Faiga o Mekasini a le Ekalesia

Pe o e tau manatunatu ea pe na faapefea ona maua mekasini a le Ekalesia? A e Pe na e mafaufau ea, pe faapefea ona maua ia mekasini a le Ekalesia? A e vaavaai i lau mekasini lena e uu i ou lima, pe e te tau manatunatu ea po o ai na tuufaatasia ma pe na faapefea foi ona fai?

Tatou o i se maimoaga taamilo ma le faatonu o mekasini a le Ekalesia, e faailoa mai ai le ala o loo tuufaatasia ai nei lomiga.

A o e faitauina le mekasini lenei, ae ua amata foi fuafuaga mo le isi mekasini o le tausaga o lumanai. O lona sauniaina, o le a mulimuli ai faatonu o mekasini i faatonuga mai nisi o sui o le Au Fitugafulu, o e e fefaasoaai i fautuaga mai le Korama a Aposetolo e Toasefululua ma le Au Peresitene Sili e uiga i autu, e tatau ona aofia ai e fesoasoani e faamalosia ai le au paia. O tusiga e filifilia pe fatuina, e faalagolago i fautuaga a le Usoga.

Fuafuaina o se Lomiga

O le fuafuaina e amata ai lava i taimi uma le Liahona, lea e oo i le 51 gagana e lolomi ai. E lolomi faalemasina i gagana e 21. O gagana e laiti ifo tagata e faatauina, e mafai ona maua e le au faitau ia le Liahona e faafa pe faaono i le tausaga. O gagana e aupito laiti tagata e faatauina latou te mauaina se mekasini e faatasi, faalua, pe faatolu foi i le tausaga.

O le Liahona e aofia ai tusiga mo tagata matutua, autalavou, ma tamaiti, e aofia ai foi se vaega mai le lotoifale, o tala fou mo tagata o le au paia i se eria patino o le Ekalesia.

Ua talosagaina e taitai o le Ekalesia ina ia faaaogaina i le latalata e mafai ai ia tusiga o loo faaaogaina i le Liahona ia tutusa ma tusiga o loo lomia i mekasini a le Ekalesia e na o le Igilisi o loo i ai: o le Ensign, New Era, ma le Friend. O le fuafuaina o lomiga o masina taitasi o le Liahona, e taumafai ai ma le agaga tatalo ia faatonu e filifili po o le fea tusiga e aupito manaomia e tagata o le ekalesia i le lalolagi atoa. O le tusiga e filifilia e toe iloiloina e le au Pulega Aoao o e o loo avea ma faufautua i le Matagaluega o Mataupu Aoaoina.

O Punavai Autu e Fa mo Tusiga o Mekasini

O tautalaga po o tusitusiga a perofeta ma isi Au Pulega Aoao po o taitai o le Ekalesia, e mafai ona avea o ni tusiga.

E tusia e le Au Fitugafulu ma au peresitene o ausilali ia tusiga e lagolago ai kosi aoaoina a le Ekalesia.

E tusia e faatonu o mekasini a le Ekalesia ia tusiga pe a uma ona faia ni suesuega i se autu pe asia foi le Au Paia o Aso e Gata Ai i se nofoaga faapitoa.

O outou, le au faitau, ia tusi ni tusiga. O a outou tusiga e auina mai o le a mafai ai ona lagona atu leo o le Au Paia o Aso e Gata Ai mai le lalolagi atoa i mekasini.

