E te Manao Ta Te O i le Peraimeri?

E ioeina e tagata uma lava i le vasega tolu, e aofia ai ma au, o Christy o le sifi o laau faalalava ma taupega. E leai se tagata e vave atu lana pe’a pe maualuga atu lana taupe nai lo Christy. Ma e faapena foi lona lelei i taaloga. Ae o le mea aupito taua ia te au e uiga ia Christy, o i maua o se uo lelei lava. I se tasi aso i le taimi o le malologa i le aoga, na fesili mai ai Christy, “E te manao ta te o i le Peraimeri?”

Ou te lei faalogo muamua lava e uiga i le Peraimeri. “O le a lena mea?” o lau fesili lea.

Sa faamalamalama mai e Christy, “o le Peraimeri o se mea e faapitoa i la’u lotu mo na o tamaiti lava. Afai e te alu, o le a usuina ni pese, maua ni uo fou, aoao ni mea fou, ma e mafai ona e feiloai ai i lo’u faiaoga Peraimeri, e ese le lelei.”

“E pei lona lelei o Mrs. Palmer?” na ou fesili ai, ma le mautinoa e leai se faiaoga e sili ona lelei e pei o lo’u faiaoga o le vasega tolu.

Na ata Christy. “Ioe, e pei lava lona lelei o Mrs. Palmer.”

Ina ua tuua le aoga, sa ou tamoe loa i le fale e fesili i lo’u tina pe mafai ona ou alu i le Peraimeri. Peitai sa le tutusa le sagisagi o Tina i lea manatu e pei o au. “Ou te manaomia nai nisi faamatalaga faaopoopo,” na ia fai mai ai. “O le a le igoa o le lotu a Christy?”

Ia, o se fesili faigata lena na amata ai, ona sa ou fai atu ia Tina, “ou te le manatua le igoa. E umi lava ma ou te lei faalogo muamua i ai.” Sa ou iloa atu lava i foliga popole o Tina e sese le tali lea na ou fai atu ai.

“Faatali la. Sei ou valaau i le taimi nei lava i le tina o Christy!” Sa ou tamoe atu i le telefoni ma vili loa le numera a Christy ao lei faia mai se isi upu a Tina.

E faalua ona tatagi le telefoni ona tali mai lea e Christy. “Talofa?”

“Christy!” na ou valaau ai. “O le a foi le igoa o le tou lotu?” Sa ou faalogo ma le totoa ona ou fai atu lea, “Tina, o le igoa o le lotu a Christy O Le Ekalesia a Iesu Keriso o le Au Paia o Aso e Gata Ai.” Ina ua le aluese le faauu o foliga o Tina, na ou iloaina sa ou manaomia se fesoasoani. Sa ou faapea atu i le telefoni, “Christy, mata e mafai ona talanoa mai lou tina i lo’u tina e uiga i le Peraimeri?”

Ou te manatu na lagona e Christy le popole i lou leo ona na o le lima lava sekone ae oo ifo lona tina i le telefoni. E lei umi ae talanoa ma talie o ma tina e pei o se uo ua leva. Ona fai atu lea o lo’u tina i le tina o Christy, ua lelei, e mafai ona ou alu i le Peraimeri!

O le taimi muamua na ou alu ai i le Peraimeri, na fai ai mea uma lava na fai mai Christy o le a ou faia ai ma isi mea e tele. Na sa’o lava Christy—e ese le lelei o le matou faiaoga Peraimeri. Na pei uma lava o Mrs. Palmer le lelei. Sa ia tuuina mai foi la’u lava tamaitusi.

Sa ou foi i le fale i lena aso ma faaali atu i lou Tina la’u tamaitusi ma faamatala i ai mea uma e uiga i le Peraimeri. Sa ou usuina foi le “Pese Faatalofa” (Tusipese a Tamaiti, 260) ia i latou ma ou tuagane e toalua, lea sa usuina e tamaiti uma ia te au. A o vaavaai lou Tina i le ata o Iesu Keriso o loo i le pito i luma o lau tamaitusi ma faitau nisi o itulau, sa filemu o ia, ma ni vaaiga mafaufau loloto i ona foliga. Ona fai mai lea e mafai ona ma o ma Christy i le Peraimeri i vaiaso uma lava pe a ou manao ai.

