Ko e Moʻoni Naʻe ʻAʻahi ʻa Sīsū ki ʻAmelika?

ʻI he 1960, naʻá ku feʻiloaki ai mo ha talavou ʻi ha fakafiefia peá ne fakahā mai kiate au naʻe ʻaʻahi ʻa Sīsū Kalaisi ki ʻAmelika hili ʻEne Toetuʻú. Ne u ngali ofo ʻi he fakakaukaú ni pea naʻá ku fie ʻilo lahi ange ki he meʻá ni, ko ia naʻá ku kamata fekumi ʻi he ngaahi laipelí pea fakatotolo ʻi he ngaahi siasi kehekehe he kolo ne u tupu hake aí, ʻa ia ko Seni Maikolo, ʻi ʻEla Salavatoa.

Naʻá ku fekumi ʻi ha taʻu ʻe tolu ka naʻe ʻikai te u ʻilo ha meʻa. ʻI he taimi naʻá ku fakahā ai ki ha kau taki lotu naʻá ku fanongo tokua naʻe ʻaʻahi ʻa Kalaisi ki ʻAmeliká, naʻa nau fakahā mai kuo kākaaʻi au. Koeʻuhí naʻe ʻikai maʻu ha fakamatala ʻi he fakatotolo naʻá ku fakahokó, ko ia naʻe faifai pē peá u tui naʻa nau moʻoni.

Naʻe ʻi ai ha ʻaho ne omi ai ha ongo faifekau mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ki hoku ʻapí peá na pehē ʻoku ʻi ai haʻana pōpōaki mahuʻinga maʻa hoku fāmilí. Naʻe vave ʻeku manatuʻi ʻa e fakatotolo naʻá ku fakahokó peá u fehuʻi ange kiate kinaua, “ʻOkú mo ʻilo pe naʻe hāʻele mai ʻa Sīsū Kalaisi ki ʻAmelika?”

Naʻe pehē mai ʻe ha tokotaha ʻo e ongo talavoú ni, “ʻOkú ma fakamoʻoni ki he meʻa ko iá.”

Naʻá ku ongoʻi ha fiefia lahi ʻi he mōmeniti pē ko iá ʻi hoku ʻatamaí mo hoku lotó peá u fehuʻi ange, “ʻOku anga fēfē hoʻomo ʻiloʻi iá?”

Naʻá ne toʻo hake ha tohi mei heʻene kató peá ne pehē mai, “ʻOkú ma ʻilo ne hāʻele mai ʻa Kalaisi ki he fonuá ni mei he tohi ko ʻení, ʻa e Tohi ʻa Molomoná.”

Naʻá ku ongoʻi hohaʻa koeʻuhí ko e meʻa ne akoʻi mai ‘e he ongo faifekaú ʻi he fuofua lēsoní, pea naʻá ku veiveiua ʻi he talanoa ko ia ʻa e Palōfita ko Siosefa Sāmitá ki he hā mai ʻa e Tamaí mo e ʻAló. Ka neongo ia, naʻá ku mālieʻia ʻi he Tohi ʻa Molomoná pea naʻe kei hoko atu ʻa hono akoʻi au ʻe he ongo faifekaú.

Naʻe fehuʻi mai ʻe he ongo faifekaú kiate au ʻi ha hoʻatā ʻe taha “Kuó ke lotu nai ke ke ʻilo pe ʻoku moʻoni ʻa e meʻa ʻokú ma akoʻi atu kiate koé?”

Naʻá ku fakahā ange kuó u ʻosi fakahoko ka naʻe teʻeki ke ʻi ai ha tali.

Naʻá na pehē mai, “ʻOku totonu ke ke lotu ʻi he tui lahi.”

Ne u lau e Tohi ʻa Molomoná ʻi ha ngaahi pō lahi peá u ako mo tui ki he hāʻele mai ʻa Sīsū Kalaisi ki he kakai Nīfaí, ka naʻe ʻikai ke u tali ʻa e mata meʻa-hā-mai ʻa Siosefa Sāmitá. Naʻe faingataʻa ʻeku fāinga mo hoku lotó.

Naʻá ku tūʻulutui tokotaha ʻi ha pō ʻe taha ʻo ʻohake ʻa hoku lotó ki he ʻOtuá. Naʻá ku fakahā kiate Ia ʻa ʻeku holi ke ʻilo pe naʻá Ne hā kia Siosefa Sāmita. Kapau ko e moʻoni naʻá ku palomesi kiate Ia te u papitaiso ki he Siasí pea ngāue maʻana ʻi he toenga ʻeku moʻuí.

ʻI heʻeku tuʻu hengihengi hake ʻi he pongipongi hono hokó, naʻe hoko mai ʻa e talí kiate au ʻo fakafou ʻi he Laumālie Māʻoniʻoní. Naʻe mahino ki hoku ʻatamaí, pea naʻe fonu ʻa hoku lotó ʻi he nonga. Talu mei he mōmeniti ko iá mo e ʻikai haʻaku toe veiveiua ko Siosefa Sāmitá ko ha palōfita moʻoni ʻa e ʻOtuá, ko e Tohi ʻa Molomoná ko ha fakamoʻoni ia ʻe taha kia Sīsū Kalaisi pea ko Sīsū Kalaisí ko hotau Fakamoʻui mo e Huhuʻí.

ʻOku ou ʻiloʻi naʻe hāʻele mai ʻa Kalaisi ki ʻAmelika hili ʻEne Toetuʻú. ʻOku fiefia ʻa hoku laumālié ʻi he ʻilo fakaofó ni, ʻa ia kuo akoʻi taʻe toe veiveiua mai ʻe he mālohi ʻo e Laumālie Māʻoniʻoní.