NGAAHI FAKAKAUKAU KI HE EFIAFI FAKAFĀMILI ʻI ʻAPÍ
ʻE lava ke fakaʻaongaʻi e ngaahi fakakaukau ko ʻení ki he faiako ʻi lokiakó pea mo e ʻapí foki.
“Ko e Fakapulipuli ki ha ʻApi Fiefia,” p.26: Vahevahe ange ʻa e talanoa ki he fāmili Lonitelí, pea mou kumi e fakapulipuli ki honau ʻapi fiefiá. Fakakaukau ke fai ha maʻumeʻatokoni makehe ki muʻa ʻi he efiafi fakafāmili ʻi ʻapí. ʻI hoʻomou teuteuʻi fakataha ʻa e meʻatokoní, mou aleaʻi ʻa e founga ʻe lava ke ngaohi ai ʻe he fakapulipuli takitaha ke ola lelei hoʻomou maʻu meʻatokoní, ʻo hangē ko e fie maʻu ko ia e mēmipa takitaha ʻo e fāmilí ke faʻu ʻaki ha ʻapi fiefiá. Lau e fakamatalá. Fakaʻaongaʻi e sīpinga ʻa e fāmili Lonitelí pea fehuʻi ki he kau mēmipa homou fāmilí pe ko e hā ʻa e meʻa ʻoku nau fie fai ʻi he efiafi fakafāmili ʻi ʻapí. Vahe ange ha fanga kiʻi ngāue ke fai ki he efiafi fakafāmili ka hokó. ʻE lava pē ke mou fai e kiʻi vaʻinga taki ʻe he kuí, ʻo kapau ʻoku mou loto ki ai.
“Tataki Nima ʻa e ʻOtuá,” p. 30: Kamata ʻaki hono fakamatalaʻi e meʻa ne aʻusia ʻe ʻEletā Paula ʻi he lotú. Lau leʻolahi ʻa ʻene ngaahi talaʻofa ʻi lalo he konga ko e “Tataki ʻo ha Moʻuí.” Lau e ʻAlamā 34:18–26, pea mou aleaʻi ʻa e meʻa ne akoʻi ʻe ʻAmuleki ki he kau Sōlamí ʻo fekauʻaki mo e lotú. Kole ki he kau mēmipa ʻo e fāmilí ke nau vahevahe atu ha ngaahi meʻa ne nau aʻusia ʻi ha taimi kuo tokoniʻi ai kinautolu ʻe he lotú.
“Ko e Taimí pē ʻEni,” p. 34: Vahevahe ange ʻa e founga kehekehe ʻe tolu naʻe lau ʻaki ʻe Sasa ʻa e Tohi ʻa Molomoná. Ko e hā e founga naʻe kehe ai ʻene lau fika tolú mei heʻene ongo fuofua laú? Lau ʻa e Molonai 10:4–5, pea mou aleaʻi e talaʻofa ʻa Molonaí.
“ʻOkú ke Fie ʻAlu mo Au ki he Palaimelí?” p. K12: Aleaʻi mo hoʻo fānaú ʻa e meʻa ʻoku nau saiʻia taha ai he Palaimelí. Fakanounouʻi mo ho fāmilí ʻa e talanoa ʻi he fakamatalá. ʻOku ʻi ai nai ha taha ʻoku nau fie fakaafeʻi mai ki he Palaimelí? Fokotuʻu ha taumuʻa ke fakaafeʻi mai ha taha ki he Palaimelí pe ko ha ʻekitivitī ʻa e Palaimelí.
“ʻAukai Fakafāmilí,” p. K15: Lau e talanoá pea mou fakakaukau ke kamataʻi ha “sioki angalelei” mo homou fāmilí. Mou aleaʻi ʻa e founga naʻe hanga ʻe he ʻaukai mo e feilaulau ʻa Lēnati mo Meleʻaná ʻo faitāpuekina kinaua mo ha niʻihi kehe. ʻE lava foki ke mou fai ha ʻaukai fakafāmili maʻá ha taha ʻokú ne fie maʻu ha tāpuaki makehe pea mou fai leva ha meʻa ʻaonga ke tokoni ki he tokotaha ko iá.