Peresitene Henry B. Eyring: Tofia e le Atua

E faafoi e Peresitene Eyring i tua le amataga o le talatuu o le faatuatua o lona aiga i ona tuaa o e sa faalogo ma mulimuli i uunaiga a le Agaga ma taitaiga a taitai perisitua. O le tama o lona tamamatua o Henry Eyring, lea na tuua Siamani i le 1853 ina ua 18 ona tausaga, sa faailoa atu i ai le Ekalesia i le tausaga na sosoo ai i St. Louis, Misuri. O lona faanaunauga mo se faaaliga e faatatau i le Ekalesia, na tali mai i se miti, lea na poloaiina ai o ia e Elder Erastus Snow o le Korama a le Toasefululua, lea faatoa feiloai i ai i se taimi mulimuli ane, ina ia papatisoina. Sa sosoo ai ma se miti e talitutusa lava, lea na ia vaai ai ia Peresitene Polika Iaga mo le uluai taimi, i le 1860 a o faamisiona i le nofoaga lea ua faaigoa nei o Oklahoma ma Arkansas.¹

Sa feiloai le Tama o le Tamamatua o Eyring ma Mary Bommeli na malaga mai i Suetena, ina ua faatasi atu o ia i lana au paionia i lana malaga sopo i Iuta ina ua maea lana misiona. O Mary, o lona aiga lea na auai i le Ekalesia ina ua 24 ona tausaga, sa faafalepuipuiina i Perelini, i Siamani, ona o lona faasoaina atu o le talalelei. O le po na pu’e faapagotaina ai o ia, sa ia tusia ai se tusi i le faamasino na tofi e faafoeina lona faamasinoga. Sa ia ta’u atu i le faamasino, “o se tagata o le lalolagi,” e uiga i le Toetu ma le lalolagi o agaga, e uunaia ai o ia [le alii faamasino] ina ia salamo ina ia mafai ai ona laveaiina ia lava ma lona aiga mai le “faanoanoaga tele.” E lei pine ae faaleaogaina e le alii faamasino le moliaga, ma sa faasaoloto mai ai Mary mai le falepuipui.² E lei umi ae faaipoipo Henry ma Mary ina ua taunuu i le Vanu o Sate Leki.

Mai Europa seia oo atu i toafa o Iuta i saute ma Arisona seia oo atu i kolone o Mekisiko i matu, sa faato’aina e tuaa o Peresitene Eyring le vaomatua, faasalalau le talalelei, sosola mai sauaga, faatutuina a’oga, ma faaaooga a latou fanau.

I le amataga o le Taua Lona Lua a le Lalolagi, ma le taufaasoasoa o le kesi na le mafai ai e le aiga o Eyring ona malaga atu i le latou taavale mo le 17-maila (27-km) i le Paranesi a New Brunswick mo sauniga i Aso Sa. O lea, na maua ai e le aiga le faatagaga e faia a latou sauniga i lo latou fale, i Princeton, i Niu Jersey. E tala ‘ata Hal faapea na te lei misia lava se sauniga a le Peraimeri iina—o se mea e lei faigata tele ona ausia pe a mafaufau e na o le faa-tasi lava ona fai le Peraimeri i lo latou fale.

Sa tele ina tomanatu Eyring i le agaga matagofie o sauniga faamanatuga sa faia i lenei paranesi laitiiti, a lona aiga ma tagata e asiasi atu i lea taimi ma lea taimi. Na le’i afaina ia te ia le masani ona na o lona aiga sa auai, po o le na o ia foi ma ona uso le Au Perisitua Arona o le paranesi atoa. Ae ina ua amata ona oo le aualii i o latou tausaga o le talavou, sa naunau lo latou tina mo se aiga e nonofo i se mea e toatele atu se Au Paia o Aso e Gata Ai e nonofo ai.

I le 1946, sa fiafia ai lava Henry i lona tulaga faamanuiaina ma lana galuega i Princeton. E tele taui faamamaluina faafomai ma taui maoae na ia manumalo ai i le kemisi. Ona o lana galuega filiga faasaienitisi faatasi ma saienitisi iloga o le lalolagi, o lea sa i ai ia te ia se avanoa maoae e ono filifilia ai mo se Taui Taualoa.

