O Le Faaumiumi o le Tuuina Atu o Fesoasoaniga na Lagolagoina ai i Latou na Mafatia i Galulolo a o Agai Atu i le Toefaamautuina

O taumafaiga fesoasoani a le Ekalesia mo faalavelave faafuasei i le gasologa o masina ina ua mavae le faalavelave na auina atu ai oloa e pei o meaai, afifi mo le soifua maloloina, sapalai faafomai, ma lavalava. Talu ai ona o le tetele o foai a tagata o le Ekalesia, sa amata ai loa e le Ekalesia ona fuafuaina se fesoasoaniga mo se vaitaimi umi. O se vaega o lena taumafaiga mo se vaitaimi umi, na tuuina atu ai i le au faifaiva ma le au kamuta ni galuega e fausia ai le silia ma le 130 vaa fagota. Sa faafaigaluegaina alii e faaaoga ia masini suo lautetele e fesoasoani ai e toe fausia ia faatanoa o loo siomia ai faatoaga ulavai. O laau suisui, o faavaa e lalaga ai ie, o palau tosolima, ma isi meafaigaluega sa foaiina atu ina ia uunaia ai le toe foi i le ola faalagolago o le tagata ia te ia lava.

“O le tausaga muamua atoa sa taulai atu i le toe faavaeina o galuega ma auala e maua ai tupe ma fesoasoani i tagata taitoatasi e toe foi e galulue,” o le saunoaga lea a Brett Bass, le faatonu o Auaunaga Alofa a le Ekalesia. “Ona matou vaavaai lea i a tatou punaoa, faailoa tulaga aupito manaomia o loo i ai, ona toe taulai lea o a matou taumafaiga i le fauina o mea mautu.”

O taumafaiga a le Ekalesia e aofia ai nofoaga autu o nuu, fale, faleaoga, ofisa faafomai, ma vai mama—na mafaia uma lava ona o le maoae o le sasaa mai o le agaalofa o tagata. I le taimi na tulai mai ai manaoga, sa faapea ona foai atu tagata o le Ekalesia i le lalolagi atoa ina ia fesoasoani ai e faatino nei taumafaiga.

O taumafaiga iloga a le Ekalesia i Initonesia na faaiuina ia Tesema 2007. O galuega tetele e aofia ai le fausiaina o fale e 902 ma nofoaga autu e 3 mo nuu, fausiaina o faleaoga e 15, fausiaina o ofisa se 3 mo falemai ua maea ona faatotogaina, toe fausiaina o se faaopoopoga o se falemai, ma le faamaeaina o ni galuega tau vai i nuu e 24.

Sa ola ia Abdul Samad i se nuu sa faanatinati ona toe fausiaina mo le lua ma le afa tausaga a o lei siitia atu o ia ma lona aiga i lo latou fale fou. Na maliliu lona toalua ma lona tina i le lologa ae ua faamoemoe nei e faia se olaga lelei mo lona aiga o loo totoe, o ona afafine e toatolu ma lona atalii e toatasi.

O fale uma e 902 na fausia ma foaiina atu e ta’i 44 sikuea mita. O le faitau selau o e na mauaina nei fale latou te fai mai soo faapea latou te talitonu o o latou fale o fale sili ia ona lelei le fausaga, ma o le a latou tuufaasoloina atu i a latou fanau ma fanau a a latou fanau. Latou te fiafia i lanu na faaaogaina faapea foi ma le maa o loo fola ai le foloa ma faailoa mai le lotofaafetai mo le mauaina o se mea mautu ma faatuatuaina i o latou olaga.

“Ina ua lulu le mafuie ma sosoo mai ai ma le galulolo, o le mea muamua lava na latou faia, pe afai sa latou i ai i totonu o lo latou fale, o le taufetuli lea i fafo,” o le faamatalaga lea a Jeff McMurdo mai le Faalapotopotoga Faavaomalo mo le Malagaese, lea sa faipaaga ma le Ekalesia i le fausiaina o fale. “Mai le taimi na amataina ai, sa latou taufetuli. Ina ua latou maua ia ki i se fale, sa mafai loa ona latou maua sina toa mai le faalavelave atoa lava na latou oo i ai i le galulolo.”

