Tohi Ki he ʻĒtitá

ʻI Tīsema ʻo e taʻu 2005, naʻe ʻaʻahi mai kiate au mo hoku uaifí ʻi Kolomupia ha niʻihi ʻo hoku kāinga ʻoku nau kau ki he Siasí. Kimuʻa pea nau fokí, naʻe foaki mai ʻe heʻeku faʻētangatá ha ongo meʻaʻofa mahuʻinga—ko ha tatau ʻo e folofola ʻoku fakaʻaongaʻi ʻi he Siasí mo ha ngaahi tatau motuʻa ʻo e Liahoná.

Naʻá ku kamata lau ʻa e tatau ʻo Nōvema 2004, ʻa ia ne ʻi ai ʻa e ngaahi lea ʻo e konifelenisi ʻo ʻOkatopá. Naʻá ku lau ʻa e “Tuʻunga ʻoku ʻi ai e Siasí,” naʻe fai ʻe Palesiteni Kōtoni B. Hingikelī pea mo e “Kau Palōfita, Tangata Kikite, mo e Kau Tangata Maʻu Fakahā,” naʻe fai ʻe ʻEletā Sefilī R. Hōlaní. Naʻe tākiekina au ʻe he tangata maʻongoʻongá ni ke u kamata lau e Tohi ʻa Molomoná mo e Tohi Tapú.

Ko hono olá, ko e meʻa fakaʻofoʻofa taha ia kuo hoko kiate kimautolu. Naʻá ku fakahoko mo hoku uaifí ʻa e fili lelei taha kuó ma fakahokó—naʻá ma papitaiso ko e mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

ʻEtikā Henelī Munioso Palasa, Kolomupia

ʻOku ou fie fakahā ʻeku loto houngaʻia moʻoni ki he makasini Liahoná. Kuo fakamālohia ʻeku fakamoʻoní ʻi heʻeku lau mo fifili ʻi he pulusinga fakalaumālie takitaha. Kuo tuʻo lahi hono fakapapauʻi mai ʻe he Laumālie Māʻoniʻoní ʻa hono moʻoni ʻo e ngaahi fakamatalá pea fonu hoku lotó ʻi he houngaʻia.

Ko e ola ʻo e ngaahi meʻa fakalaumālie ne hokó, ko ʻeku maʻu ha holi ke vahevahe ʻa e ngaahi pōpoaki ʻo e ongoongoleleí mo ha niʻihi kehe ʻi he makasiní. Naʻá ku ʻave ha meʻaʻofa makasini ki ha taha ʻoku ou tuongaʻane ʻaki. Naʻá ne talamai ʻoku saiʻia he makasiní pea ʻokú ne lau maʻu pē ia.

Naʻá ku ‘ave ha tatau ‘o e Liahoná ki haku kaumeʻa mo ha faiako ‘i ha fonua kehe. Naʻá ne pehē ʻokú ne saiʻia he makasiní pea ʻokú ne loto ke maʻu maʻu ai pē ia. Ko e founga ʻeni ʻoku ou teuteu ai ha fakavaʻe maʻá e fefiné ni, ke ʻi ai ha ʻaho te ne fanongo pea tali ʻe ongoongolelei kuo toe fakafoki maí.

Penelope B. Utiuooti, Tekisisi, USA

ʻI heʻeku maʻu ko ia e tatau ʻo e Liahona ʻo e konifelenisí, ʻoku ou vakai ki he ngaahi tā ʻi he peesi takitaha. ʻOku ou saiʻia he sio ki he ngaahi fofonga ʻo e kakaí, mo e ngaahi ʻata kehekehe pē ʻo e konifelenisí. ʻOku nau tokoni ke u ongoʻi ʻa e laumālie ʻoku ʻi he ngaahi feituʻu kotoa ʻo e māmaní ʻi he taimi konifelenisí. Hono ʻikai fakaʻofoʻofa ʻa e fānau kotoa ʻa e Tamai Hēvaní! ʻOku hanga maʻu pē ʻe he makasiní ʻo ngaohi au ke u fiefia. Fakamālō atu ʻi hoʻomou ngāue taʻe siokitá—fakamālō atu ki he Liahoná.

Sungu ʻIesi, Kōlea

Naʻá ku loto ke mou ʻiloʻi ʻemau saiʻia ʻi he Liahoná. Naʻe saiʻia hoku foha ko ʻIlaiasí ( naʻe taʻu ua he taimi ko iá) ʻi he talanoa ʻo “Mōkani Faitotonu” ʻi he pulusinga ʻo Māʻasi 2007. Naʻá ku faʻa lau ʻa e talanoá kiate ia. Naʻe lava ke ne fai lelei e talanoá. ʻE hounga kiate au kapau ʻe hokohoko atu hoʻomou ʻomai e fanga kiʻi talanoa nounou peheé.

ʻOku ou lau ʻa e Liahoná ʻo ʻosi pea ʻoku ou fiefia he ngaahi ongoongó, fakamatalá mo e ngaahi fakakaukaú. Fakamālō atu ʻi he faingamālie ke maʻu ha meʻatokoni fakalaumālié.

Sōnia Kōseni, Siamane