O le taimi lea na maua ai e Henry se telefoni mai ia A. Ray Olpin, le peresitene o le Iunivesite o Iuta, na valaaulia mai ai o ia e avea ma pule sili o le aoga mo faailoga maualuluga iina ma faaauau ai ana sailiiliga i le kemisi. Sa tuu e lona faletua, o Mildred le faaiuga e fai e Henry, ae na ia faamanatu atu ia te ia se folafolaga sa ia faia i tausaga ua tuanai. Sa folafola e Henry na te aveina lona aiga ia latalata i le laumua o le Ekalesia pe a faasolo ina matutua tama. Ina ua teena e Henry le galuega, sa talosaga atu Mildred, o le sa ola ae i Iuta, ina ia tatalo e uiga i lana faaiuga ma sa ia tuu atu ia te ia se tusi e faitau pe a taunuu i lona potu suesue.

Ina ua faitau e ia lea tusi, lea sa faaali atu ai le le fiafia o Mildred, ma ina ua maea ona tatalo ma mafaufau loloto, sa telefoni atu Henry ia Peresitene Olphin, ma faapea atu ua ia talia le galuega ina ia atiina ae ai le matagaluega saienisi a le iunivesite. O lana osigataulaga manino i le tuua o Princeton, na avea ma se faamanuiaga mo ia ma lona aiga. O se tasi o na faamanuiaga o le naunau lea o Hal e mulimuli i le faataitaiga a lona tamā, ina ua feagai foi o ia ma ni faaiuga faapena i tausaga mulimuli ane.

“Sa ou iloa ina ua talavou lo’u uso, e ese lava o ia mai isi tupulaga talavou,” o le tala lea a Harden Eyring, o lē na ia faaigoaina lona uso matua o se taiala ma se uo. A o i ai Hal i le aoga maualuga, fai mai ai Harden, sa ia faalilofiaina o ia lava i tusitusiga paia, ma faitauina faalima le Tusi a Mamona.

E lei manatu Hal e sili a’e o ia i isi, ae sa musu lava e auai i ni gaoioiga e faalavelavea ai lona faaleagaga. Sa faaavanoa lona taimi e taalo pasiketipolo ai mo le Aoga Maualuga a Sasae i le Aai o Sate Leki, ae sa ia tuu le faamuamua i ana suesuega.

“A o ou talavou, sa masani ona ou alu i fale aisakulimi e o uma i ai tagata,” o le tala lea a Harden. “A o Hal e le alu lava e tafao i le po i mea e tafafao ai le tupulaga. Ae, e faitautusi o ia ma suesue.”

O lona uso matua, o Ted, o se polofesa o le kemisi i le Iunivesite o Iuta, sa sinia o ia iina ina ua ave faatasi ni a la vasega ma Hal. Sa matauina e Ted, e mafai ona faamanuiaina Hal pei o isi o le vasega. “A tulimata’i lava Hal, e mafai ona ia ausia soo se mea,” o lana tala lea. “O ia o se alii malie tele, ma e tumau lava lona agaga fiafia e oo lava i taimi pāū ma faigata. E talitutusa lava Hal ma lona tama.”

Ae ui i lea, ina ua matua o ia, sa iloa e Hal se eseesega tele o ia ma lona tama.

Sa uunaia e Henry Eyring ona atalii e aoao le fisiki ma sauniuni mo se galuega i le faasaienisi. Sa faaautu suesuega a Hal i le fisiki e pei ona faamoemoeina i le Iunivesite o Iuta, ae i se tasi aso ina ua fesili o ia i lona tama mo se fesoasoani i se fesili faa-matematika lavelave, sa amata ona manino ia Henry e le o maua e Hal le mea lea e faamemelo i ai o ia.

