Faatuatua i Lana Laa…ma se Pese i Lona Loto

Soo se taimi ou te faalogo ai pe usuina upu “O loo tatou totō, totō i aso taitasi”¹ po o le “Ou te Alu i Mea e te Tofia, le Alii e,”² ou te mafaufau ai lava ia Paulo Tvuarde.

Sa ma feiloai ma Paulo i se aso vevela i Pasila i saute. Na maea sauniga Lotu, ma sa toetoe ina leai ni tagata i le falelotu sei vagana ai ni nai tagata sa nofonofo i le faapaologa. O le taimi lena sa avea ai lou toalua ma peresitene o le Misiona a Pasila Curitiba, ma sa fai le la fono ma Edson Lustoza Araújo, o le peresitene o le itu mai Guarapuava, i Paraná.

“Tuafafine Paulsen,” sa fai mai ai Tuagane Jason Sousa, o le sa avea ma se fesoasoani i lo’u toalua, “na e iloa atu le uso la le sa nofo i le faapaologa ma palapala i ona seevae?”

O le tele o auala i Pasila i saute e fai i le palapala mumu, o lea o se mea ua masani ai le i ai o palapala i seevae.

“Le tamaloa paee, lauulu uliuli ua tau latalata i le tolusefulu ona tausaga?” sa ou fesili ai.

“Ioe, o lona igoa o Paulo Tvuarde. E toetoe o Aso Sa uma e savali mai ai i le lotu, sei vagana ua mafiafia tele le palapala ma na le gafatia ai. Ua 14 tausaga o ia faia lena mea—mai lava i le 15 ona tausaga.”

“O le a le mamao e savali mai ai o ia?” Sa ou fesili ai, e aunoa ma se saunia mo le tali a Tuagane Sousa.

“Oi, e 40 kilomita,” o lana tali vave atu lea. “E amata savali mai o ia i le 3:00 i le taeao ina ia taunuu mai e lei amataina le lotu. E valu itula e savali mai ai o ia.”

Sa vave ona faaliliu kilomita i maila, ma sa ou iloa ai e 25 maila e savali mai ai Tuagane Tvuarde i le lotu i Guarapuava!

“Aisea na te faia ai lena mea?” Sa ou fesili ai ma le le talitonu.

“Aua ua talitonu o ia e moni le Ekalesia.”

“Ia, e sa’o,” sa ou fai atu ai ma si o’u tau maasiasi i le tali tuusao. “O le uiga o la’u tala, aisea e tau savali ai o ia i lena mea mamao?”

Sa faamatala mai e Tuagane Sousa o Paulo e nofo i nuu i tua, na te tausia le faatoaga a lo latou aiga ina ia mafai ona nofo ai lona tina ua 74 tausaga le matua i Guarapuava, na te maua ai le tausiga faafomai, aua e ma’i fatu. O Peresitene Lustoza o lona fomai fatu lena.

“E nofo Paulo na o ia lava, na te suaina le fanua, ma fafaga nai a latou manu fafaga,” o le tala lea a Tuagane Sousa. “E leai se eletise po o ni paipa. O le faatoaga e valu kilomita le mamao mai le nofoaga aupito lata ane e faatali ai pasi. E sili atu ona leaga nai lo lena, e le fealuai le pasi i le Aso Toonai po o le Aso Sa. O lea la e savali ai o ia i le lotu.”

Fai mai Peresitene Lustoza, lea sa faatoa ulufale mai i le potu ma lo’u toalua, e masani lava ona auai mai Paulo i le tolu mai le fa vaiaso. “Na te le misia lava sei vagana ua le mafai ona savalia le auala,” o lana tala lea. “E moe o ia iinei i Aso Sa ina ia mafai ai ona toe foi i le pasi i le Aso Gafua.”

Afai e faatolu ona auai Paulo i le lotu mai Aso Sa uma e fa, o lona uiga e sili atu i le 300 itula e savali ai o ia i le toeitiiti atoa le 1,600 kilomita (1,000 maila) i tausaga taitasi ia tau lava ina auai i le lotu!

A i ai o ia i le fale i le faatoaga, e maua e Paulo se auala e faasoa atu ai le talalelei. “Sa tonu ia te au a’o ou i ai i le suotosinaina o le fanua, faatasi ma la’u palau i tua o la’u solofanua, ou te pese leotele ai i ni viiga,” o lana tala lea a o ataata. “E faalogo mai i ai o’u tuaoi mai a latou faatoaga ona fesili mai lea po o a ia pese ou te usuina. O le auala lena e mafai ai ona ou aoao atu le talalelei.”

O le savali i le lotu sa le na o le pau lena o le alasopo masani na faaaoga e Paulo e faaaoga i ai lona faatuatua. E faalua i le tausaga ona malaga o ia i le 530 kilomita (330 maila) e auai i le Malumalu o Sāo Paulo Pasila. O se tasi o na malaga i le malumalu na faafeiloai atu ai o ia ia Rita de Cássia de Oliveira, o le sa faigaluega i le malumalu. O Odete Lustoza, o le faletua o Peresitene Lustoza, sa feiloai muamua ma Rita i le malumalu, ma sa ia fautuaina Paulo e tusi atu ia [Rita].

Sa masani Rita i le olaga i se aai tele, ma sa fiafia o ia i ana uo ma faamanuiaga o le avea ai ma se tasi o le uarota e latalata ane se falelotu. Ae ina ua mavae se faamasaniga mafana i se mea mamao, lea na iu ai i le la faaipoipoga ma Paulo i le malumalu o Sāo Paulo i le 2003, sa oo ina la nonofo ai ma Rita i le faatoaga.

Na masani o ia i le olaga i le faatoaga ma na ia faafetaia ai le faamanuiaga o se faaipoipoga i le malumalu. “O le vaega aupito faigata o le sailia lea o se toalua,” na ia fai mai ai. “O isi mea uma e mafai ona ou faamasani i ai.”

A o ia suotosinaina lana faatoaga i le taimi lenei, e taumafai lava Paulo e toto fatu o le talalelei e ala i le usuina o viiga mo ona tuaoi, ma e faimalaga pea o ia mo le 40 kilomita i le lotu i Guarapuava. Ae o le taimi nei ua latou o faatasi ma Rita ma lo la atalii o Saulo, ua lē usupo i le taeao o le Aso Sa, a ua o i le pasi i le leva o le po o le Aso Faraile. A uma ona faaaluina le faaiuga o le vaiaso e fegalegaleai ai ma le Au Paia ma auai i sauniga o le Aso Sa, ona latou toe foi ai lea i le pasi i le taeao o le Aso Gafua i le faatoaga—ma le fiafia ina ua latou malaga i le mea o loo finagalo le Alii latou te o i ai.