Ko Hono Faʻu ʻo e Ngaahi Makasini ʻa e Siasí

ʻOku kamata maʻu ai pē e palaní mei he Liahoná, ʻa ia ʻoku pulusi ʻi ha lea fakafonua kehekehe ʻe 51. ʻOku pulusi fakamāhina ʻi ha lea fakafonua ʻe 21. ʻI he ngaahi lea fakafonua ko ia ʻoku tokosiʻi ai e kau maʻu makasiní, ʻe malava ke nau maʻu haʻanau Liahona tuʻo fā pe ono he taʻu. Ko e ngaahi lea ko ia ʻoku tokosiʻi taha ai e kau maʻu makasiní, ʻoku nau maʻu tuʻo taha, tuʻo ua pe tuʻo tolu ia he taʻu.

ʻOku kau ʻi he Liahoná ha ngaahi fakamatala maʻá e kakai lalahí, toʻu tupú mo e fānaú, pehē ki ha ngaahi fakamatala fakalotofonua ʻo kau ai ha ngaahi ongoongo ki he kāingalotu ʻo ha feituʻu ʻo e Siasí.

Kuo kole ʻa e kau taki ʻo e Siasí, ke feingaʻi ke meimei tatau pē ʻa e ngaahi fakamatala ʻoku ʻoatu ʻi he Liahoná, mo ia ʻoku ʻasi ʻi he ngaahi makasini lea faka-Pilitānia ʻa e Siasí: ʻa e Ensign, New Era, mo e Friend. ʻI hono palani ko ia ʻo e ngaahi pulusinga fakamāhina ʻo e Liahoná, ʻoku feinga ʻa e kau ʻētitá ʻi he faʻa lotu, ke filifili ʻa e ngaahi fakamatala ko ia ʻoku fie maʻu ʻe he kāingalotú he funga ʻo e māmaní. ʻOku toe vakaiʻi e ngaahi fakamatala ko ia kuo filí, ʻe he kau Taki Māʻolunga ʻoku nau hoko ko e kau fai faleʻi ki he Potungāue Nāunau Fakalēsoní.

ʻI ha faʻahinga ʻaho pē ʻi he taʻú, ʻoku teuteu ai ʻe he kau ngāue ʻa e makasiní ha ngaahi pulusinga kehekehe ki he ngaahi māhina ka hoko maí. Te nau ʻi ha ngaahi tuʻunga kehekehe, kamata pē mei hono palaní ki hono lau ʻo toe fakatonutonú, pea mo hono paaki ʻo e ngaahi pulusinga ʻo e māhina ka hokó. (ʻOku paaki ʻi he senitā ko ia ʻa e Siasí ʻi Sōleki Siti, ʻi ʻIutaá, ʻa e ngaahi makasini ʻi he lea faka-Pilitāniá pea mo e konga lahi ʻo e Liahoná). Ko hono tohi mo fakatonutonu ko ia ʻo e ngaahi fakamatalá, ʻoku ʻosi ia ʻi he māhina ʻe valu kimuʻa ʻi he ʻaho ko ia ʻoku paaki ai ʻa e pulusinga takitaha ʻo e makasiní. Ka ʻo kapau ʻe ʻi ai ha faʻahinga meʻa ʻe hoko ʻi he māhina ʻe tolu pe fā ka hokó, ʻa ia ʻoku totonu ke ʻasi ʻi he ngaahi makasini ʻa e Siasí, ʻe lava pē ke toʻo leva ʻe he kau ʻētitá ha fakamatala ne ʻosi fokotuʻu pea fetongi ia ʻaki ha fakamatala foʻou.

ʻOku toutou vakaiʻi kotoa ʻa e ngaahi fakamatala ʻi he makasini ʻo e Siasí ʻi he ngaahi tuʻunga kehekehe. Hili ko ia hono tohi ʻo e ngaahi fakamatalá, ʻoku toe lau ia ʻe ha niʻihi kuo vahe ki ai ke nau vakaiʻi ia, kau ai ha niʻihi ʻo e Kau Fitungofulú. Hili ʻa hono fakatonutonu ko ʻení, ʻoku ʻave leva e tatau kuo ʻosi fakangofuá ki he kau ngāue ʻoku nau fai hono fokotuʻutuʻu fakapēsí. Te nau fili pe te nau ngāueʻaki e ngaahi laʻi tā mo e fakatātā ʻoku nau lolotonga maʻú, pe ko ʻenau kole ke ʻomi ha laʻi tā mo ha fakatātā foʻou. Koeʻuhí kuo pau ke fakaʻatā ha ngaahi peesi lahi ki hono liliu ʻo e Liahoná, ʻoku toe fakaava ai ha peesi ki he fakamatala takitaha. ʻI he lava ko ia hono fokotuʻutuʻú, ʻoku toe vakaiʻi e ngaahi pēsí ʻe he niʻihi ʻo e kau mēmipa ʻo e Kau Fitungofulú, kau atu ki ai mo ha mēmipa ʻe taha pe tokolahi ange ʻo e Kolomu ʻo e Kau ʻAposetolo ʻe Toko Hongofulu Mā Uá.