“Sa tusitusi lo’u tama i luga o se laupapa sa i le fogafale i lalo o lo matou fale,” na toe tomanatu ai Peresitene Eyring. “Na faafuasei ona tu. ‘Hal,’ na ia fai atu ai, ‘sa ta faia foi le mea lava lea i le vaiaso talu ai. E foliga mai e te le o malamalama lava talu mai lena taimi. E te le’i faia?’”

Sa fai atu Hal e leai. Ona ia ta’u sa’o atu ai lea i lona tama, e le masani ona mafaufau o ia i le fisiki. Sa tu lona tama mo sina minute ona fai atu lea i ni upu malu na faamatuu atu ai lona atalii e tulimatai lana lava faanaunauga faapolofesa, “E ao ona e sailia le mea e te matua fiafia lava i ai, a oo ina leai se mea e te mafaufau i ai, o le mea lena e te mafaufau i ai.”³

Ae ui i lea, na faamaea lava e Hal lona faailoga i le fisiki i le 1955 a o lei ulufale atu i le Fuavaa o le Ea a le Iunaite Setete. Faatoa uma lava le Taua a Korea, ma sa taofiofi le aofaiga o alii talavou na tofia e avea ma faifeautalai faamisiona mai i uarota taitasi. Sa i ai se taimi na tapunia ai le Ofisa o le Misiona i le Aai o Sate Leki, ma sa leai ni faifeautalai na o i le galuega. Peitai, i se faamanuiaga, sa folafola atu e lona epikopo ia te ia o lana tautua i le militeli o lana misiona lena. E lua vaiaso talu ona taunuu i le Vaegaau i Sandia e latalata i Albuquerque, i Niu Mekisiko, ae tofia Hal e avea ma se faifeautalai o le itu i le Misiona i Setete i Sisifo—o se valaauga sa ia faataunuuina i afiafi i le lua tausaga lea na i ai i le militeli.

Ina ua uma ona faataunuu lana matafaioi faamiliteli, sa lesitala loa Hal i le Aoga Faapisinisi mo Faailoga Maualuluga i le Iunivesite o Harvard, lea na maua ai sona faailoga o le matuaofaiva i le 1959, ma se faailoga faafomai i le faafoega o pisinisi, i le 1963. E ui ina sa ia te ia le atamai e manuia ai i se galuega faasaienisi, ae o le faanaunauga o Hal sa i ai i le faiaoga, siitiaina, ma le faamalolosia o isi.

A o i ai o ia i Harvard i le taumafanafana o le 1961, sa feiloai Hal ma Kathleen Johnson, o le afafine o J. Cyril ma LaPrele Lindsay Johnson, o Palo Alto, i Kalefonia. Sa aoga o ia i aoga o le taumafanafana i Boston, ma sa faamemelo i ai Hal i le taimi muamua na vaai ai ia te ia. Sa vave ona maua e ia se lagona na te faia le mea sili pe a i ai [Kathleen]—o se lagona na faaauau ai pea lava i o la’ua soifuaga faatasi.

Sa tafafao faamasani i la’ua i lena taumafanafana ma faaauau ai pea lava la la’ua mafutaga mafana e ala i le telefoni ma tusi, ina ua toe taliu Kathleen i Kalefonia. Sa faaipoipoina i laua ia Iulai 1962 i le Malumalu o Logan Iuta e Elder Spencer W. Kimball. O le tausaga lava lena na avea ai Hal ma polofesa lagolago i le Aoga Faapisinisi mo Faailoga Maualuluga i le Iunivesite o Stanford.

E iva tausaga mulimuli ane na fiafia ai Hal i le galuega i Stanford ma avea ai ma epikopo o le Uarota Muamua a Stanford. O le nonofo latalata atu o matua o lona faletua, “na seti lelei ai,” na ia tomanatu ai. Peitai, i se vaeluapo i le 1971, sa fafagu ai o ia e Kathleen i ni fesili tulaga ese se lua: “O e mautinoa o loo e faia le mea sa’o i lou olaga?”

I lona tau mafaufau pe mafai faapefea ona sili atu lo laua fiafia, sa fesili ai Hal, “O le a le uiga o lau tala?”

Sa tali Kathleen, “E le mafai ona e faia ni suesuega mo Neal Maxwell?”

