TALA PUPUU I LE LALOLAGI

O se Uepi saite fou o le JesusChrist .lds.org, o loo vaaia ai le Faaola, na tatalaina atu i tagata e malamalama i le faaPeretania i le aso 25 o Fepuari, 2008, faatasi ai ma fuafuaga ina ia maua i nisi gagana faaopoopo i le lumanai.

O le a maua e tagata e asiasi i ai ia faamatalaga, tusiga, ma faatinoga eseese e uiga i le Faaola, e taulai atu i autu taua e tolu: faatuatua ia Iesu Keriso, o Lona soifuaga ma Lana galuega, ma molimau ia te Ia.

O tagata e asiasi i le saite o le a i ai le aia e faaaoga ai mea e faaogaina e pei o musika po o ata vitio ma e mafai ona maua le taitaiga i isi punaoa e faatatau i ai.

O Ruth Wright Faust, 86, na maliu a o siosiomia e lona aiga i le aso 10 o Fepuari, 2008, e mafua mai ona o le matua o lona soifua, ina ua ono masina talu ona maliu lona alii, o Peresitene James E. Faust (1920–2007), sa avea muamua ma se tasi o le Au Peresitene Sili. Sa faaipoipoina i laua i le aso 21 o Aperila, 1943, ma e toa 5 le la fanau, 25 fanau a le la fanau, ma le 28 o fanau a fanau a le la fanau. Sa auauna Sister Faust i le tele o valaauga, e aofia ai le avea ma peresitene o le Aualofa i le uarota ma le siteki, ma le malaga faatasi ma lona alii i le lalolagi atoa, ma tupu ai le alofa i tagata o le ekalesia mai le tele o atunuu.

Ia Saunia Mea Tatau Uma, o ni tamaitusi se lua o loo ofoina atu ai ni nai savali faigofie i le teuina o meaai a le aiga ma mea tautupe a le aiga, ua maua nei i gagana e 33. O tamaitusi, lea e mafai ona maua mai e ala i taitai perisitua i le lotoifale, o loo maua foi i luga o le initoneti i gagana e 24 i le ProvidentLiving.org. Kiliki i luga o le Family Home Storage po o le Family Finances i le itu tauagavale o le itulau. Ona kiliki lea i luga o le Family Home Storage Pamphlet po o le Family Finances Pamphlet i le itu taumatau o le itulau. Ona filifili lea o le gagana talafeagai.

Ua tatalaina e le Ekalesia se Uepi saite aloaia mo i latou o loo i Lativia. O lenei saite o le a aofia ai talafou o le Ekalesia ma faamatalaga e patino ia Lativia ma avea o se Initoneti a le Ekalesia i totonu o le atunuu. O le saite a Lativia ua aumaia ai le aofaiga o saite a le Ekalesia i atunuu i le 63. O saite taitasi o loo ofoina atu i le gagana aloaia a le atunuu ma o loo maua e auala atu i le LDS.org (kiliki i luga o Languages, ona kiliki lea o Country Sites).