Savali a le Au Peresitene Sili
Faalogo i Siufofoga o Perofeta
O se fiafiaga ma se faamanuiaga le avea ai o se vaega o lenei Ekalesia i le lalolagi atoa, ma le aoaoina ma le faagaeetia e perofeta, tagatavaai, ma talifaaaliga! O i tatou o tagata o lenei Ekalesia e tele gagana tatou te tautatala ai, ma omai mai le tele o atunuu, ae tatou te fefaasoaai i faamanuiaga e tasi o le talalelei.
E moni lava o se Ekalesia lenei i le lalolagi atoa, ma ona tagata ua salalau i atunuu o le lalolagi ma folafola atu le savali aoao o le talalelei a Iesu Keriso i tagata uma, e aunoa ma le mafaufau i le gagana, ituaiga, po o atunuu e tupuga mai ai. O i tatou uma o fanau agaga a se Atua soifua ma alofa, o lo tatou Tama Faalelagi, o le e finagalo ina ia tatou manuia i la tatou malaga toe foi atu ia te Ia.
O Lona agalelei, ua Ia tuuina mai ai perofeta e aoao i tatou i Ana upumoni e faavavau ma taiala i tatou ia ola ai i Lana talalelei. O le tausaga lenei ua tatou faamavae atu ai i se perofeta pele o Peresitene Gordon B. Hinckley (1910–2008), o le na taitaiina i tatou mo le tele o tausaga seia oo ina valaauina o Ia e le Alii e foi atu. O lenei ua tatou agai i luma i le taitaiga a le perofeta fou o le ua valaauina e le Alii e taitaiina i tatou, o Peresitene Thomas S. Monson. O le alofa tele o lo tatou Tama ia i tatou, ua Ia tuuina mai ai perofeta o o tatou taimi e taitaia i tatou i se faasologa e le motusia talu mai le Toefuataiga o lenei galuega tele e ala i le Perofeta o Iosefa Samita i le popofou o le vaitau 1800. Tatou te teufatuina i taimi uma mea e manatua ai le Au Paia anamua—o lo latou ositaulaga, faanoanoaga, ma loimata ae faapea foi lo latou lototele, faatuatua, ma le faalagolago i le Alii a o latou mulimuli foi i Lana perofeta o o latou taimi.
E leai ni o’u augatama i paionia o le seneturi lona sefuluiva. Ae peitai, mai lava i le taimi muamua na ou auai ai i le Ekalesia, ou te lagona lava lou latalata atu i na paionia anamua o e na sopoia laufanua lafulafua. O i latou o ou augatuaa faaleagaga, e pei foi ona avea ai i latou ma augatuaa faaleagaga o tagata taitoatasi uma o le Ekalesia, po o le a lava le atunuu, gagana, po o le aganuu. Ua latou faatuina e le gata o se nofoaga saogalemu i Sisifo ae faapea foi o se faavae faaleagaga mo le fausiaina o le malo o le Atua i atunuu uma o le lalolagi.
O i Tatou Uma o Paionia
E pei ona taliaina nei e le lalolagi atoa le savali o le talalelei toefuataiina a Iesu Keriso, o i tatou uma o paionia i o tatou lava eria ma tulaga. O le vaitaimi faigata ma le le mautonu i Siamani i le maea ai o le –Taua Lona Lua o le Lalolagi na faalogo muamua ai lou aiga i le Ekalesia a Iesu Keriso o le Au Paia o Aso e Gata Ai. O Siaosi Alapati Samita (1870–1951) sa Peresitene i le vaitau lena. Sa ou laitiiti lava, ma e faalua ona aveesea a matou mea uma i totonu o le fitu tausaga. O i matou o ni tagata sulufai na le mautinoa se lumanai. Ae peitai, i na lava tausaga e fitu, sa tele atu mea na matou mauaina nai lo soo se mea e mafai ona faatau i tupe. Sa matou maua se sulufaiga faalelagi, o se nofoaga o le puipuiga mai mea tiga: o le talalelei toefuataiina a Iesu Keriso ma Lana Ekalesia, na taitaiina e se perofeta moni ma soifua.
O le vaitaimi lea o lou laitiiti, sa ou taaloalo ai fale na faaleagaina i pomu, ma ola ae i taunuuga faifaipea o se taua na faiaina ma le iloa lelei o lou lava atunuu na mafua ai mafatiaga tiga o le tele o atunuu i le vaitaimi leaga o le Taua Lona Lua.
