O Le Taimi Lenei

Sa i ai se molimau a Oksana ia Iesu Keriso, ae a na le tuuina atu lava i ai e ana uo se kopi o le Tusi a Mamona, na te le mauaina se molimau i Lana talalelei toefuataiina.

“A o ou faitau e uiga ia Iesu Keriso o lē na fetalai atu i sa Nifae, na oo mai se lagona malosi ia te au, ma na ou iloaina ai e alofa o Ia ia te au. Sa ou tatalo ma maua ai se molimau o Ia o lou Faaola ma e moni le Tusi a Mamona,” o le tala lea a Oksana.

“Na ou iloaina, afai o Iosefa Samita na faaliliuina le Tusi a Mamona ma ua moni le Tusi a Mamona, o ia moni lava la o se perofeta a le Atua ma na ia toefuataiina le talalelei a Iesu Keriso,” sa ia fai mai ai.

Sa aoaoina atili o ia e ana uo e uiga i le talalelei aua sa leai ni faifeautalai i Kamelisitiki i le taimi lena. Mo le fa tausaga, sa suesue ai o ia i le talalelei ma ola i ona mataupu faavae i le mea sili na ia mafaia, ma tatalo ina ia o mai ia faifeautalai.

Mulimuli ane, ia Mati o le 2006, na latou o mai ai. O Oksana ma lana uo o Sasa Kupatovi o tagata muamua ia e toalua na papatisoina i Kamelisitiki.

O Sasa sa na o le 14 ona tausaga i le taimi na ia mauaina ai le Tusi a Mamona mai ona tuafafine matutua, o e na auai i le Ekalesia i se isi nuu.

“Sa latou faamamafaina mai le mea moni e faapea, na 14 ou tausaga, e pei lava o Iosefa Samita i le taimi na ia maua ai le Uluai Faaaliga. Na matuai faamanuiaina o ia a o laitiiti lava, ma e mafai foi ona faamanuiaina au,” o lana tala lea.

O lea na amata ai loa ona ia faitauina. Sa ia faitau seia oo i mataupu o le Isaia o loo i le 2 Nifae, ona tuu ai lea. Sa ia toe faitauina le Tusi a Mamona i le tausaga mulimuli ane, mo se faamatalaga o talafaasolopito, ma sa leai se naunau e iloa pe moni.

Ae ina ua ia faitauina le Tusi a Mamona mo le taimi lona tolu, sa tau le taulai atu Sasa i lona talafaasolopito ae na sili atu [ona ia taulai] i le galuega a le Atua na tusia ai.

“A o ou faitauina, sa ou mafaufau lava ua moni, peitai e lei i ai sau molimau mausali,” sa ia ioeina ai. “Sa ou fia talanoa i faifeautalai.”

Ina ua taunuu mai alii faifeautalai i ni nai tausaga mulimuli ane, sa laua taliina ana fesili uma ma fesoasoani e saunia o ia e papatiso ma faamauina.

“A o ou savali atu i totonu o le vai o le papatisoga, na o ese uma lava ou masalosaloga, ma na ou iloaina o Iosefa Samita o se perofeta ma e moni le talalelei,” o lana tala lea. “Ou te lei fefe, e ui lava ina ou iloaina o le a ese le vaega o loo totoe o lo’u olaga.”

O lona olaga i le taimi nei ua ese. I le avea ai o se faiaoga o aiga, ua iloa ai e Sasa le ala e faalautele ai le perisitua o loo ia umia ma auauna atu ai i le malo o le Alii.

E tasi le tausaga talu ona papatiso Sasa, ae ona papatisoina loa lona tina ma lona tamamatua. Ua auai uma nei lona aiga atoa i le Ekalesia, ma ua fiafia lava Sasa e aumai le talalelei i isi.

“Ua faatumu ou pepa o le misiona ina ia mafai ona ou talai atu le talalelei po o fea lava e valaauina ai au ma aumai se isi tagata i le Atua,” o lana tala mai lea. “E tatau lava ona alu i luma Lana galuega.”

Sa lei mafaufauina lava e Misha Sukonosov e faapea, o le auai atu i vasega Igilisi faatasi ma faifeautalai i Sereniva o le a taitaiina atu ai o ia i le talalelei toefuataiina a Iesu Keriso. Ae na suia lena mea ina ua mavae ni nai masina o auai atu i vasega.

Sa fiafia Misha i le agaga na ia lagonaina a o aoao o ia e faifeautalai i le Igilisi. Ma ina ua ia taliaina la laua valaaulia ina ia latou o atu i sauniga a le Ekalesia, sa faateia o ia i le lagonaina o lena lava agaga i le Lotu.

