Na Asiasi Moni Ea Iesu i Amerika?

O le 1960 na ou fetaui ai i se alii talavou i se pati ma na ia tauina mai ia te au na asiasi atu Iesu Keriso i Amerika ina ua mavae Lona Toetu. Sa ou faapea ua maoae tele lea manatu ma sa ou fia iloa atili ai, o lea na amata ai ona ou saili i faletusi ma fesilisili i aulotu o tapuaiga eseese i lou nuu o San Miguel, El Salvador.

Na toeitiiti lava tolu tausaga o ou saili ae e leai se mea na ou maua. A ou fai atu i taitai o nisi ekalesia na ou faalogo na afio atu Keriso i Amerika, na latou fai mai ua faaseseina au. Talu ai ona sa leai ni faamatalaga na ou maua i lau sailiga, o lea na iu ai ina ou talitonu na sa’o i latou.

I se tasi aso, na oo mai ai ni faifeautalai se toalua O Le Ekalesia a Iesu Keriso o le Au Paia o Aso e Gata Ai i lou fale, ma faapea mai o loo ia i laua se savali taua mo lou aiga. Sa vave lava ona ou manatua au fesili na i ai muamua ma fesili atu loa ia i laua, “E te lua iloa na afio mai Iesu Keriso i Amerika?”

Na faapea mai se tasi o alii talavou, “Ma te talitonu i ai.”

O le taimi lena na ou lagonaina ai se fiafia tele i lou mafaufau ma lou loto, ma ou fesili atu, “E faapefea ona oulua iloa?”

Na ia ave ifo i fafo se tusi mai lana ato ma fai mai, “Ma te iloa na afio mai Keriso iinei ona o lenei tusi, o le Tusi a Mamona.”

O mea na aoaoina ai au e faifeautalai i lena lesona muamua na ou le mautonu ai, ma sa ou masalosalo i le tala i le faaaliga a le Perofeta o Iosefa Samita e uiga i le Tama ma le Alo. Ae peitai, na ou tosina i le Tusi a Mamona, ma sa faaauau ona aoaoina au e faifeautalai i lesona.

I se tasi aoauli, na fesili mai ai alii faifeautalai ia te au, “Ua e tatalo e iloa ai pe moni mea o loo ma aoaoina ai oe?”

Na ou fai atu sa ou tatalo ae ou te lei maua se tali.

“E tatau ona e tatalo ma le manatu tonu i ai,” na la fai mai ai.

Sa ou faitauina le Tusi a Mamona mo ni nai po, ma na ou faitau ma talitonu ai i le faaali mai o Iesu Keriso ia sa Nifae, ae ou te lei taliaina lava le faaaliga a Iosefa Samita. Na matuai leaga lava la’u tauiviga i totonu.

I se tasi po na ou tootuli ai na o au ma sasaa atu lou loto i le Atua. Na ou fai atu ia te Ia ou te fia iloa pe na faaali moni mai o Ia lava ia Iosefa Samita. Afai na faaali mai o Ia, sa ou folafola atu ia te Ia o le a ou papatiso i le Ekalesia ma auauna atu ia te Ia i lou olaga atoa.

Ina ua ou ala ae i le taeao po lava o le aso na sosoo ai, na oo mai ia te au le tali e ala i le Agaga Paia. Sa manino lou mafaufau, ma na tumu lou loto i le filemu. Mai lava i lena taimi, e lei toe i ai ni ou masalosaloga e moni o Iosefa Samita o se perofeta a le Atua, ma o le Tusi a Mamona o se tasi molimau ia Iesu Keriso, ma o Iesu Keriso o lo tatou Faaola ma le Togiola.

Ua ou iloa na afio mai Keriso i Amerika ina ua mavae Lona Toetu. E olioli lou agaga i lenei malamalama ofoofogia, na aoao mai ia te au ma le mautinoa e le mana o le Agaga Paia.