O Le Meaalofa o le Talalelei

O le Aso Toonai o le aso faatau i le maketi i le lalolagi atoa. I Kana, i Ekuatoa, ma le Atu Filipaina, e la’u mai e tagata ia fua o a latou faatoaga ma a latou galuega taulima i le taulaga e faatau ai. Latou te talanoa i tagata latou te fetaui i le ala. O nisi o na tagata o le Au Paia o Aso e Gata ai. O le tele lava o a latou talanoaga e foliga tutusa ma mea e te faalogo i ai i soo se vaega o le lalolagi. Ae e i ai se eseesega i le Au Paia o Aso e Gata Ai. E iloagofie lava i o latou foliga faapea foi a latou upu. Latou te faalogologo ma le faaeteete ma foliga o se tagata e popole [i le tagata o talanoa i ai].

A fai si umi o le talanoaga, ona iu lea i mea e matua taua ia i laua uma. La te talanoa i mea ua talitonu e maua ai le fiafia ma mea foi e faanoanoa ai. O nisi taimi o le a fesiligia ai le tagata o le Au Paia, “Pe aisea e ese ai lou toafilemu?” Ona sau ai lea o se tali filemu. Atonu o le a talanoa e uiga i le Tama Faalelagi ma Lona Alo o Iesu Keriso, na faaali i le taulealea o Iosefa Samita. E ono talanoa i le galuega alofa a le Faaola toetu e pei ona taua mai i le Tusi a Mamona.

Atonu e te fesili, “E mafai faapefea ona ou faia lena mea? E mafai faapefea ona ou lelei atili i le faasoaina atu o o’u talitonuga?”

Sa ou suesue totoa ma le agaga tatalo i nisi o molimau ofoofogia ma le faamaoni a le Faaola ma Lana Ekalesia. E le tasi se mamanu o mea latou te faia. O nisi e tauaveina i taimi uma se Tusi a Mamona e foai atu. O isi e faaavanoina se aso e sue ai se tagata e aoaoina e faifeautalai. Na tatalo i latou taitoatasi ia iloa le mea e fai.

Ina ia faia le mea e tatau ona tatou faia, e tatau ona avea i tatou e faapei o i latou i ni auala e le itiiti ifo i le lua. Muamua, latou te lagona o i latou o fanau faapelepele a se Tama Faalelagi alofa. Ona o lena tulaga, o lea e faigofie ai ona latou liliu atu ia te Ia i le tatalo. Lona lua, o i latou e faigofie ona talanoa e uiga i le talalelei o ni soo loto faafetai o Iesu Keriso. Latou te faatauaina lona uiga ia i latou. O le manatua o le meaalofa ua latou mauaina latou te naunau ai foi ina ia maua e isi. Sa latou lagonaina le alofa o le Faaola.

Tatalo mo le avanoa e feiloai atu ai i tagata ua lagona e mafai ona i ai se mea e sili atu i o latou olaga. Tatalo ina ia e iloa le mea e tatau ona fai e fesoasoani ai ia te i latou. O le a tali mai au tatalo. O le a e fetaiai ma tagata ua saunia e le Alii. Ma o le a e lagonaina foi lou latalata atili atu i lou Tama Faalelagi, ma le iloa ua e faia mea sa Ia poloaiina ai oe, aua e alofa o Ia ia te oe ma talitonuina oe.