O le tala fiafia e faapea ua faia e Iesu Keriso le Togiola atoatoa mo tagata uma, faaolaina tagata uma mai le oti ma tauia tagata taitoatasi uma e tusa ma ana lava galuega, o le mana faamalolo lea na toe aumaia le faamoemoe ma le toafilemu i lou olaga.
Po o a lava o tatou luitau o le olaga, e mafai ona faamamaina a tatou avega pe afai, e le gata ina tatou talitonu ia Keriso ae faapea foi i Lona gafatia ma Lona mana e faamama ma faatoafilemu o tatou olaga. E faamaloloina o tatou olaga pe a tatou taliaina Lona filemu.
Na avea Peresitene Tavita O. MaKei (1873–1970) ma perofeta i le vaitaimi o lou talavou. E pei lava ou te masani lelei ia te ia. E mafai ona ou lagona lona alofa, agalelei, ma le mamalu; na ia tuuina mai ia te au le talitonu ia te a’u lava ma le lototele i lou olaga talavou. E ui ina sa ou ola ae i le mamao e fia afe maila i Europa, na ou lagonaina sa ia talitonuina au, ma ou te lei manao ou te faia se mea e le fiafia ai ia te au.
O le isi puna o le malosi o se tusi na tusia e le Aposetolo o Paulo a o faafalepuipuiina, na tusi atu ia Timoteo, o lona fesoasoani ma le uo aupito faamoemoeina. Na ia tusia:
“Aua ua le foaiina mai e le Atua ia te i tatou le Agaga e matatau ai; a o le agaga e faamalosi ai, ma alofa ai, ma mafaufau tonu ai.
“O lenei, aua e te ma i le molimau i lo tatou Alii” (2 Timoteo 1:7–8).
O upu nei mai se tasi o Aposetolo anamua a lo tatou Faaola, na matuai taua le tatagi ia te au i le vaitaimi o le maea ai o le taua, e faapena foi i aso nei. Ae e toa fia i tatou ua faatagaina o tatou popolega e pulea o tatou olaga i nei vaitaimi o feteenaiga faavaomalo, le mautonu o tamaoaiga ma upufai, ma luitau faaletagata lava ia?
O Se Siufofoga e Tasi
O loo talanoa mai le Atua ia i tatou i se siufofoga e tasi. O le a tutusa uma lava le taulimaina e le Atua o aiga uma. Atonu tatou te i ai i se uarota toatele po o se paranesi toagaogao, atonu e eseese ia tau po o laau, atonu e eseese foi aganuu ma gagana, ma faapea foi ona matuai eseese le lanu o o tatou pa’u. Ae o le mana aoao ma faamanuiaga o le talalelei toefuataiina o loo avanoa mo tagata uma, e le ta’ua ai aganuu, atunuu, faiga faaupufai, agaifanua, gagana, siosiomaga o le tamaoaiga, po o aoga.
O aso nei, ua tatou maua ni aposetolo, tagatavaai, ma talifaaaliga o i latou o leoleo i luga o le olo, o avefeau faalelagi, ma le upumoni faamalolo. E fetalai mai le Atua ia i tatou e ala mai ia i latou. Ua latou silafia lelei ia tulaga eseese o loo tatou ola ai. Ua i ai i latou i le lalolagi ae le o ni e o le lalolagi. Latou te faasino mai le ala, ma ofo mai le fesoasoani mo o tatou faafitauli, e le ala mai i le poto o lenei lalolagi, ae mai se Punavai e faavavau.
O ni nai tausaga ua mavae, i se savali a le Au Peresitene Sili, na saunoa mai ai Peresitene Thomas S. Monson: “O loo faamalumalu mai pea i o tatou luga faafitauli o le olaga. E siomia i faatosinaga o le olaga faaonaponei, tatou te vaavaai ae i le lagi mo lena taitaiga, ina ia tapasaina i tatou ma mulimuli i se ala poto ma le sa’o. O Lē ua tatou faalagilagi o lo tatou Tama Faalelagi, o le a na le tuua lava a tatou talosaga ma le loto e aunoa ma se tali.”1
Ua toe i ai sa tatou perofeta soifua i luga o le fogaeleele, o Peresitene Thomas S. Monson. Na te silafia o tatou luitau ma popolega. O loo ia te ia ni tali musuia. E leai se mea o le a tatou matatau ai. E mafai ona tatou maua le filemu i o tatou loto ma totonu o o tatou aiga. E mafai ona avea i tatou ma faatosinaga o le lelei i lenei lalolagi e ala i le mulimuli i poloaiga a le Atua ma faalagolago i le salamo moni, le mana o le Togiola, ma vavega o le faamagalo atu.