O Lona Tuufaatasia Atoa

I soo se aso atofaina o le tausaga, o le a saunia ai e le aufaigaluega o le mekasini ia ni lomiga eseese mo masina o lumanai. O nei mea e faia i vaega eseese, mai le muai fuafuaina e oo i le siakiina mo ni mea sese i le kalama ma le sipelaga e oo i le lolomiina mo le lomiga o le masina e sosoo ai. (O le fale lomitusi autu a le Ekalesia i le Aai o Sate Leki, e lolomiina na o mekasini faaPeretania ma le tele o lomiga o le Liahona.) O le tusiaina ma le faasa’osa’oina o tusiga e tusa ma le valu masina e faamaeaina ai a o lei oo i le aso e lolomiina ai mo lomiga taitasi o le mekasini. Ae peitai, afai e i ai se mea e aliae mai i totonu o le isi tolu po o le fa masina, lea e tatau lava ona aofia i mekasini a le Ekalesia, e mafai e faatonu ona aveese mai se tusiga sa fuafuaina ae sui ai le tusiga fou.

E faia se toe iloiloga o mekasini uma a le Ekalesia i ona anotusi i le sili atu ma le tasi se vaega. E faasa’oina ia tusiga, e faitauina e tagata iloilo ua tofiaina, e aofia ai nisi o sui o le au Fitugafulu. A maea lenei toe iloiloga, ona auina atu lea o mea ua faamaonia i le au fai mamanu, e faatulaga le taatitia o tusiga i luga o itulau. E mafai ona latou filifilia ia ata pue ma ata tusi ua i ai nei pe okaina foi ni ata pue ma ata tusi fou. Talu ai ona e tatau lava ona lava se avanoa o itulau o le Liahona e faaavanoa mo faaliliuga a gagana eseese, o lea e fuafuaina ai se avanoa faaopoopo i tusiga taitasi. A maea ona fuafuaina, ona toe iloiloina lea o itulau e sui o le au Fitugafulu ma se tagata se toatasi pe sili atu foi o le Korama a Aposetolo e Toasefululua.

O le faagasologa o le gaosiga o le mekasini e aofia ai pe a ma se masina mo le faaliliuina o tusiga o le Liahona. O tagata faaliliu o tagata lava o le Ekalesia o e o loo nonofo i soo se itu o le lalolagi. Latou te feaveaia ma le laumua o le Ekalesia ia tusiga o le Liahona i ala faaeletonika.

Fuafuaina o Mamanu ma le Gaosiga

O faatonu o le Liahona ma le Ensign o loo talanoa i le faatulagaga o tusiga i totonu o se lomiga o le a sosoo mai.

E filifili e le au fai mamanu se faatulagaga ma ata tusi po o ata pue e fesoasoani e aoao atu ai mataupu faavae faaleagaga o loo taua i tusiga. O i, o loo faaali atu ai e le faatonu o faatufugaga o le Liahona ia faatulagaga fautuaina i le au faigaluega o faatonu ma i latou e faia mamanu.

E fatu e se tasi e faia mamanu le faatulagaga o tusiga, latou te filifilia ia ata tusi po o ata pue, pe a manaomia, mai tagata tusiata ma pueata faapolofesa.

Taumatau mamao: Galulue e ala i le i-meli ma le au faaliliu i le lalolagi atoa, maua e tusiata ia faamaoniga mo le faatulagaga o itulau. Taumatau: O le gaosiga o mekasini i gagana e 51 e manaomia ai le faia o faatulagaga o itulau i luga o le komepiuta ma iloilo ia faasaoga i gagana taitasi.

Auina Atu o Mekasini ia te Oe

O fuafuaga faamaonia mulimuli o itulau o mekasini e aveina atu i faatonu mo le toe siakiina mo ni mea o sese. Ona auina atu lea o itulau e ala i le komepiuta i le ofisa autu e lolomi ai i le lima masina a o lei oo i le aso e auina atu ai mo le Liahona faaPeretania, e lua masina mo isi gagana o le Liahona, ma le lua masina mo le Ensign, New Era, ma le Friend. O vaega o tala fou o le Liahona e avatu mo le lolomiina pe a ma le lua masina a o lei oo i le aso e auina atu ai ae mo le Ensign e pe tusa ma se masina a o lei oo i le aso e auina atu ai.

