Atalii ma Afafine o le Atua

Sa ou fanau i ni matua lelei. Sa taofimau lou tama ma lou tina i tulaga faatauaina o le faamaoni ma le amiosao o loo faapea ona aoaoina e le Ekalesia, peitai sa le toaaga i laua. Ae, na ō lava a’u uo i le Peraimeri, ma na faapena foi au. Sa ou lagona le fiafia iina ma ou te lei manao e misi se [aso o le Peraimeri].

Na avea le Peraimeri ma o’u aiga i le Ekalesia. Sa ou alu i le lotu faamanatuga i vaiaso taitasi ma matou saofafai faatasi ma au uo o le Peraimeri. Ou te lei malamalama lelei i le uiga o le faamanatuga, ae na ou iloaina sa ou lagonaina se mea faapitoa pe a ou ai ma inu ai. Sa ou malamalama i le agaga o se feagaiga ao le’i ou aoaoina lena upu.

Ina ua atoa le 12 o ou tausaga, na avea la’u korama o le Perisitua Arona ma o’u aiga lona lua i le Ekalesia. Sa ou lagona se alofa tele ma le faaaloalo mo le perisitua. I le avea ai ma se peresitene o le korama o le au tiakono, sa ou taitaia ni fonotaga, ma pe a faauuina se tiakono fou, ou te faafeiloaia o ia i sina tautalaga puupuu. Ou te manatua lo’u faapea atu, “O le perisitua lenei a le Atua. E tatau lava ona e faamamalu i ai.”

Ina ua uma le aoga maualuga, sa ou auai i le au faaleoleo a le ami. Na tuuina mai e lo’u taitai le avanoa e avea ai a’u ma se alii ofisa o le Ami a le Iunaite Setete. Sa faaaloalo tele o ia ae sa tino ese foi ma malualii. E le mafai ona fai atu i ai se tagata e leai. Na ou fai i ai pe mafai ona ou alu i le fale ma mafaufau i ai.

Na ou tatalo i lena po, ma na oo mai i lou mafaufau le tatalo o le papatisoga o loo maua i le Mataupu Faavae ma Feagaiga 20:73: “Ona ua tofia au e Iesu Keriso, ou te papatiso ia te oe i le suafa o le Tama, ma le Alo, ma le Agaga Paia.”

Na ou toe foi atu i le taeao na sosoo ai ma tau atu i lou taitai na ou filifili e talia se tofiga—ae o le a tofiaina au e le Tama Faalelagi ma Lona Alo, o Iesu Keriso. Na ou faamalamalama atu i ai o le a ou faia se misiona mo la’u ekalesia.

Sa matagofie le lagona o le taliina o lena tatalo, ma sa ou lagonaina pea lava pea a o ou tatalo mo ni filifiliga taua. Na foliga mai ua leva ona ou iloaina e silafia ma alolofa le Tama Faalelagi ma Iesu Keriso ia te a’u. Atonu na amataina lava lo’u liua i le taimi muamua na ou auai ai i le Peraimeri ma lagona ai iina le Agaga. Na faaauau ai i au Korama a le Perisitua Arona faapea ma totonu o le misiona. O loo faaauau ai lava i le aso.

O i tatou uma o atalii ma afafine o le Tama Faalelagi. E le galo lava ia te Ia lenei mea, ae o nisi taimi e galo ai ia i tatou. O lea ua Ia tuuina mai ai ia i tatou le mataupu faavae o le faatuatua e fesoasoani tatou te manatua ai. Ina ia fesoasoani tatou te atiina ae ai le faatuatua ia te Ia, ua tuuina mai ai e le Tama Faalelagi ia i tatou le meaalofa o aafiaga. Pe a ou toe tepa i tua i lo’u olaga, ou te faafetai mo aafiaga na fesoasoani i le faateleina o lou faatuatua.

Ia fiafia i aafiaga o le a tuuina mai e le Tama Faalelagi ia te outou. Aoao mai ai mea e finagalo o Ia e te aoaoina. E tuuina mai e le Tama Faalelagi ia i tatou taitoatasi o aafiaga o le a fesoasoani e faateleina ai lo tatou faatuatua ia te Ia ma Lona Alo.

Afai o nisi o ou aafiaga e faanoanoa, faamolemole ia manatua o oe o se atalii po o se afafine o lou Tama oi le Lagi ma e alofa o Ia ia te oe. O se taula mautinoa lenei o le a le mafai lava ona aveesea. Le mafai lava! E faavavau ma ua mautu i le ata o le faaolataga. E ao lava ona e uumauina e tusa lava po o le a.