Faatoa tofia lava Neal A. Maxwell e avea ma Komesina o Aoga a le Ekalesia. E leai se tasi o Hal po o Kathleen na masani ia te ia, ae sa lagona e Kathleen atonu e mafai e lona toalua ona faia nisi mea e suia ai olaga.

“Fai ni suesuega mo Neal Maxwell—i lenei tulaga ua ou i ai i la’u galuega?” sa tali atu ai Hal. E le gata i lena, sa ia manatu, “o le faia o se suesuega o se mea lea a se tamaitiiti aoga faauu talavou e fai.”

Ina ua mavae sina minute, sa fai atu Kathleen, “E mafai ona e tatalo e uiga i lena mea?”

I le taimi lena o la la’ua ulugalii, na iloa lelei lava e Hal e le tatau ona le amanaiaina le fautuaga a lona toalua. Sa alu ese mai o ia mai le moega, tootuli, ma faia se tatalo. “E leai se tali,” o lana tala lea, “ma sa ou matua fiafia aua ou te lei manao ou te alu i se isi mea.”

O le aso na sosoo ai i le taimi o le fonotaga a le au epikopo, sa oo mai ai se leo ua malamalama lelei i ai Hal, ma a’oa’i o ia i lona manatu mama i le uunaiga a lona toalua. “E te le o iloa le mea o tali mai ala o lau galuega,” o le mea lea na ta’u atu ia te ia. “Afai e toe ofo mai seisi galuega ia te oe, ia e talanoa mai ia te au [le Alii].”

Sa faaletonu Hal i le mea ua tulai mai ma sa toe vave alu loa i le fale. “Ua i ai le faaletonu,” na ia ta’u atu ai ia Kathleen. Sa popole o ia faapea na sese lona le taliaina o le tele o galuega sa ofo atu ia te ia a o i ai i Stanford. “Ou te lei tatalo lava mo se tasi o na galuega,” o lana tala lea. Sa amata ona tatalo o ia ma le lotomaulalo, e uiga i lona lumanai.

E lei atoa se vaiaso talu ona uma fesili a Kathleen i le vaeluapo, ae telefoni ane Komesina Maxwell ma valaaulia Hal i le Aai o Sate Leki mo se fonotaga. Sa malaga o ia i le aso na sosoo ai, ma sa feiloai nei tamalii e toalua i le fale o matua o Hal. O upu muamua nei mai le fofoga o Komesina Maxwell, “Ou te fia talosagaina oe e avea ma peresitene o le Kolisi o Ricks.”

E ui lava i le uunaiga a lona toalua ma le a’oa’iga faaleagaga na ia mauaina, sa lei saunia o ia mo se mea faapea na maofa ai. Sa ia faamatala ia Komesina Maxwell e manaomia lona tatalo i ai. E le gata i lea, e le tele sona silafia i le Kolisi o Ricks. O le taeao na sosoo ai sa latou fono ai ma le Au Peresitene Sili. Ina ua maea, sa ta’u atu ia te ia e Komesina Maxwell, o lana galuega lea pe afai e manao ai.

Ina ua toe taliu atu o ia i Kalefonia, sa faaauau pea ona tatalo faatauanau Hal. Sa oo mai se tali, ae sa toetoe lava ina a ia misia. “Sa ou faalogoina se leo sa matua tau le lagona ma ou te lei manatu mamafa i ai,” sa ia toe tomanatu ai. “Sa fai mai le leo, ‘O la’u aoga.’” Sa ia vili ia Komesina Maxwell ma faapea atu, “O lea ua ou alu atu.”

O le vave lena, na lafoai ai e Hal faamanuiaga o le galuega i Stanford mo se olaga i se fale feavea’i pumoomoo i Rexburg, i Idaho. E tele ni masina pe a mae’a lona faatautoga e avea ma peresitene o le Kolisi o Ricks, i le aso 10 o Tesema, 1971, ona faatoa se’e atu lea ma lona aiga i lo latou fale fou, lea na ia fesoasoani e fausia.

