O Le Aao Taiala o le Atua

A o ou tuputupu ae, sa avea Siamani ma se malo na vaeluaina. O sisifo, i le mea na ou nofo ai, sa saoloto ma faatemokarasi ma na oo ina faamanuiaina. O sasae sa taitaiina e se faiga faakomunisi lea sa faifai mea faatasi ma Rusia. Na tuueseeseina ia sasae ma sisifo i se tuaoi, na faailogaina i puipui, pa uaea, ma fanua na tao maina, ma ni olo na leoina e leoleo ma ni fana otometi. Na maileia ai i sasae, i tua atu o lena tuaoi, na i ai se vaega faamaoni o le Au Paia o Aso e Gata Ai, o e ua leva ona talotalo mo le saolotoga e tapuai ai faapea faamanuiaga o le malumalu.

O i matou o tagata o le Ekalesia, sa matou iloaina lava o le a i ai se aso—i le faataunuuina o valoaga—o le a talaiina ai le talalelei i malo uma (tagai Mataio 24:14). Ae talu ai ona sa foliga mai na malolosi tele ia vaegaau ma sa matua lotomaaa ia malo, sa matou matatau ai ma faapea, e na o se vevesi tele lava faavaomalo po o se isi faalavelave i le lalolagi o le a mafai ona aumaia ai ia suiga talafeagai ia Siamani i Sasae, Polani, ma isi atunuu sa i lalo o le pulega a Rusia.

Sa silafia lelei lava e le Alii. Na luiina e Peresitene Spencer W. Kimball (1895–1985) ia tagata uma o le Ekalesia e tatalo ina ia tatalaina ia tuaoi. Ma sa tuai ae na mautinoa lava na amata ona tupu. Sa faatagaina e le malo o Siamani i Sisifo le fausiaina o se malumalu i ona teritori, ma na faapaiaina ai le Malumalu o Freiberg Siamani i le 1985. Ma o le 1988, i le mulimuli ai i se talosaga mai taitai o le Ekalesia, na malilie ai le malo e faatagaina faifeautalai i totonu o le atunuu, ma faifeautalai mai Siamani i Sisifo e auauna atu i fafo atu o le atunuu. O Novema o le 1989 na tatalaina ai e le malo o Siamani i Sisifo le Puipui o Perelini, ma e lei umi ae tuiina loa i lalo. Na toilalo le malo, ma na amata ai ona toe faatasia Siamani i lalo o se malo temokarasi.

Ua lisiina e le au tusi talafaasolopito le tele o mafuaaga o nei mea maoae ua tutupu. Ae ou te le masalosalo lava o tua mai o nei mea uma, sa taialaina e le Alii ia faasinomaga o nei malo ina ia mafai ona faataunuuina Ona faamoemoega.

O lena lava foi Atua e tasi e popole mo oe lava ia, ma o le a taialaina ma faatulagaina lou olaga mo lou lava manuia ma mo le manuia o isi—pe afai o le a e valaauliaina o Ia e faia o lea. Ua ou iloaina aua na Ia fesoasoani e faatulaga lou olaga ma tausisia Lana folafolaga e faapea, afai ou te faamuamua o Ia, o le a Ia faamanuia ia te au i isi mea uma ou te manaomia. Ua ou vaaia le tupu o lenei mea i le tele o taimi o lou olaga.

O lo matou aiga na o le pau lea o le Au Paia o Aso e Gata Ai i lo matou nuu e 60,000 tagata. Sa matou faia le mea sili e ola ai i le talalelei. E masani ona ou lagonaina le Agaga, ma e moni ou te lei masalomia e moni le Ekalesia. Ae a o ou tautua ai i le militeli, na ou lagonaina se naunautaiga malosi ia ou iloa mo au lava e moni le Tusi a Mamona. O lea na ou alu ai i se nofoaga tuufua ma faia e pei lava ona fautua mai le Tusi a Mamona (tagai Moronae 10:4–5). Sa ou ole i le Atua. Ma na ou mauaina se molimau—o se lagona faaleagaga o le mafanafana, to’a, filemu, ma le fiafia tele lea o le a le mafai lava ona galo ia te au.

Ina ua maea la’u tautua i le militeli, ona ou galue lea mo se aoaoga i tulaga faaleautaitai i le militeli i le malo o Siamani i Sisifo. Sa fai lava si faigata, ae na ou maua se malamalamaaga tele i mea e pei o tulaga tautupe, faatauga o fanua, mataupu faaletulafono, ma isi mea faapena. Na i ai foi so’u valaauga e galue i le au peresitene o le itu. A o pisi tamaiti o la matou vasega e fai a latou meaaoga i Aso Sa, sa ou faataunuuina ou tofiga o le Ekalesia ma faaalu lou taimi faatasi ma lou aiga. Sa faigata, peitai, e moni lava folafolaga a le Alii, ma e mafai ona e faalagolago i ai. Sa lelei lava au taumafaiga e pei o tamaiti o la matou vasega.