Sa faaauau pea e le Ekalesia taumafaiga o le toe fausiaina e ala i le fai paaga faatasi ma le Islamic Relief ma le Adventist Development ma le Relief Agency e fausia ni faleaoga se 15, faatasi ai ma le aoaoina o faiaoga fou ma le faatuina o mataupu aoaoina ma faiga e lagolago atu ai i aoaoga.

O le toatele o faiaoga i le eria sa maliliu i le galulolo, ma na tulai mai ai le tulagaese o le utiuti o faiaoga. O Kamaruzzaman, o se faiaoga mai Banda Aceh, o se tasi o faiaoga e toalua mai lana aoga na faasaoina. Faatasi ai ma le leai o ni faleaoga, o faiaoga, ma tamaiti aoga, sa faagaoioia le faiga o aoga i se faiga feauauai seia oo ina ua fausiaina nei faleaoga fou.

“Sa latou o atu i se fale le tumau mo aoga—o se faletele o le nuu lea pe tusa ma le 40 tamaiti aoga i le potu,” o le tala lea a Kamaruzzaman, o loo avea nei ma se puleaoga o se faleaoga fou na fausiaina. “Ua maua nei e tamaiti aoga se faleaoga sili ona lelei ma ua sili atu foi ona fesoasoani i le aoaoina. Ua latou maua nei se lumanai sili atu ona faatuatuaina.”

Sa faatotogaina ia faleaoga taitasi i kesi, laupapa tusitusi papae, ma potutusi e maua ai se siosiomaga lelei mo tamaiti e aoaoina ai. A o faatoateleina faiaoga ua avanoa, sa faapea loa ona ave le faamamafa i le aoaoina ma le atinaeina o ni lesona fou e aoaoina.

O Herliana, o se taitai faamaopoopo mo aoaoga mo le Islamic Relief, na saunoa o ia e faapea ua matuai fiafia lava i le avea ai ma se vaega o lenei galuega. “Sa leai ni faleaoga; sa toalaiti faiaoga na totoe,” na ia saunoa ai. “O se foai tele lenei i nuu. Ua tatou faia faatasi se suiga tele i olaga o tamaiti, faiaoga, matua, ma aiga.”

O Fauziah, o se tamaitai tiotio ma le mata ataata, ua avea nei ma se tasi e faagaoioia le vai mo lona tamai nuu e latalata i Bireuen i Aceh Provence. O lona tofiga, na te faamaumau ma ao mai pili o le faaaogaina o le vai mai ia i latou e faaaogaina le vai fou o le nuu.

I le faiga faapaaga ma le International Relief and Development, na faamaeaina ai e le Ekalesia ni galuega o vai lea na aofia ai le faaleleia o vaieli, faapipiiina o tane e teu ai le suavai, faaleleia o tulaga mama, ma le siitia i luga o le faiga e auina atu ai le suavai. O nei taumafaiga ua auina atu ai le suavai mama i tagata e 20,000.

“I le taimi muamua, sa faigata ona maua ni vai lelei ma e umi se taimi e tau saili mai ai,” o le tala lea a Fauziah a o ia faailoa mai lona loto faafetai i le mafai ona maua le suavai i fafo o lona fale. “O le a ola maloloina nei a matou fanau ma o le a maua ni lumanai manuia.”

Sa fausia foi fale taele ma fale ta lavalava i nuu, ma na maua foi e tagata o le nuu ia aoaoga i le auala e tausia ai nei masini ma tausia ia mama.

E ui sa maua e nuu taitasi ia aoaoga mo le tumama o le tagata lava ia, ae o taumafaiga sili ona auiliili ina ia faaleleia ai le tausiga o le soifua maloloina sa agai i luma i le faamaeaina lea o ni ofisa faafomai se tolu ua faatotogaina uma ma le toe fausiaina o se faaopoopoga o le falemai.

“O le mea lenei e matuai manaomia lava,” na saunoa ai Syarman, o se taitai o le nuu i le itumalo o Bireu, lea afai e moomia se tausiga faafomai i le taimi muamua e moomia ona savali mo le 15 kilomita. “O le a mafai e o matou tagata ona maua le fesoasoaniga faafomai e moomia e latalata atu i o latou fale. Ua sili atu nai lo le taimi muamua, ma e matou te matuai faafetai ai lava.”

Na faatulaga foi e le Ekalesia le aoaoina o fomai ma le aufaigaluega faafomai ma tuuina atu masini faafomai e manaomia.

