Te haapiiraa i te ture a te Atua

Teie ïa te ahururaa o te taamu » pii a‘era te metua tane o David ia’na. « A aratai atu te mau puaahorofenua i te vahi teitei a‘e ».

Ua hi‘o atura te taure‘are‘a o David O. McKay i tera’tu pae o te aua i te vahi ta to’na metua tane i toro atu i te rima. Na taamu e iva matamua e ere ïa i te matie maitai. Ua ite o David eaha ta to’na metua tane e parau ra no teie ahururaa o te taamu o te matie maitai a‘e o te ti‘a ia afa‘ihia’tu i te fare toa a te episekopo ei tuhaa ahuru na ratou. Aita râ oia i taa no teaha eita e nehenehe ia ratou ia horo‘a i te Fatu i te hoê matie ta ratou e ohi ra.

Ua tuo atura o David i to’na ra metua tane, « Aita, e rave ana‘e i te matie ia tae mai ana‘e ».

Aita te metua tane o David i pahono. Ua fatata o David i te tapiti i te parau ia’na iho a ite ai oia i to’na metua tane i te huriraa e te haamataraa i te haere ti‘a’tu ia’na. Ua ore ta‘ue noa te mata‘i mârû na ni‘a i te aua matie, e ua ve‘ave‘a roa te mahana. Ua tamaro o David i te hou i ni‘a i to’na rae e te tua o to’na a’i. Ua ite oia e aita to’na metua tane e haere na roto i te aua no te horo‘a i te tairiiri i ni‘a i to’na tua no ta’na pahonoraa iria. Ua haere mai ra oia no te haapapû e ua taa ia David i te tahi mea.

« Aita, e David ». Ua parau etaeta mai to’na metua tane, na te hau i roto i to’na reo i haapa‘o maitai ai o David i te parau e parauhia ra. « Teie te ahururaa o te taamu, te mea maitai ana‘e e nava’i ai te maitai na te Atua ». Ua piri a‘era te mata o te metua tane o David i te hoho‘a mata a ta’na tamaiti no te haapapû e te faaroo ra oia. I muri fariu a‘era oia e haere ê atura.

Ua horomii ihora David i to’na haama i roto i to’na arapoa e aratai ihora ta’na mau puaahorofenua i te vahi teitei a‘e. A huri ai oia i te matie tei tapuhia i roto i te pereoo, ua haamata oia i te feruri i te mea ta to’na metua tane e tamata ra i te haapii ia’na. Ua ite oia e e ture te tuhaa ahuru, mai te haapa‘oraa i te faaueraa e te tusia, ua hinaaro râ o David ia tuu i to ratou iho hinaaro na mua roa. Ua parau râ te Atua ia rave i te mau fanaua matamua no te nănă-te mea maitai roa‘e—e ia pûpû atu te reira Ia’na ra (a hi‘o Deuteronomi 12:6).

« Ua horo‘a to‘u metua tane i te mea maitai roa‘e i te Atua, e tei ia matou te mea maitai roa‘e i muri iho » feruri a‘era o David. « Penei a‘e teie te huru e faariro ai tatou i te Fatu ei haapûraa no to tatou mau mana‘o e to tatou mau oraraa ».

Te vai nei te mau taime a hi‘o ai David i to’na metua vahine i te aufauraa i te moni no te tuhaa ahuru. Aita oia i haamau‘a no te mea ta’na e hinaaro nei e ma te ti‘aturi i muri iho e toe mai te tahi moni no te tuhaa ahuru, ua hapono oioi oia i te moni tuhaa ahuru i te episekopo e e faanava’i oia e te moni e toe mai. Ua horo‘ahia i te mau taime atoa te mea matamua e te mea maitai a‘e na te Atua.

Ua taviri ihora o David i te pereoo fauta matie i ni‘a i te poromu repo no te haere atu i te fare toa a te episekopo. Ua faatere atu oia i te pereoo i roto i te aua e ua huri ihora te matie. Ua hau roa‘tu te anaana o te matie i taua taime ra. Ua riro te reira ei tusia no ta’na metua tane ia horo‘a i ta’na matie maitai roa‘e i te Fatu, mai te Metua i te Ao ra i horo‘a i Ta’na Tamaiti maitai roa no te ao nei.

A faahuri ai o David i ta’na mau puaahorofenua no te ho‘i atu i te fare, ua tae mai te hoê mana‘o maitai i roto ia’na. Ua oaoa oia e ua haapii to’na metua tane ia’na i te ture no te tuhaa ahuru. E haapiiraa tera e e haamana‘o noa oia i te taatoaraa o tooraraa.

Iritihia mai roto mai i Te mau Haapiiraa a te mau Peresideni no te Ekalesia : David O. McKay (2003), xv. Ua tavini te Peresideni McKay ei ivaraa o te Peresideni no te Ekalesia, mai te matahiti 1951 e tae atu i te matahiti 1970.

Hōho’a

« Te aufauraa i te tuhaa ahuru e faaiteraa ïa e te farii nei tatou i te ture no te tusia. E faaineine atoa te reira ia tatou no te ture no te haamo‘araa e te tahi atu mau ture teitei no te basileia tiretiera ».

Elder Dallin H. Oaks no te Pŭpŭ no te Tino Ahuru ma Piti Aposetolo, « Tuhaa Ahuru », Ensign, Me 1994, 34.