and Do Thou Likewise », Ensign, Me 1997, 77).

Bonnie D. Parkin, Peresideni Rahi no te Sotaiete Tauturu : « Te Fare Toa a te Fatu—i reira ‘ua navai e ua toe mai’—o te mea ïa [ei tapa‘o] ta te Fatu i roto ia tatou tata‘itahi (PH&PF 104:17). Te Fare Toa a te Fatu o te hoê ïa vahine o te tauturu i te tahi ê atu vahine. O te hoê ïa tuahine o te faaroo aore râ o te paraparau i te hoê tuahine o te faaea ona ana‘e ra. O te hoê tuahine o te faatupu i te hoê hoaraa piri e te tuahine ta’na e hahaere nei. O outou ïa e o vau nei ma to tatou mau puai, to tatou mau aravihi, e to tatou mau taleni o te haamaitai i te oraraa o te tahi ê atu tuahine » (« Welfare, the Crowning Principle of a Christian Life », BYU Women’s Conference, 1 no Me 2003, 3).