Te vai nei i ni‘a i te DVD Te Mau Fafauraa a te Hoê Mamoe e a te Hoê Tia‘i Mamoe

I muri mai e pae matahiti o to’na pata-noa-raa-hia i roto i te Fare Haamana‘oraa ia Iosepha Semita i Roto Miti, Utaha, e i raro a‘e i te arata‘iraa a te Peresideniraa Matamua, ua faarahihia e ua tuuhia teie hoho‘a Te Mau Fafauraa a te Hoê Mamoe e a te Hoê Tia‘i Mamoe i ni‘a i te DVD e e roaa i roto i te mau vahi hooraa buka a te Ekalesia.

Te Mau Fafauraa a te Hoê Mamoe e a te Hoê Tia‘i Mamoe e hoho‘a aamu teie no te misioni a te Mesia i rotopu i te feia o Iseraela i tahito ra e o To’na fâraa’tu i Amerika i tahito ra, mai teie faati‘ahia i roto e piti na fafauraa : te Bibilia e te Buka a Moromona. Ua apee-atoa-hia e te faahoho‘araa o te utuafare o Helamana a ite ai ratou i te mau tapa‘o e te taeraa mai o te Faaora i te fenua Amerika.

I to teie hoho‘a faaite matamua-raa-hia, teie te tatararaa a Elder Neil L. Andersen no te Hitu Ahuru, « Te tumu o teie nei hoho‘a o te faaiteraa ïa e o Iesu te Tamaiti a te Atua, ‘te maramarama e te ora o teie nei ao’, e no te faaite i te mau hopearaa temeio o te Faaora i ni‘a i te oraraa o te feia o te ti‘aturi Ia’na ».

Ua hau i te piti matahiti to teie hoho‘a taviriraahia e ua titauhia te mau maimiraa rarahi i roto i te mau iho tumu tahito o te fenua Amerika. Ua tavirihia teie hoho‘a i Utaha, Kalifonia e i Hawaii i ni‘a e 57 tahua, e te tahua aano a‘e mai te hoê ïa tahua faahororaa popo. E 48 taata hauti matamua, 52 feia faahoho‘a e hau atu i te 1.000 feia tei ravehia no te faahoho‘a i te huiraatira o tei faaora i teie aamu. Na te Pŭpŭ Upa no Temple Square e te Pŭpŭ Himene o te Fare Menemene i hopoi mai i te pehe.

Ua tuuhia e e roaa teie nei hoho‘a 65 minuti te maoro i ni‘a i te DVD i roto i te mau reo rau i roto i te mau fare hooraa buka a te Ekalesia i te ao atoa nei i roto 18 reo (Marite, Tinito, Tanemateta, Peretane, Finelani, Farani, Purutia, Italia, Tapone, Korea, Tinito Manadarin, Norevetia, Potutara, Rusia, Paniola, Tuete e Ukraine).