I le Paolo o Ona Apaau

E lei leva ona mae’a au aoaoga faavae o se ave vaalele i Phoenix, Arisona, ae faamaonia au i le uma ai o ni nai itula o ou lele toatasi, e faataitai ona ou lele na o au e sopoia ai le setete. O lenei mea o le a aofia ai se malaga e lua itula mai Phoenix i Tucson ma le toe foi mai i Phoenix.

O lou fiafia tele i lou lele na o au i le 10,000 futu (3,000 m) i luga ae o le lalolagi ma matamata i le mananaia o ao, mauga, vanu, ma le toafa, na ou tau le mafaufau ai i le le lava o lo’u poto masani ma ni tulaga matautia e ono i ai o loo faatalitali mai mo au.

Sa ou siakiina le tau, faatumu le ata fuafua o lau malaga, ma aumai se leitio, tapasa, ma mea faigaluega autu mo malaga. E pei ona masani ai i le tulaga lenei o aoaoga ave vaalele, e le’i iloga ona lava au aoaoga i le faaaogaina o mea faigaluega e faigata atu. Ae o le vaalele tuai o le a ou lele ai, na leai ni mea faigaluega faigata e mafai ai e se pailate ona lele e aunoa ma le iloa atu o le eleele.

Sa fai si ou popole i le taimi na amata ai ona ou aluese mai na o au i lau tamai vaalele nofoa tasi lanu samasama e tasi le afi, ae o le malaga mai Phoenix i Tucson na lelei lava. Sa matuai ou fiafia lava i ou tomai fou i luga o le ea.

I lou mimita ma lo’u to’a i le toe 120 maila (190 km) na totoe, na ou aluese ai mai Tucson mo Phoenix i le leva o le aoauli. Ae peitai, na fetaui lava lou i luga o le ea, ae faafuasei ona maua au i ave malolosi o le savili o lea na faigata ai ona ou taofiofia le maualuga o lou vaalele. Na vave ona siomia au e se matagi pefu, ma na le mafai ai ona ou iloa atu fafo. Na felafoai lou vaalele i lea itu ma lea itu, sa le mafai ona ou taulimaina le vaalele ma na iu ina ou matuai le mautonu lava ma ou fefe, aua ua ou iloa ua lamatia tele lou latalata atu i atumauga o Katalina.

I le le mautonu, na ou mafaufau ai i lou olaga. Na fai la’u faamau ma le fuafuaga ou te faaipoipo i le masina na sosoo ai i le Malumalu o Mesa Arisona. Sa ou faia se misiona faamamaluina. Sa ou taumafai i taimi uma e usitai i poloaiga ma faalogo i uunaiga a le Agaga Paia. Afai ou te manaomia se taitaiga faalelagi, ia o le taimi tonu lava lenei. Na toetoe lava a leai sou faamoemoe, o lea na ou faia ai se tatalo le leoa. O le taimi lava lena na musumusu mai ai le Agaga ia te au, “Faalagolago i lau leitio, lau tapasa, ma au mea faigaluega, ma tuutuu i lalo lou [vaalele].”

Sa vave ona ou faaifo ane i le selau ma ona tupu futu. Sa le mafai lava ona iloa atu se mea i fafo, ae i lalo ifo, na mafai ona ou tau iloa atu ai le auala taavale ma auala o nofoaafi. O le faaaogaina o au mea faigaluega ma le mulimuli i faailoga na iloa atu i le eleele, na iu ai ina mafai ona ou tu laueleele i Phoenix ina ua maea se aafiaga taufaamatau e lua itula.

Ou te faafetai pea mo uunaiga a le Agaga Paia ma le folafolaga o loo i le Salamo: “Ou te faatuatua foi i le paolo o ou apaau” (Salamo 57:1).