ʻOku kau ʻi he founga ko ia ki hono fokotuʻutuʻu e makasiní, hano tuku ha meimei māhina ʻe taha ki hono liliu e ngaahi fakamatalá ʻi he Liahoná. Ko e kau liliu leá, ko ha kāingalotu pē ʻoku nau nofo ʻi he ngaahi feituʻu kehekehe ʻo māmani. ʻOku nau feʻaveʻaki fakaʻilekitulōnika ʻa e ngaahi fakamatala ʻo e Liahoná ki he hetikuota ʻo e Siasí.

Ko e fokotuʻutuʻu fakaʻosi ko ia e ngaahi peesi ʻo e makasiní, ʻoku ʻoatu ia ki he kau ʻētitá ke nau lau mo fakatonutonu. ʻOku toki ʻave fakaʻilekitulōnika leva ʻa e ngaahi peesi ko iá ki he senitā ʻoku paaki aí, ʻi ha māhina ʻe nima kimuʻa pea toki tukuatu ʻa e pulusinga ʻo e Liahoná ʻi he lea faka-Pilitāniá pea māhina ʻe ua ki he ngaahi lea fakafonua kehe ʻo e Liahoná, pea māhina ʻe ua ki he Ensign, New Era, pea mo e Friend. Ko e ngaahi konga ko ia ʻoku ʻi ai e ngaahi ongoongó ʻoku ʻave ia ke paaki ʻi ha meimei māhina ʻe ua kimuʻa ʻi he ʻaho ʻoku tukuatu ʻai e Liahoná pea meimei māhina ʻe taha kimuʻa ʻi he ʻaho ʻoku tukuatu ai ʻa e Ensign.

ʻOku fakatahatahaʻi leva e ngaahi makasini kuo lava hono pākí pea tufaki ia ʻi ha ngaahi founga kehekehe ki he ngaahi feituʻu ko ia ʻi tuʻa ʻi ʻAmeliká, kau ai ʻa e ngaahi founga tufa meili fakalotofonuá. Ko hono tufaki ko ia ʻi ʻAmelika ní, ʻoku ngāueʻaki ʻa e founga tufaki meili ʻa e puleʻangá. ʻOku tomuʻa tufa ʻa e ngaahi makasiní ki he ngaahi feituʻu mamaʻo tahá pea toki fakamuimui kiate kinautolu ʻi ʻIutaá ni. Ko e palaní, ke aʻu e ngaahi makasiní ʻi he ʻuluaki Sāpate ʻo e māhiná ʻa ia kuo ʻosi fakaʻaho ki aí, ka ʻoku malava pē ke liliu.

Kuó ke maʻu ʻeni ʻi ho nimá e makasiní ni pea ʻoku mau ʻamanaki te ke ʻilo ʻoku tokoni ia ki hoʻo tupulaki fakalaumālié. ʻE lave ʻa e ngaahi fakamatalá ki he moʻui leleí, meʻa fakapaʻangá pe ko ha ngaahi kaveinga kehe ʻoku tau feʻao mo ia ʻi he moʻui fakamatelie ní, ka ko hono tefitoʻi taumuʻá ke tokoni ʻo fakamālohia fakalaumālie koe.

Kapau ʻoku ʻi ai ha meʻa ʻokú ke fie lave mai ki ai ʻo fekauʻaki mo e ngaahi fakamatala ʻokú ke lau ʻi hení, te mau fiefia ke fanongo kiate koe (vakai ki homau tuʻasila he toʻomataʻú). Kapau ʻokú ke loto ke fokotuʻu mai ha ngaahi founga ke mau lava ʻo fai ke toe lelei ange ʻemau feau hoʻomou ngaahi fie maʻu fakalaumālié, te mau fiefia ke ʻilo ki ai foki. Te mau lava ʻo ako e meʻa kotoa pē ke tokoni kiate kimautolu ke toe lelei ange ʻemau fai fatongia ki he kau lau makasiní pea ʻe lelei ia kiate koe mo kimautolu foki.