Sa mautinoa lava lou manao ai, ae sa na o ni nai taimi lava na ou alu ai ona, na tuua aoga ma na o lo matou aiga i se tafaoga o le taumafanafana. Sa uta le matou taavale ma tietie atu mai Kalefonia e tau atu i le faatoaga a lou tinamatua i Ilinoi.

O le aso lona lua o la matou malaga, a o matou ui atu i Iuta, sa matou vaaia ai laupapa faailo i luga o le auala na tusia ai le igoa o le lotu a Christy. Sa valaaulia ai tagata e matamata i se mea na taua o le nofoaga autu mo tagata asiasi i le Aai o Sate Leki. Na fai mai Tina, e fia afe ai e fia iloa atili e uiga i le Ekalesia.

Ina ua matou savavali atu i faitotoa o le nofoaga autu mo tagata asiasi, sa faafeiloai i matou e se alii foliga faauo na fai sana pine o lona igoa. A o ia faamatamataina solo i matou, sa tele ni fesili a Tina, ma na foliga mai sa fiafia le alii e tali ia fesili uma. Ina ua uma la matou matamataga faataamilo, na tusi e Tina lona igoa ma le tuatusi i le tusi o tagata asiasi ma maka se pusa i le upu “IOE” na sosoo ai, na fai atu ai na manao e maua nisi faamatalaga faaopoopo e uiga i le Ekalesia.

Ina ua matou foi atu i le fale mai la matou tafaoga, na oo mai ni alii talavou se toalua na taua i laua o faifeautalai i lo matou falemautotogi. Sa la fai mai, o i laua o faifeautalai na la maua se feau mai le nofoaga autu mo tagata asiasi i le Aai o Sate Leki, e faapea na fia maua e Tina ni faamatalaga atili e uiga i le Ekalesia. Sa la fai mai, o le a la fiafia lava e aoao lo matou aiga e uiga i le fuafuaga a le Tama Faalelagi ma le talalelei a Iesu Keriso. O le taimi lena na amata ai ona aoao e faifeautalai lo matou aiga.

O le taimi muamua na matou o faatasi ai i le lotu, na ou fai ai i lou aiga, ia mautinoa ia matou piilima pe a matou savavali i totonu o le falesa. Sa ou aoaoina i le Peraimeri o se auala lea e faaali ai le faaaloalo. Sa matou taumafai uma lava e piilima o matou lima, ae na toatele naua ia tagata na o mai e faatalofa ma faafeiloai i matou i le lotu, o lea sa le umi ai ona matou piilima.

I le faaiuga o a matou lesona ma faifeautalai, sa la fesili ai ia Tina pe manao e papatisoina o se tagata O Le Ekalesia a Iesu Keriso o le Au Paia o Aso e Gata Ai. Sa faapea atu o ia, e manaomia ona ia tatalo i ai. O le aso na sosoo ai i le 6:00 i le taeao, na telefoni atu ai Tina i faifeautalai ma fai i ai, sa tatalo o ia i le po atoa e uiga i le papatisoga ma o le tali o le ioe! Sa matou tauina foi i ai ma ou tuagane matou te mananao foi ina ia papatisoina.

Ou te manatua pea le laa atu i totonu o le vai i le faatanoa o le vai papatisoga. Sa fai lou ofu paepae ma na matuai ou lagonaina lava le fiafia, o lea na ou fia ata leotele ai ma alaga i lena lava taimi e tasi. Na ou tilotilo ae i luga ma vaaia ai Tina ma ona loimata o le fiafia. Ona ou tilotilo atu lea ia Christy, o le sa pei lava foi lona fiafia o lo’u fiafia aua o nei mea uma na amataina ina ua ia fesili mai, “E te manao ta te o i le Peraimeri?”