E saunoa mai perofeta ia i tatou i le suafa o le Alii ma le manino faalelagi. E pei ona faamaonia mai e le Tusi a Mamona, “Aua ua foai mai e le Alii le Atua le malamalama i le mafaufau; aua foi ua tautala mai o ia i tagata i o latou mafaufau e tusa ma la latou gagana” (2 Nifae 31:3).
O lo tatou tiute e le gata i le na o le faalogo ae ia usitai i Lana afioga ina ia tatou maua faamanuiaga o sauniga ma feagaiga o le talalelei toefuataiina. Na fetalai mai o Ia, “Ua noatia au le Alii, pe a outou faia mea ou te fai atu ai; a e pe a outou le faia mea ou te fai atu ai, e leai sa outou folafolaga” (MFF 82:10).
Atonu e i ai taimi tatou te lagona ai le lofituina, pe o le toetoe lava ina lotovaivai a o tatou taumafai malosi e avea o ni tagata atoatoa o le Ekalesia. Ou te tautino atu, o loo i ai le pulupasama i Kiliata. Ia tatou faalogo i perofeta o o tatou aso a o latou fesoasoani ia tatou taulai atu i mea e faavavau i le fuafuaga a Le Foafoa mo le taunuuga e faavavau a Lana fanau. O loo silafia i tatou e le Alii, e alofa o Ia ia i tatou, ma e finagalo o Ia ina ia tatou manuia, ma ua Ia uunaia i tatou i Lana fetalaiga: “Ia … faia nei mea uma i le poto ma le auauai lelei; aua e le tatau ona momo’e vave le [alii po o le tamaitai] ia silia le malosi ua ia te [i latou]… . [Ae] e tatau ona [latou] filifiliga” (Mosaea 4:27).
Mulimuli i a Latou Fautuaga
Pe o tatou filiga ea i le ola ai i poloaiga a le Atua, e aunoa ma le momo’e e silia ma lo tatou malosi? Pe na o lo tatou faifai malie atu lava? Pe o tatou faaaogaina tatau o tatou taimi, taleni, ma mea ua maua? Pe o tatou taulai atu i mea e sili ona taua? Pe o tatou mulimuli ea i fautuaga musuia a perofeta?
O se tasi faataitaiga e sili ona taua mo tagata o le faamalolosia o o tatou lava aiga. O le mataupu faavae o afiafi faaleaiga na tuuina mai ia i tatou i le 1915. Na toe faamanatu mai e Peresitene MaKei i matua i le 1964 e faapea “e leai se isi tulaga faamanuiaina e mafai ona toe totogi pe toe suia ai le toilalo i le aiga.”2 O le 1995 na valaau atu ai perofeta o o tatou taimi i le lalolagi atoa ina ia faamalosia le aiga o se iunite faavae o malo.3 Ma o le 1999 na taua ai ma le alofa e le Au Peresitene Sili ma le Korama a Aposetolo e Toasefululua e faapea: “Matou te fautua atu i matua ma fanau ina ia tuu atu le faamuamua aupito maualuga i tatalo faaleaiga, o afiafi faaleaiga, suesuega ma aoaoga o le talalelei, ma gaoioiga lelei faaleaiga. Peitai, tusa pe o le a le taua ma le talafeagai o isi gaoioiga, e le tatau ona faatagaina e suitulaga i tiute ua faatonuina mai e le Atua, ia e na o matua ma aiga e mafai ona faia lelei ai.”4
Ia tatou toe faafouina ma le faamaulalo ma le faatuatua a tatou tautinoga e mulimuli i perofeta, tagatavaai ma talifaaaliga ma le filiga uma. Ia tatou faalogo ma ia aoaoina ma faamalamalamaina e i latou o loo umia uma ki o le malo. Ma a tatou faalogo ma mulimuli ia i latou, tau ina ia suia o tatou loto ia i ai le manao tele e fai pea mea lelei (tagai Alema 19:33). Ma o le a avea ai i tatou ma paionia i le fausiaina o se faavae faaleagaga o le a faapea ona faatuina ai le Ekalesia i itu uma o le lalolagi, ina ia mafai ona avea le talalelei a Iesu Keriso ma faamanuiaga i fanau taitoatasi a le Atua ma faatasia ma faamalolosia ai o tatou aiga.