“Sa ou alu i Ricks ma lo’u iloa o ni nai mea,” o lana tala lea. “Ma le isi, e le o au o se tagata taua pei ona sa ou manatu ai e tusa ma lo’u tulaga taua i Stanford. O le isi, sa ou iloaina o lo’u toalua na mauaina muamua le faaaliga nai lo a’u. Ma le mea mulimuli, sa ou iloa o au o se tagata laki i lo’u i ai iina. O lea la, nai lo le taliina o le fesili ‘E mafai faapefea ona ou lafoaia la’u galuega i Stanford?’ Ou te faapea atu, ‘O le Tama Faalelagi na faia lena mea. Sa le’i foliga mai o se osigataulaga.’”

O tausaga e ono na faaalu e Peresitene Eyring i Rexburg, na faamaonia ai o se faamanuiaga lea i lona aiga ma le kolisi. O se fautuaga poto mai se faiaoga faatauvaa o aiga, na fesoasoani e avea ai na tausaga ma mea e manatua pea. O le faiaoga o aiga, o se faifaatoaga e tele lona faatuatua, sa fautuaina Peresitene Eyring, e alu ese mai lona ofisa ina ia mafai ona alu e faafeiloai, faamalosiau, ma avatu le faafetai i faiaoga o le kolisi, le aufaigaluega, ma tamaiti aooga.

Sa tatalo Hal e uiga i le mataupu, sa lagona le uunaia o ia e mulimuli i lena fautuaga, ma amata ai ona tele atu taimi e faaalu faatasi ma tamaiti aooga faamaoni o le aoga ma faiaoga ma le aufaigaluega naunautai. Sa oo ina faiaoga o ia faatasi ma se tasi faiaoga i vasega faalelotu. A o galue malosi o ia e faatulaga ia faavae faaleagaga ma le faalepoto salalau o le kolisi, sa oo ina alolofa i laua ma Kathleen i le aoga faapea foi tagata o Rexburg.

I tausaga sa i ai i latou i Rexburg, sa matua vavalalata le aiga o Eyring. O le taimi lena ua toafa atalii o Hal ma Kathleen: O Henry J., Stuart, Matthew, ma John. Mulimuli ane sa faamanuiaina i laua i afafine e toalua: O Elizabeth ma Mary Kathleen. Peitai, e oo lava i se aai laitiiti faifaatoaga i tua, sa tatau lava ona mataala Hal ma Kathleen. O se tasi o o laua popolega, o le tele ma le tulaga o polokalama faatelevise sa matamata ai le la fanau tama. E manatua e Henry J., le atalii ulumatua, se aafiaga na tulai mai ai se eseesega tele i le agaga o le aiga o Eyring.

“Sa ma nonofo ma lo’u uso i luma o le TV i se tasi po o se Aso Toonai pe tusa o le vaeluapo,” sa faamatala ai e Henry J. “Sa i ai se ata faafaleaitu e masoā le gagana sa sau i le televise ae sa le tatau ona ma matamata ai. Sa pogisa le potu i le fogafale i lalo sei vagana ai le malamalama mai le televise. Na savali mai Tina i totonu e aunoa ma se faailo. Sa fai lona ofumoe paepae totoso ma se seleulu sa uu mai i lona lima. Sa leai se pao, ae na ona aapa atu lava i tua o le tv, toso mai le uaea ma faalapotopoto. Ona tago lea ua momono i totonu le seleulu ma tipi motu ai. Sa feemo aloiafi ma pe ai le tv, a o lei toe savali lemu ese atu Tina mai le potu.”

Sa amata ona agai atu Henry J. e moe, ua tau faapopoleina. Peitai, sa ooti mai e lona uso magafagafa se uaea mai le masini mimiti otaota ua malepe ma faapipii i le tv. E lei pine ae toe saofafai le aualii i luma o le televise, sa toetoe lava ina a leai se mea o le ata na misi.