Ina ua uma le faauuga, na ou faigaluega loa mo le malo mo le valu tausaga. Sa faamautinoa mai mo au se galuega mo le olaga atoa ma se penisione lelei lava. Na foliga mai na pei lava ua taatia lelei mai lou olaga i ou luma. Ona talosaga mai lea o le Au Epikopo Pulefaamalumalu a le Ekalesia pe ou te fia alu i Frankfurt e galue ai o se sui o le eria mo Europa. O le a lafoai lau galuega mautu ma se penisione i le lumanai. Ae ina ua ma tatalo e uiga i ai ma lo’u toalua, sa ma lagonaina o le mea tonu lea e fai. Mai lava i lena taimi, na agai atu ai lou olaga i se itu e ese lava ae matuai faamanuiaina.

O o’u tomai faalemalo na saunia ai au mo le tele o mea na ou taulimaina i lou tiute fou. Ma o le taliaina o lenei galuega na mafai ai ona avea mulimuli ane au ma se peresitene o le misiona, o se mea na semanu e le mafai ona ou faia pe a na fai ou te faigaluega pea mo le malo.

Ua ou faasoa atu nei mea ia te outou ma le agaga faafetai tele ma ona e le o le faalialiavale, ae e faaali atu ai ia te outou e faapea, o le a faatulagaina e le Alii o outou olaga i Ana fuafuaga pe afai tou te faatagaina ai o Ia. Ma o le a taunuu ai i ni faamanuiaga maoae. E mafai ona ou folafola atu ia te outou e faapea, o le a le gata ina Ia faamanuiaina outou i mea taua e pei o galuega, ae afai tou te liliu atu ia te Ia i le tatalo, o le a Ia faamanuiaina outou i luitau laiti o aso uma. Ua tele taimi ua ou maua ai lenei aafiaga.

Ou te manatua a o ou auauna atu o se peresitene o le paranesi ma sa ou galue i la matou lipoti o le faatalanoaga faaletausaga o le sefuluai. O se aso manaia lava o le taumalulu, ma sa faatalitali mai lou toalua ma te o ma te savalivali. Sa ou masani i le faiga o mea tautupe a o ou galue ai o se tagata faigaluega a le malo, ma o lenei mea sa le o se galuega tele ia te au. Ae o taimi uma lava sa ou taumafai ai e faapaleni fuainumera, sa le sa’o le aofaiga atoa. Na ou taumafai pea lava pea, ae na leai lava, ma sa amata ona ou le fiafia. Sa ou ole atu i le Tama Faalelagi e fesoasoani mai.

Ina ua ou tu ae i luga, sa ou vaaia e leai lava se mea na suia. Ae sa uunaia au e toe iloilo se vaega faapitoa o lisiti foai. O aso la, sa faapipii faatasi ai lisiti i se tusi, ma o le taimi lea na ou maua ai ni lisiti se lua na pipii faatasi ma na pei ai o se lisiti e tasi. Ma sa faapea loa ona foia ai le faafitauli.

O o outou luitau atonu o mea masani lava e pei o le luitau na ou maua i se taimi e le’i mamao tele atu. Sa ou faatauina mai se masini eletonika fou e televave mo lau komepiuta, ae ina ua ou faapipiina mea uma e tusa ai ma faatonuga, sa le ola. Sa ou faasolosolo i faatonuga o le faapipiiina, ma toe sulu mea uma, ma telefoni foi i le laulau fesoasoani a le kamupani na gaosia, ae sa le ola lava. Sa faataitai foi le masini i le faleoloa na ou faatauina mai ai, ma latou te le’i maua se mea na leaga ai. O lea na ou toe aveina ai i le fale. Ae o le taimi lenei, sa ou manatua ai e tatalo. Na o le pau lava lena o le mea na ou faia na ese. O le taimi lena, na ola ai ma o loo ola ai lava.

Ia, o nisi o nei mea na aafia ai ni atunuu atoa. O nisi na aafia ai le faasinomaga o lou olaga atoa. Ae o nisi e fai si laiti i le fua faatatau o mea tetele. Ae o lo’u manatu tonu lava lena. O le Atua lava lea e tasi o lē na fetalai atu i perofeta ma o lē e suia faasinomaga o malo, e naunau lava e talanoa atu i lou loto e ala i Lona Agaga. O le a Ia taialaina le aluga o lou olaga ma faia oe ma se tagata sili atu, nai lo le mea e mafai ona e faia mo oe lava. Ma o le a fesoasoani o Ia i luitau o aso uma o lou olaga pe afai o le a e faatuatua ma faalagolago ia te Ia.

Na te silafia oe, e alofa o Ia ia te oe, ma e mautinoa lava Ana folafolaga.