Mulimuli ane, na valaaulia ai e se tasi o alii faifeautalai ia Misha ina ia faia le mea ua ia iloaina e sa’o ma ia papatiso.

Na iloa lava e Misha o le a matuai tele se lototele e tetee ai i tu ma aga masani a lona aiga. I Iukureini o le toatele lava o tagata na soifua ae i le lotu na lagolagoina e le atunuu. Ma sa lei ese mai ai lona aiga.

Sa manao lona tina e faatali o ia [Misha] mo ni nai tausaga ona faatoa papatiso lea, o lea sa malie i ai o ia e faatali seia 16 ona tausaga. Ae o le taimi lea, sa alu o ia i le lotu i vaiaso taitasi ma amata ona galue o le ta piano a le paranesi.

“Na fesoasoani lena mea ou te sau ai i Aso Sa uma lava, aua e tatau lava ona ou sau, aua a leai o le a leai se isi e tata,” o le tala lea a Misha.

Mulimuli ane, ina ua maea le taimi na faatalitali ai, na papatiso loa Misha i le Vaitafe o Desna i le aso 1 o Iulai, 2006. O le taimi lena, na te lei mafaufauina lava po o le a se vave o le a mulimuli atu ai lona aiga i lana faataitaiga.

Na amata ona sau lona tina o Olga, i le lotu ma aoao atili ai e uiga i le tapuaiga fou a lana tama tama. Na sau soo o ia o lea na talosagaina ai o ia e le peresitene o le paranesi pe mafai ona ia taina le okeni i sauniga faamanatuga ina ia mafai ona valaauina ia Misha e avea ma taitai musika.

Ina ua uma le ono masina o faalogologo pea i molimau a le au paia, faatasi ai ma lona atalii, na atiina ae ai e Olga lana lava molimau. Na papatisoina e Misha lona tina ia Tesema 2006.

O loo taina pea e Olga le okeni i vaiaso taitasi. O Misha, lea ua 17 nei ona tausaga, e pisi lava e fesoasoani atu i le au peresitene o le paranesi, ma auauna atu o se faifeautalai o le paranesi, ma taitaia viiga i le sauniga faamanatuga.

“Ou te iloa e manaomia au e le Ekalesia,” o lana tala lea. “Ou te matuai faafetai lava mo nei avanoa e auauna ai. E fesoasoani le Ekalesia ia te au a o ou fesoasoani atu i isi.”

Na amata saili Uri Voinarovika ma lona aiga le upumoni ina ua na o le 10 ona tausaga i Lavivo, o se aai i Iukureini i Sísifo. Mo le tele o tausaga, sa latou asiasi ai i lotu eseese. Ona valaaulia lea e le tamaloa o le latou aiga i latou e auai i se paranesi O Le Ekalesia a Iesu Keriso o le Au Paia o Aso e Gata Ai, ma e lei umi ae papatiso ma faamauina ia matua o Uri.

“Ou te lei alu i le taimi muamua,” o le tala lea a Uri. “Sa ou sailiili lava au ia.”

Ae peitai, o ona matua, o e na iloaina e moni le Ekalesia, sa lei fiu ai i lo la atalii. Sa la valaaulia ia Uri i lesona faaPeretania ma gaoioiga a le autalavou faapea ma sauniga i le Aso Sa. Na iu lava ina valaaulia e faifeautalai o ia i vasega faaPeretania.

“Sa le mafai ona ou fai atu e leai ia i laua,” na fai mai ai Uri. O lea na alu ai o ia i le lotu. Na iu lava ina papatisoina foi o ia.

“Talu mai lena aso, e tele isi aafiaga na ou maua na fausia ma faatulagaina ai lau molimau ma lou tagata i le ituaiga tagata ua ou i ai i le aso,” na ia fai mai ai.

“E masani ona ou vaai i tagata e pagatia mai aafiaga leaga ua latou faia,” o lana tala lea. “Ou te iloa o nisi taimi e faigata ona o faaosoosoga ma faatosinaga a o latou tupulaga, ae e le tatau ona tatou fiu ai. O le a tatou vaaia mulimuli ane ia faamanuiaga e maua mai i le usiusitai.”

O Uri, ua 17 nei ona tausaga, o loo avea o se taitai misiona ma se failautusi o le paranesi a Lavivo.

“Ou te faafetai lava mo le Ekalesia ma mea uma ua ia faia mo au,” na fai mai ai Uri. “Ou te alofa i lenei Ekalesia. Ou te uunaia tagata uma ina ia pipiimau i le ai uamea ma ia aua lava nei mamulu ese.”