Ua faatupu te Vahi Haaputuraa Aamu Utuafare i te Haamana‘oraa Peu Tumu o te Ao atoa nei

Te firiraa i te hoê faaneheneheraa no Noela o te fenua Scandinavie e i te himeneraa i te hoê himene no te fenua Ekotia « Auld Lang Syne » teie noa na faaoaoaraa e piti o te ava‘e Titema i te Vahi haaputuraa Aamu Utuafare i Roto Miti. Te feia o tei amui mai i roto i teie piha haapiiraa o te pô tei faatupuhia i te 28 no Novema e tae atu i te 22 no Titema, ua haapii mai ïa no ni‘a i te mau peu tumu no te mau fenua rau e no te mau nunaa rau.

Te rahiraa o te mau piha haapiiraa potopoto, ua faanahohia e ua haapiihia ïa e te mau taata tumu iho no teie mau fenua rau o tei a‘o i te mau parau tumu ei faanahanahanaraa no te ava‘e Titema, te maa, te mau faanehenehe e te pehe. Ua iritihia teie mau piha haapiiraa no te mau taata atoa, e no te mau utuafare.

Ua faaitoitohia te mau utuafare ia faaineine i te hoê hoho‘a tuatapaparaa na te mau tamarii. E ua anihia i te mau tamarii ia papa‘i i te hoê hoho‘a no ratou iho, no to ratou mau metua e no to ratou mau papa ru‘au ma. E ua haamauruuruhia teie mau tamarii i te mau monamona e te mau utuafare o tei rave faaoti i ta ratou mau tabula tuatapaparaa ra, ua farii ïa i te hoê peni tara o tei nana‘ohia i te mau parau « E mea au te aamu Utuafare ».

Ua vaiiho-atoa-hia te mau tabula e te mau mana‘o tauturu no te mau pureraa pô utuafare e no te aamu utuafare na te mau utuafare no te hopoi i te fare. I ni‘a i te hoê parau, te faaitehia ra e mea nahea te mau tamarii e te mau metua ia uiui i to ratou mau metua paari.

Teie te mau fenua i ravehia no te faaiteiteraa, o Norevetia, Farani, Heremani, Ekotia, Neterani, te Repupirita Tchecoslovaquia, Tuete e Tanemateta. Ua faaite-atoa-hia te mau peu tumu a te Ati Iuda e te mau pionie.

Ua faataahia o Diane Loosle ei ti‘a faatere no te feia a tahi ra a haamata’tu ai e o tei parau e, a tahi ra te vahi haaputuraa aamu a tauturu ai i teie huru ohiparaa.

Ua tatara mai te tuahine Loosle e, ua au-roa-hia teie huru ohiparaa e na te reira i faahiaai i te mau taata aita e haere mai nei i te Vahi Haaputuraa Aamu Utuafare. Teie ta’na i parau : « Hoê o te fâ a teie vahi haaputuraa o te faahaereraa mai ïa i te mau iteraa rau maitai a‘i i te vahi haaputuraa aamu. Te hinaaro nei matou i te mau taata ia haere mai e ia ite e eere roa’tu i te mea tapitapi mai ta ratou e mana‘o nei ».

Te Vahi Haaputuraa Aamu Utuafare rahi a te Ekalesia, o te hoê ïa fare rahi a‘e o to’na hoho‘a e e iritihia te reira i te mau huru taata atoa ma te tamoni ore. E fana‘o 1.900 feia rave oro‘a e haere mai e mata‘ita‘i i teie vahi i te mau mahana atoa.

Ua pûpûhia te mau piha haapiipiiraa na te feia e rave rahi o ratou mau iteraa rau, oia’toa te mau taata a tahi ra a haere mai ai e e 125 mau melo rave ohipa tamau e te feia rave afa taime. E 400 feia haapii tamoni-ore e horo‘a i to ratou taime no te tauturu. No te tahi atu mau haamaramaramaraa a haere i ni‘a i te reni www.familysearch.org.