Taime horo‘araa
Te ora nei Oia !
« I aroha mai te Atua i to te ao nei, e au tae roa i te horo‘a mai i ta’na Tamaiti fanau tahi, ia ore ia pohe te faaroo ia’na ra, ia roaa râ te ora mure ore » (Ioane 3:16).
Te haapii ra te tuahine Nielson i te piha haapiiraa Hihi Mahana. Ua faaite oia i te hoê hoho‘a no Iesu e faaite ra i To’na mau puta i muri a‘e i to’na ra ti‘a-faahou-raa.
Ua ani o Heather « Te parau nei oe e ua ora faahou Oia i muri i To’na poheraa ? »
Ua tuo a‘era o Jake, « E, Ua na reira Oia ! E ora faahou tatou atoa ! »
Nahea to Jake e toru matahiti iteraa e ua ora faahou o Iesu ? Nahea oia i ite ai e e ora faahou atoa oia.
I te mau hebedoma atoa ua faaroo Jake i te mau haapiiraa a te tuahine Nielson. Ua haapii oia no ni‘a ia Iesu e ua faaite i to’na iteraa papû. Ua faaroo o Jake i to’na na metua i roto i te pureraa pô utuafare e i te tahi atu mau taime. Ua haapii ratou no ni‘a ia Iesu e ua faaite i to ratou iteraa papû no ni‘a Ia’na. Na te ite i roto i te aau o Jake i parau ia’na ia ti‘aturi i te mau parau a to’na ra orometua haapii e to’na ra mau metua.
I muri a‘e i to Iesu ti‘a-faahou-raa, ua faaite Oia Ia’na iho i ta’na ra mau pĭpĭ. Aita o Toma ia ratou ra. Ua parau te tahi atu mau pĭpĭ ia Toma e ua ite mata’tu ratou ia Iesu. Ua parau râ o Toma, « I ore au i ite i te puta auri i tana rima ra, e aore ra i tuu i tau rima i taua puta auri ra, e aore hoi tau rima i tuu i tana aoao ra, e ore roa ïa vau e faaroo » (Ioane 20:25).
E vau mahana i muri mai ua faaite o Iesu Ia’na iho ia Toma. Ua vaiiho Iesu ia Toma ia ite i te mau puta naero i roto i to’na rima e ia fafa i To’na ra aoao. I muri iho ua parau atu Iesu, « No te mea te hi‘o mai nei oe ia‘u, e Toma, i faaroo ai oe : e ao to te feia aore i ite ia‘u a faaroo mai ai » (Ioane 20:29).
Mai ia Jake, e nehenehe ta tatou e ti‘aturi ia Iesu noa’tu e aita tatou i ite Ia’na. E tupu ïa to tatou faaroo i te rahi ia ite tatou, ma te ite ore, e o Iesu to tatou Faaora.
Ohipa faaoaoaraa
A tapiri i te api H4 i ni‘a i te papier meumeu, e a paoti mai i te mau hoho‘a no Iesu, Maria Magadala, te mau Aposetolo, e Toma. A tufetu te mau tapearaa na ni‘a i te reni topatapata ia nehenehe i te mau taata ia vai ti‘a noa. A faaite i to outou utuafare te aamu i roto i te Ioane 20 no te taata tata‘itahi tei ite i te Faaora i muri a‘e i To’na ra ti‘a-faahou-raa.
Te mau mana‘o no te taime faaiteiteraa
-
1. A faaiteite e toru afata tiaa. Hoê e hoê, a rave mai i rapae e hoê pea tiaa i roto i te afata tata‘itahi. (E nehenehe atoa ta outou e faaiteite i te mau hoho‘a aore râ e mau hoho‘a peni o te mau tiaa. A faaite i te hoê pea tiaapuiti no te faahoho‘a i te mau faehau tei ti‘a’i i te menema o Iesu. A faaite i te aamu e nehenehe ai i te mau tamarii ia feruri e tei reira ratou a vaiihohia’i o Iesu Mesia i roto i te menema. I muri iho, a faaohipa i te hoê pea tiaa tamaa no te faaite i te aamu no Maria Magadala. A ani i te mau tamarii eaha râ te mana‘o ahani tei te menema ratou a fâ mai ai te Faaora tei ti‘afaahou mai. I te pae hopea, a faaiteite i te hoê pea tiaa ta te mau tamarii e oomo noa nei. A ani eaha te mana‘o no te riroraa ei melo no te Ekalesia e ia ite e e ti‘afaahou outou na roto i te Taraehara e te Ti‘a-faahou-raa o Iesu Mesia. A faaite e ua pohe e ua ti‘afaahou mai o Iesu Mesia.
-
2. A faaite i te mau tamarii e e ani outou ia ratou i te hoê uiraa ma te pahonora maere. A ui, « E fea rahiraa peropheta ta tatou i ni‘a i te fenua nei i teie mahana ? » A faaite e e turuhia te melo tata‘itahi no te Peresideniraa Matamua e te Pŭpŭ no te Tino Ahuru ma Piti Aposetolo ei peropheta, ei hi‘o e ei heheu parau. Oia hoi te vai nei e 15 peropheta ta tatou i ni‘a i te fenua nei ! A haamaramarama râ e te Peresideni ana‘e o te Ekalesia te taata o te nehenehe e farii i te heheuraa no te taatoaraa o te Ekalesia. Hoê hebedoma na mua‘e i te amuiraa rahi, a ani i te tahi mau tamarii paari a‘e ia faaite mai i te parau i roto i te area e piti hebedoma i mua no ni‘a i te hoê parau poro‘i ta te hoê Aposetolo i horo‘a i te amuiraa rahi. Mai te mea e nehenehe, a faaiteite i te hoê hoho‘a no taua Aposetolo a faaite mai ai te tamarii tata‘itahi i te parau poro‘i.