Te piiraa e aita e tatararaa
Mahana Maa, 7 no Febuare 2004, tei roto ta‘u vahine faaipoipo e o vau nei i te hoê hotera i Gijon i te tuhaa apatoerau no te fenua Paniora, i reira vau i te taviniraa ei peresideni no te Misioni Spain Bilbao. I te otiraa matou i te tamaa i taua pô ra, ua hi‘o vau i ta‘u niuniu afa‘ifa‘i no te mau parau poro‘i ta‘u i ore i faaroo. Ua faaite mai te reira e ua niuniu mai te hoê misionare. Ua ite vau e o vai tei niuniu mai e ua taumi au i te pitopito no te pii atu ia’na.
Ua pahono mai te misionare i te niuniu, e i muri a‘e i te tahi parau aroharaa poto, ua ani au ia’na eaha ta’na e hinaaro nei. Ua maere oia e ua pahono oia e aita oia i niuniu mai ia‘u.Ua parau onoono atu vau e ua haruharu ta‘u nei niuniu i te hoê piiraa na’na, ua tapiti râ oia i te parau mai e aita oia i niuniu mai.
Ua hope ta maua paraparauraa, e pae minuti râ i muri iho ua niuniu mai oia ia‘u e ua parau mai, « E te Peresideni, te vai nei to‘u hoê fifi eita roa vau e maitai i te reira, e te hepohepo nei au no te reira. Ua pure au e ua ani i te Fatu i te tautururaa no te ite eaha te mea e ti‘a ia‘u ia rave. Aita vau i hinaaro roa i te niuniu atu ia oe, ua ani râ vau i te Fatu eaha te mea e rave, ua niuniu mai oe. Ua maere roa vau no te mea aita vau i niuniu atu ia oe. Ua ite au e te parau mai nei te Fatu e e ti‘a ia‘u ia paraparau ia oe i te reira ihoa taime ».
Ua paraparau maoro maua e ua tatarahia to’na ra fifi.
I to‘u paraparauraa’tu ia’na e piti mahana i muri mai, ua ani faahou vau i te misionare mai te mea ua niuniu mai oia ia‘u. Ua pahono mai oia, « Aita roa e te Peresideni, o te ohipa tera a te Fatu ». Ua hi‘o oia e aita anei ta’na niuniu i faaite e ua niuniu oia i ta‘u nei numera, noa’tu e mea hape noa’tu.
Ua parau te Fatu, « Ia vai haehaa noa oe ; e na te Fatu to oe Atua e aratai ia oe na to oe rima ra, e e horo‘a’tu ia oe te pahonoraa i ta oe mau pure » (PH&PF 112:10). Ua parau o Alama i te haapiiraa i ta’na tamaiti o Helamana, « E ui atu i te Fatu i te mau mea atoa ta oe e rave ra, e na’na hoi oe e aratai i te maitai » (Alama 37:37). E ti‘a ia tatou ia rave i te mea ta to tatou Metua i te Ao ra e hinaaro ia ite tatou i te hau ta tatou e hinaaro tamau nei. E mea papû roa ua riro taua piiraa aita e tatararaa ei hoê pahonoraa i te pure a te hoê misionare apî.