Faamatalaga

Ia Tesema 2005 na asiasi mai ai nisi o lo matou aiga o ni tagata o le Ekalesia ia i maua ma lou toalua i Kolomupia. Ae latou te lei toe foi, e lua ni meaalofa mananaia lava na tuu mai e le tamaloa o lou aiga ia te au—o se tusi fusitolu ma ni lomiga tuai o le Liahona.

Na amata ona ou faitauina le lomiga o Novema 2004, lea na i ai ia saunoaga o le konafesi o Oketopa. Sa ou faitau i le tusiga “O Le Tulaga o le Ekalesia,” na saunia e Peresitene Gordon B. Hinckley, ma le “Perofeta, Tagatavaai, ma Talifaaaliga,” na saunia e Elder Jeffrey R. Holland. O molimau a nei tamalii maoae na taitaiina atu ai au i le faitauina o le Tusi a Mamona ma le Tusi Paia.

O le taunuuga o se mea aupito matagofie na tupu ia i maua. Na ma faia ma lou toalua le filifiliga na sili ona lelei—na papatisoina i maua i le Ekalesia a Iesu Keriso o le Au Paia o Aso e Gata Ai.

Edgar Henry Muñoz Porras, Kolomupia

E fia faailoa atu lou agaga faafetai tele mo le mekasini o le Liahona. Ua matuai faamalosia lau molimau i lou faitauina ma le totoa o lomiga musuia taitasi. E tele taimi ua faamaonia mai ai e le Agaga Paia ia te au le moni o tusiga ma e faatumuina ai lava au i le agaga faafetai.

O se taunuuga o nei aafiaga faaleagaga, na ou manao ai lava e faasoa atu savali o loo i le mekasini i isi tagata. Na ou auina atu se meaalofa o le totogi o le tau [o mekasini] i lo’u tausoga. Fai mai o ia ua fiafia lava i mekasini ma na te faitauina i taimi uma. Ou te faamoemoe o le a fesoasoani lea ia te ia e iloa ai le taua o le osia ma le tausia o feagaiga.

Na ou auina atu foi kopi o le Liahona i se uo ma o se faiaoga i se isi atunuu. Na fai mai foi o ia ua fiafia i le mekasini ma manao ia ona mauaina pea. O le auala lenei o loo ou sauniaina ai le eleele mo ia ina ia i ai se aso na te taliaina ai le talalelei toefuataiina.

Penélope B. Woodward, Texas, ISA

A ou maua ia lomiga o le konafesi o le Liahona, ou te matamata i ata i itulau uma lava. Ou te fiafia e vaavaai i foliga o tagata ma vaaiga eseese uma o le konafesi. E fesoasoani ou te lagona ai le agaga o loo i ai i le lalolagi atoa i le taimi o le konafesi. E ese le lalelei o fanau uma a le Tama Faalelagi! O taimi uma lava e aumaia ai e le lomiga se ataata i ou foliga. Faafetai mo a outou taumafaiga e le o vaaia—faafetai lava mo le Liahona.

Jung YeJi, Korea

Na ou manao e faailoa atu ia te outou lo matou fiafia tele i le Liahona. O lou atalii o Elias (sa lua tausaga i lena taimi), e ese le fiafia i le tala “O Morgan Faamaoni” o loo i le lomiga o Mati 2007. E masani ona ou faitauina ia te ia. Sa mafai foi ona ia toe faamatalaina lelei le tala. Ou te talisapaia lava pe a faaauau pea ona outou tuuina mai tala pupuu faapena.

Ae mo au lava ia, ou te faitauina le Liahona mai le isi faavaa i le isi faavaa, ma ou te fiafia i talafou, o tusiga, ma manatu. Faafetai lava mo le avanoa e maua ai ia taumafa faaleagaga.

Sonja Görgen, Siamani