O mekasini ua uma ona lolomiina e fusi i ni faaputuga ma lafoina atu i eria i fafo atu o le Iunaite Setete mo le tufatufaina i ni auala eseese, e aofia ai le tufatufaga o meli i le lotoifale. I totonu o le Iunaite Setete, e lafoina atu [Liahona] e ala i le United States Postal Service [Falemeli a le Iunaite Setete]. E muamua lava auina atu mekasini i eria e sili ona mamao ae mulimuli lava i le au faitau i Iuta. Ua fuafuaina ia taunuu atu mekasini a o le’i oo i le Aso Sa muamua o le masina o le aso lea o loo tusia ai, ae o nisi taimi e sui ai.

O lena la ua i ou lima le mekasini, matou te faamoemoe o le a e silafia ai e fesoasoani i lou tuputupu ae faaleagaga. O tusiga e ono taua ai le soifua maloloina faaletino, mea tautupe, ma isi autu ia tatou te oo uma i ai i lenei olaga i le tino, ae o lo latou faamoemoega autu lava, o le fesoasoani lea e faamalosia lou faaleagaga.

Afai e i ai se vaega e te fia saunoa ai e uiga i tusiga e te faitau i ai iinei, o le a matou fiafia lava i se tala mai lau susuga (tagai i le tuatusi o loo i le itu taumatau). Afai e te fia fautuaina mai ni auala e faaleleia atili ai le taulimaina o ou manaoga faaleagaga, matou te fia iloa foi lena tulaga. O mea uma e mafai ona tatou aoao ai e fesoasoani i le tautuaina lelei o le au faitau, o le a faamanuiaina ai oe faapea foi ma i matou.

Lolomiina ma le Tufatufaina

O itulau lautetele ua lolomiina e ui atu i se masini e tuuina ai i le faasologa sa’o, tuu i ai ma le faavaa, ona “sui faatasi” (faapipii) lea. Ona oti ese lea o pepa e silisili o mekasini taitasi.

O mekasini ua uma ona tapena e teu faatasi mo le meliina pe lafoina mai le faletusi tutotonu o le Ekalesia i le Aai o Sate Leki.

I fale tetele lea o loo teuina ai isi mea ua uma ona lolomiina, e siakiina ai e se tagata faigaluega ia mekasini ua uma ona tapena mo le lafoina.

E tasi le tausaga a o lei oo i le aso e auina atu ai le Liahona: ae ua maea ona fuafuaina. O tusiga e filifilia pe tusia foi.
O le sefulu masina a o lei oo i le aso e auina atu ai: e faia ai faasaoga i le kalama ma le sipelaga o tusiga e tusia e faatonu o le au faigaluega, au peresitene o ausilali, po o Au Pulega Aoao. O tusiga foi e auina mai e le au faitau e faasa’osa’oina ai foi i le taimi lenei.
O le iva masina a o lei oo i le aso e auina atu ai: e iloiloina ai tusiga e se komiti ua tofia faapea le Au Pulega Aoao.
O le valu masina a o lei oo i le aso e auina atu ai: e faatulagaina ai tusiga i o latou tulaga i totonu o le mekasini. (E talitutusa lava aso e faamaeaina ai [laasaga] mo le Friend, New Era, ma le Ensign lea e sosoo ai i le lua i le tolu masina mulimuli mai.)
O le fitu i le valu masina a o lei oo i le aso e auina atu ai: e mafaufau ai le au fai mamanu kalafi ma fuafua le mamanu o tusiga; e faakonekarate ia le tusiga ma le pueina o ata ina ia maua mai ai ata tusi po o ata pue ua atofaina.
O le ono masina a o lei oo i le aso e auina atu ai: e iloiloina e le Au Pulega Aoao le faatulagaga ma le mamanu o itulau mo tusiga o le Liahona. Auina atu tusiga i le au faaliliu.
O le ono masina a o lei oo i le aso e auina atu ai: e amata ai ona avatu i le komepiuta ia itulau faaeletonika o le Liahona faaPeretania i le vaega a le au faigaluega a o lei lolomiina e fai ai le tapenaga muamua mo le lolomiina. E sosoo mai ai ma vaega o isi gagana pe a uma ona faaliliuina ma faatulaga.
O le lua masina a o le’i oo i le aso e auina atu ai: ua amata ona lolomi. O le Friend, New Era, ma le Ensign o le a sosoo atu i le Liahona i masini lomitusi i le fale lomitusi autu a le Ekalesia i le Aai o Sate Leki, Iuta.
E tasi i le lua masina a o lei oo i le aso e auina atu ai: e laiti nai gagana o le lomiga o le Liahona e lolomiina i o latou atunuu e tufatufaina ai.
E tasi i le lua masina a o lei oo i le aso e auina atu ai: amata ona lolomi, tuu i atigipusa, ma tufatufaina. E muamua ona auina atu mekasini i eria e sili ona mamao mai le Aai o Sate Leki. I le tele o atunuu, e tilivaina atu i tagata na totogi saofaga [mo mekasini] e ala i falemeli i le lotoifale. I isi atunuu, e tufatufa i uarota ma paranesi.