Na feagai foi ia Bill ma Linda Hamm o Anchorage, Alaska, ISA, ma luitau i le galuega: na valaauina i laua e avea ma faifeautalai o auaunaga o fesoasoaniga alofa e vaaia taumafaiga fesoasoani o le galulolo i Initonesia. “Sa matuai o ma fiafia lava i luitau ma lagona le lofituina i le avanoa,” na saunoa ai Brother Hamm.

Na faalautele atu foi lenei avanoa ia Jim ma Karen Greding o Thousand Oaks, Kalefonia, ISA, o se ulugalii na valaauina e vaaia le faamaeaina o galuega ina ua faamaeaina le misiona e 18 masina a Brother ma Sister Hamm. Faatasi ai ma le tofiga ina ia i ai ma siaki le galuega o loo faia, sa avea ai nei tagata ma sui e le gata mo le Ekalesia, ae faapea foi le toatele o tagata o e na faia ia foai.

“Sa ma i ai e vaaia le lelei o le galuega ma ia mautinoa o tupe na atofaina mo galuega o loo sao ona faaaogaina,” o le saunoaga lea a Sister Greding. Sa i ai sui o le Ekalesia i laasaga uma o le galuega, ma o se faiga, faatasi ai ma a latou metotia o mea tau tupe, na tulagaese ai lava le Ekalesia mai isi faalapotopotoga.

“Matou te manatu i a tatou tupe o ni tupe e paia ma e faia taumafaiga uma ina ia vaaia ai o loo faaaogaina lelei nei tupe ae aua le maumauina,” na saunoa ai Bill Reynolds, le faatonu o fesoasoaniga mo le galulolo. “O le tele o faalapotopotoga na tuuina mai tupe ma faatalitali ma vaai po o le a le mea e tupu e ala i ni lipoti e le maua soo. Matou te tuuina atu se faasologa o tupe lea e faalagolago i fua ua faamoemoeina lea matou te vaavaaia. O faalapotopotoga sa matou galulue ua iloa lelei afai matou te fai atu matou te mananao e faapea ona faia se mea, e moomia ona latou ausia na faamoemoega.”

Sa taulai atu le Ekalesia i le fesoasoani atu ia Initonesia ma ona tagata ina ia faia se laasaga faigofie o le agai i luma mai le faalavelave ma tiga, o se laasaga agai i luma i le toefuataiina o le olaga. E ui e na o sina vaega sa faia e nei taumafaiga i tagata taitoatasi ma faalapotopotoga na ofoina atu fesoasoani i e na aafia i le galulolo, ae sa mafai e faifeautalai ona faasoa atu lo latou alofa, o le alofa o tagata o le Ekalesia, ma le alofa mama o Keriso.

“Sa faatagaina ona matou talai, ae sa avea i matou ma sui o le Alii ma taumafai e faasoa atu a matou molimau e ala i galuega o le agalelei, faaaloalo, pe na o le laufofoga ataata lava,” o le tala lea a Sister Hamm. “O nisi taimi sa matou maua ai le avanoa e faamalamalama atu ai le mea e sau ai tupe, ma sa matou tau atu i ai e uiga i lo tatou perofeta ma le auala na ia talosaga mai ai mo se anapogi e 24 itula, faatasi ai ma le tupe lea semanu e faaalu i meaai ina ia foai atu i se tupe faapitoa. Ou te manatu na molimau atu le Agaga ma sa latou malamalama ai ma o loo i ai tagata i le lalolagi atoa e alolofa ia i latou.”

O loo matuai manino mai lava ia faamaoniga o le galulolo, ae ua faaalia e tagata lo latou loto faafetai mo taumafaiga uma ua faia mo i latou.

“O se aafiaga lenei e le mafai ona e faagaloina, ma e soo se tasi e malaga atu i nei eria o le a le mafai ona misia ia faamaoniga o le faatafunaga lea ua avea ai le laueleele ma le sami e le toe suia, lea na tele ai soifua ma e pele na fano ai,” o le saunoaga lea a Sister Greding. “Ae o le toatele o e sa masalosalo i Kerisiano ua suia nei o latou loto. O nisi e sioa mai ia i matou, ae latou te faapea mai ia i matou i le tau panupanu o le latou faaPeretania, ‘Faafetai, i lau susuga.’ Matou te faalogo soo i ai.”