“E ui i lea, o Tina le tagata na mulimuli ona ’ata,” o le tala lea a Henry J. “Ina ua foi mai i le fale mai le aoga i le Aso Gafua na sosoo ai, sa ma vaaia le tv i le ogatotonu o le fola o le fale, ma se ta’e telē i le lau tioata mafiafia. Sa ma vave masalomia lava Tina. Ina ua fesiligia, sa ia tali lelei mai: ‘Sa ou tafiina le pefu i lalo o le TV, ae se’e ifo ai.’”

Sa faamamaluina e Peresitene Eyring moomooga o lona faletua, sa faamamaluina e le fanau ia faanaunauga o lo latou tina, ma o le mutaaga foi lena o le televise i totonu o le fale o le au Eyring. “E masani lava, e taitai le Tina e ala i faataitaiga le leoa,” o le matau lea a Henry J. “E ui i lea, e musuia foi o ia ma e le fefe. O le uiga tuusa’o o le Tina o se faamanuiaga tele lea i lana fanau ma a latou fanau. E le gata i mea taua e tutupu ae faapea foi i le gasologa o aso taitasi, sa ia suia ai o matou olaga e faavavau.”

E ave pea lava e Peresitene Eyring le faamalo i lona faletua mo le tuuina atu ia te ia o se faanaunauga ia faia le mea sili ma avea ma tagata sili ona lelei, ma e tumu foi o ia i le faafetai aua ua ia faamanuiaina le la fanau i le ala lava lea e tasi. E le faatuai foi ona faamalo [Peresitene Eyring] ia te ia mo ana faataitaiga ma uunaiga faaleagaga mo lo latou aiga. E faapena foi ona faamalo atu le faletua, ma faaali atu lona lotofaafetai mo le gauai atu o [Peresitene Eyring] i le Agaga ma le auala lelei ma le aoga na ia aoao atu ma ola ai i le talalelei i totonu o lo latou aiga.

“Sa lei i ai lava se fesili i le mafaufau o Hal po o ai e muamua i lona loto,” o le tala lea a lona faletua. “Sa ola o ia i se siosiomaga e ese le faatautava ma paaga faigaluega e maoae le tomai i Stanford, ae na te faamuamua i taimi uma lona aiga. I le faaiuga o aso taitasi, pe a matou faatasitasi i le afiafi, e fesili mai ai o ia, ‘O ai lea tatou te le i valaau i ai?’ Ona, alu lea i le telefoni a o taitai e le Agaga, ma faafesootai se tagata o le aiga o loo manaomia ona fesootai i ai i lena afiafi.”

O le leai o se televise i le fale, ua tele ai taimi o tagata o le aiga e feoeoea’i ai le tasi ma le isi, ma ua tele foi taimi e tulitulimatai ai mea sa fiafia i ai, atiina ae taleni, ma auai i taaloga ma isi gaoioiga o se aiga. I le gasologa o tausaga, sa faaleleia ai e Peresitene Eyring ona tomai tau kuka (e fai lava e ia ana falaoa), sa ia maua se taleni mo le vaneina o laau, ma sa ia aoaoina foi le valiina o ata i valivai. O nisi taimi na te auina atu ai se kata faafetai po o se ata valivai e fai ma se faamanatu.

O le taimi nei ua tumu le fale o le au Eyring i atavali, o atavane, ma meaafale sa gaosia lava e ia faatasi ai ma se fesoasoani a ni faiaoga atamamai. O le tele lava o nei fatuga e atagia mai ai lesona aoga po o savali faaleagaga. E le gata i lea, na te faaavanoaina foi le taimi e auina atu ai ni i-meli, ua lauiloa ma le faamama’i i ai “O Papatusi Laiti,” i lona aiga, lea ua aofia ai fanau a fanau e 25.

“O le tusi talaaga o le aiga o Papa, lea na te auina atu e ala i le i-meli i aso taitasi faatasi ai ma ni ata ma saofaga mai le fanau, ua fesoasoani matou te lagonaina ai e pei o la e faamatala a matou tala i le laulau ‘ai i po taitasi,” o le tala lea a Henry J.

