O Le Samaria ma se Sikulukalaiva

Sa ou pisi lava e tapena au mea ina ua uma lau lesona mo le vasega Maea Meite, sa tutu mai i le pito i tua ia lou toalua o Garry, ma sii la ma tama tama e tasi le tausaga. Na savali ese atu le ma tamaitiiti e tolu tausaga o Zach, i le fale faafiafia na tumu i tagata ma mulimuli atu i se tagata e agai atu i faitotoa o le falelotu. Talu ai na ma tau fai manatu uma ma lou toalua o loo i ai Zach i se tasi o i maua, o lea sa na o ni nai minute lava na ma iloa ai ua leai o ia.

E fetaui lava lo ma iloa ane ua leai o ia, ma lo ma vaaia o Zach i le pito i tua o le falefaafiafia. Ae na i ai se mea na faaletonu. Na mu ona alafau, ma loimata i ona mata, ma sa ia uumauina lona lima taumatau. Sa vaaia le popole o lo matou epikopo, o lē sa taitaiina mai o ia ia i maua. Na vave ona oo mai ia te au le lagona o le tausalaina. Na lavea lou atalii, ae ou te lei i ai e fesoasoani ia te ia.

Na lagona atu e le epikopo le tagi faatauanau a Zach ma faanatinati atu e fesoasoani ia te ia. Sa vave ona iloa le faafitauli a Zach, peitai sa lei vave se fofo. Na utia ona tamailima i le va o faitotoa tetele i fafo ma lona faavaa. O le tatalaina po o le tapunia o le faitotoa na atili ai le leaga o le manua; a tatala tele i tua le faitotoa e atili ai ona utia ona tamailima ma toso atu ai ma lona lima, ma atili ai ona tiga.

A o taumafai malosi le epikopo ma se ulugalii o le uarota e tau fika pe faapefea ona aveese mai tamailima o Zach, na iloa atu e se tuagane mai le isi uarota sa fai se latou fonotaga i le matou falelotu, le mea na tupu. Na ia aumaia se sikulukalaiva mai lana taga ma momono i le va o le faitotoa ma lona faavaa. Ona faaaoga lea o le sikulukalaiva e fai ma tee, e faavatele ai le avanoa e aveese mai ai le lima o Zach.

I le ogatotonu o mapuea o le matuu atu [o se popolega], na faamatala mai ai e le tuagane e faapea, a o sauni o ia mo sauniga o le Aso Sa i lena taeao, sa ia lagonaina se mea e pei o se uunaiga e ese lava e aumai se sikulukalaiva i le lotu. Sa matuai malosi lava ma manino le uunaiga o lea na ia momonoina ai le mea faigaluega i le taga o lona ofuvae.

O lenei faatinoga agalelei o le auauna atu o se taunuuga o musumusuga faalelagi na ou ootia ai lava ma faatumulia ai lou loto i le agaga faafetai. Sa puipuia e le Tama Faalelagi lau tama tama e tolu tausaga ma uunaia se tuagane lelei e tali atu i ai.