AU AU MAIMOA

O le au faigaluega e tusia ma faia faasaoga o tusiga mo tagata matutua, mo le autalavou, ma mo tamaiti e tatau ona manatua ia eseesega faavae a o tatou tagata faitau. O i latou e aumaia tusiga mo tamaiti, ua silafia o le vaitausaga o le 6 i le 12, e faia ai e tamaiti ni suiga maoae i o latou mana faaleatamai ma lo latou tuputupu ae faalelagona. Ua malamalama faatonu o loo tupu foi lenei mea a o faasolosolo matutua le au faitau talavou. O i latou o e aumaia tusiga mo tagata matutua, e taumafai e manatua e eseese le matutua, tulaga o le olaga, ma tulaga faalefaaipoipoga o le au faitau.

A tatou mafaufau foi i le maaleale o le faailoaina o manaoga o le au faitau i le lalolagi atoa, e foliga mai ai le galuega o se mea lofituina. Talu ai ona e le mafai ona faamalieina uma manaoga o le au faitau uma lava i se lomiga se tasi, matou te taumafai ai e ala i lomiga o tausaga taitasi e auina atu ia mea e aoga ma musuia mo o tatou au faitau uma i tulaga eseese o le olaga po o totonu foi o se vaega o vaitausaga.

TUUINA MAI O AU TUSIGA

E masani ona mafaufau tagata o le ekalesia pe faapefea ona latou fai saofaga mai i mekasini a le Ekalesia. E mafai ona auina mai soo se tusitusiga toeitiiti o soo se autu lava, ae atonu o le a e matauina o tusiga o loo aoao ai uiga o aoaoga faavae po o uiga o mau e masani lava ona tusia e le Au Pulega Aoao.

O lou avanoa lelei lava e te fai saofaga ai i le mekasini o lou tusi lea e uiga i ou lava lagona po o aafiaga faaleagaga. A e tusi e uiga i mea o loo e iloa ma oo i ai, e tauaveina e au tusitusiga le taua o le moni ma le faamaoni. Faamolemole ia manatua o mea e te tusia e tatau ona talafeagai mataupu faavae i le au faitau i le tele o atunuu ma aganuu.

Atonu e te finagalo e faafesootai mai i matou e fesiligia ai pe matou te mananao i se tusiga ae e te lei tusiaina. O lena faiga, e mafai ai ona matou tauina atu pe fetaui le autu ma fuafuaga a faatonu o mekasini. O le tuatusi o le pusameli mo mekasini a le Ekalesia o le Liahona (po o le Ensign po o le New Era po o le Friend), 50 E. North Temple St., Rm. 2420, Salt Lake City, UT 84150-3220, USA. E tutusa lava le tuatusi o le i-meli ma le igoa o le mekasini, sosoo ai ma le @ldschurch.org, mo se faataitaiga, liahona@ldschurch.org.