Te pehepehe

I to‘u tamarii-rii-raa, ua ite au i te hoê pehepehe i ni‘a i te hoê api tei tumotuhia mai roto mai i te hoê buka iti ta te hoê taata i tumahae e tei faarue i te pae poromu. Ua paari au i roto i te mau fare faaearaa mâmâ a te hau e e taata vau aita e hoa, e te vai ra ta‘u e toru vahi ia fiu ana‘e au : te mau buka, te mau hoho‘a teata a Elvis Presley, e te mau pehepehe papa’i. E mea au roa na‘u te pehepehe papa’i. E haaputapû te reira i te hoê tuhaa i roto ia‘u aita vau i matau maitai. E au ra e aita e parau no te faaite i te reira. No to‘u hinaaro i te ite eaha ra te pehepehe, ua ohi au i te reira e ua afa‘i atu i te fare.

Ua tai‘o vau i taua pehepehe ra i te mau mahana atoa, e i te tahi mau taime e rave rahi mau taime i te mahana, i roto i te mau matahiti i muri mai. Ma te parahiraa anei i roto i te piha haapiiraa, te haereraa anei na roto i te mau vahi haereraa taata mai tera piha i tera’tu piha haapiiraa, te faaearaa anei o vau ana‘e i te mau taime hautiraa, e ite ïa vau i te tahi mau tuhaa no taua pehepehe ra o te tae mai i to‘u nei feruriraa. Aita vau i tamau aau noa‘e i te hoê pehepehe na mua’tu, e mea taa ê râ teie. Te vai nei te tahi mea i roto ia’na o te paraparau nei ia‘u e te haaputapû nei i to‘u nei aau.

Ua ite noa vau e e mea huru ê au i te tahi atu mau tamarii. Ua ite au i te tahi mau taime e te vai nei te tahi ê atu utuafare i te tahi atu vahi, e e mai te mea e tamata mau vau, e nehenehe ia‘u ia haamana‘o i te reira. Te faaitoito nei teie pehepehe i teie mau mana‘o. I te tahi taime e rave mai au i te reira mai te afata ume e e tai‘o vau i te reira. Ua uiui vau e fea ra taata mai ia‘u te huru i te ao nei e mai te mea e farerei anei au i te hoê o ratou.

A feruri na i to‘u maere e rave rahi mau matahiti i muri mai a parahi ai au, ei taata e imi ra i te parau mau, i roto i ta‘u pureraa oro‘a matamua, e a iriti ai au i te buka himene i te api faaitehia mai e a ite ai au i te pehepehe ta‘u i ite i taua mau matahiti atoa i mairi. E mea taa ê rii te huru himeneraa i te huru ta‘u i himene noa na ia‘u iho ia ore ana‘e e nehenehe ta‘u e taoto aore râ ia ara ana‘e au i te maororaa pô ma te ta‘i, ua ite atoa vau i te mau nota tei ta‘i mai roto mai i te piana.

A himene noa’i te mau taata atoa « To‘u Metua » (Te mau Himene, no. 178), ua nehenehe noa ia‘u ia parahi e ia heva, ma te iteraa e ua tuu mai te Atua i taua pehe ra i ni‘a i to‘u haerea i to‘u tamarii-rii-raa.

A parahi ai au i roto i taua pureraa oro‘a ra, ma te faarooraa i ta‘u nei pehe e himenehia ra e te amuiraa, ua ite au e tei ni‘a au i te e‘a afaro. Ua ite au e te mea ta te mau misionare e haapii ra e mea mau ïa. Ua ite au e te Ekalesia a Iesu Mesia i te Feia Mo‘a i te mau Mahana Hopea nei o te Ekalesia ana‘e ra a te Atua i ni‘a i te fenua nei. No reira a tuturi ai e a ani ai au i te Atua mai te mea e mea ti‘a te reira i mua Ia’na e ia bapetizohia vau e ia haamauhia vau i roto i te Ekalesia, aita vau i maere a riro ai te pahonoraa e e.

I muri a‘e e toru hebedoma haapiiraa na Elder Walker e Elder Whittaker, ua taumi o Elder Walker ia‘u i roto i te pape no te bapetizoraa. Ua tamâhia vau, hau atu i te mâ mai tei ore â i itehia e au e o tei ore roa i mana‘ohia e au. Ua amui atu to‘u episekopo matamua i teie mau orometua i roto i te haamenemeneraa no te feia tei mau i te autahu‘araa no te haamau ia‘u ei melo, o oia ia te taata tei pahono i te niuniu paraparau i te mahana i pii ai au e ia haere mai te mau misionare e farerei ia‘u.

Ua nehenehe ia‘u ia faaroo i te mau parau a ta‘u pehepehe i herehia e au mai te hoê faahoiraa himene e pee ra i ni‘a ma te natiraa i te mau taata atoa ta‘u i farerei e te mau mea atoa tei faahaere mai ia‘u i roto i te Ekalesia—te mau parau tei haaputapû i te hoê aau oto e hiaai nei i te ite faahou i to’na Metua Mure ore.