E lei silafia e Peresitene Eyring i lea taimi, ae na ia faataatia ese galuega totogi faalelalolagi ina ua ia taliaina le tofiga i le Kolisi o Ricks. O lana galuega o se peresitene o le kolisi ma lana tautua i lena lava taimi o se sui risone ma se sui o le au faatonu aoao o le Aoga Sa, ma na faatele ai ona latou fesootai ma taitai o le Ekalesia, o e na aloaia ana taleni ma meaalofa faaleagaga. O le taimi lea, sa silafia ai e le Alii lona naunau e auauna atu.

I le tuuina atu ia Peresitene Eyring o valaauga taua na sosoo ma ona tausaga e ono i le Kolisi o Ricks, sa sailia e taitai o le Ekalesia ia musumusuga na taitai atu ai i latou ia te ia. I se vaitau o sauniuniga mo na valaauga, sa aoaoina ai o ia e le Agaga a o ia galue, saili le finagalo o le Atua, faafofoga atu mo tali, ma, e faapei foi o ona tuaa, sa ia galue i luga o uunaiga e oo mai. E oo mai valaauga, a ua ia saunia.

I le 1977 sa talosaga atu ai Jeffrey R. Holland, le komesina fou o le OAE, ia Peresitene Eyring, e galue o se komesina lagolago. I le tolu tausaga mulimuli ane, ina ua avea Komesina Holland ma peresitene o le Iunivesite o Polika Iaga, sa avea Hal ma komesina o le OAE. Sa tautua ai o ia i lena tofiga seia oo ina tofia o ia i le masina o Aperila 1985 e avea ma Fesoasoani Muamua i le Au Epikopo Pulefaamalumalu. O lena valaauga sa ia faaaogaina ai ona mau tomai e faia ai ni saofaga iloga i le pulega, fuafuaga o fale ma fanua, mamanuina ma le fausia o malumalu, ma isi mataupu i le itu i le tino. Ia Setema 1992, sa toe tofia o ia o le komesina o le OAE, ma i se masina mulimuli ane, na tofia ai o ia i le Korama Muamua a Fitugafulu.

I le aso 1 o Aperila, 1995, na lagolagoina ai Henry B. Eyring i le Korama a Aposetolo e Toasefululua. Talu mai lena taimi, ua faateleina le vaega o le Agaga ua ia sailia a o ia faamanuiaina tagata o le Ekalesia i le lalolagi atoa i ana saunoaga faamomoiloto, tautua agaalofa, ma le molimau mamana i le Faaola ma Lana talalelei.

Ina ua molimauina e Peresitene Eyring i le konafesi aoao ia Oketopa 2007 ia faamanuiaga o le sailia o le aao o le Atua i o tatou olaga, sa ia saunoa mai i ona aafiaga patino. O le tausia o se tusi talaaga o fesootaiga ma le Tama Faalelagi i aso taitasi o lona soifua, sa ia lagonaina ai le tupu o lana molimau ma sa “atili ai ona ia mautinoa e faafofogaina e le Tama Faalelagi tatalo ma tali mai i ai.”⁴

O le ki i le faalogoina o na tali ma le iloa e i ai le naunautaiga o le Atua i o tatou olaga, na ia saunoa ai, o le atiina ae lea o se taliga e faalogo. “E tatau ona tatou toafilemu ma faalogo. I lo’u olaga, a ou le mauaina se lagona manino pe ua ou misia foi le siufofoga o le Agaga, e afua ona o lo’u pisi tele, vevesi lo’u loto, ma ou pupū i a’u lava mea.”

Sa soifua pea lava pea Peresitene Eyring i iota o le mataupu lona sefulutolu o le faatuatua. Ua matua faamanuiaina lava tagata o le Ekalesia i lona auauna faatasi ai ma Peresitene Thomas S. Monson ma Peresitene Dieter F. Uchtdorf. O se tuufaatasiga tulaga ese o taleni, o se talatuu o le faatuatua, o se soifuaga o sauniuniga, o se tuuto i le auauna atu, ma se naunautaiga e saili le Atua ma faia Lona finagalo ua tulaga ese ai le faaagavaaina o ia e avea ma se tasi o le Au Peresitene Sili.