O Tupe Iti a se Muchacho [Tamaitiiti]

Sa ma filifili ma lau soa faifeautalai po o fea o le a ma talai tu’itu’i ai, ae ma vaaia loa se tamaitai o alu i totonu o se fale. Sa ma mautinoa lava na sau o ia i le fale e tapena se meaai o le aoauli aua ua amata ona tapuni fale o le nuu o Buenos Aires, Atenitina mo malologa o le aoauli. I se taimi mulimuli ane, na aoao atu e lau soa se mataupu faavae ia te ia, ae ou molimau atu i lona moni. Sa fiafia Narda i le ma savali ma valaaulia i maua ma te toe foi atu i le vaiaso na sosoo ai.

Ma te taunuu atu i le fale o Narda, o saofafai mai lana fanau e toalima i le laulau e faatalitali mai i maua. E le’i i ai ni galuega tumau a matua, ma na ootia o ma loto ina ua ma iloaina na itiiti ni mea na totoe mo lo latou tausiga. O lo latou fale faatauvaa sa leai se fola po o se vai, o puipui na fai i ni laupapa e le maumau ona tuitui. Na pau le mea na maua ai lo latou mafanafana o se tamai ogaumu mata tasi.

E ui lava i le matitiva o le tulaga na i ai le aiga, sa mauoa i latou i se naunau e aoao atili e uiga i le Atua. Sa fiafia ma suesue Narda i le Tusi Paia, ma sa manao foi i lana fanau ia maua foi lea lava faavae. O le alii o Cristian e sefululua tausaga e faapitoa lona fiafia e faalogologo i lesona a faifeautalai. Ina ua ma tuua se kopi o le Tusi a Mamona i le aiga, sa ia faitauina ma le naunautai ia nai tusi muamua. Sa fiafia foi i ai le toalua o Narda, ae e matamuli o ia ma sa faalogologo mai i le potumoe.

Ona o lo latou tulaga tautupe, sa ma tau mumusu ai e aoao i latou e uiga i le anapogi ma le sefuluai. Sa ma mananao ia i ai sa latou molimau mausali e uiga ia Iesu Keriso ma le Toefuataiga ona faatoa ma faailoa atu lea o mataupu faavae e saga manaomia ai le faatuatua. Ae talu ai ona ua amata ona faitau e tamaiti matutua le Tusi a Mamona ma auai i le lotu, na i ai a latou fesili na tatau ona ma taliina.

“Faifeau,” na fai mai ai Cristian, “i le lotu ma totonu foi o le Tusi a Mamona, e talanoa ai tagata uma e uiga i le anapogi. O le a le uiga o le anapogi?” Sa ma aoao atu ma molimau atu i le taua o le anapogi ona ma tatalo lemu lea ia talia e le aiga lenei poloaiga.

Na faasoa mulimuli mai e Cristian lana molimau ia i maua: “O le isi aso, na aumai ai e lou tina se tupe e faatau ai sau lole. A o ou alu atu i le faleoloa, sa ou manatuaina le lua lesona e uiga i le anapogi, ma na ou manao ai e faataitai. Ae na o le 20 sene lau tupe na i ai. Ae sa ou filifili lava ou te anapogi pea ma faaaoga lena 20 sene e fai ma au taulaga.”

Sa le fautuaina e Narda ia Cristian e tuuina atu se na tupe itiiti, ae na naunau lava o ia [e totogi]. Sa manao o ia e ola i poloaiga uma a le Atua ma foai atu le mea na te mafaia. O ni nai vaiaso mulimuli ane, na papatisoina ai i latou ma nai ona tei e toalua. Na auai ona matua i le Ekalesia i le tausaga na sosoo ai.

O lenei, soo se taimi lava ou te mafaufau ai e le mafai ona ou totogia se taulaga anapogi, ou te manatua ai lava Cristian ma lona faamaoni, ma iloa ai o loo lava ma totoe se tupe e foai atu. O lana taulaga ou te manatua ai tupe iti a le fafine ua oti lana tane (tagai Mareko 12:42–44). Atonu na laitiiti, ae na tuuina atu lava e Cristian ona sa alofa faamaoni o ia i le Atua ma na manao e usitai.