ʻOkú ke Fie ʻAlu mo Au ki he Palaimelí?

Mahalo ʻe tui ʻa e tokotaha kotoa ʻi he kalasi tolú, kau ai mo au, ko Kilisitī ʻa e tuʻukimuʻa he heké mo e kakakaká. ʻOku ʻikai ha taha ʻe kaka vave ange pe heke maʻolunga ʻo hangē ko Kilisitií. Pea pehē pē ki he ngaahi vaʻinga kehé. Ka ko e meʻa mahuʻinga kiate au ʻo kau kia Kilisitií, ko ʻene hoko ko hoku kaumeʻa leleí. ʻI he ʻaho ʻe taha ʻi he mālōlō siʻi ʻa e akó, naʻe fehuʻi mai ʻe Kilisitī, “Okú ke fie ʻalu ki he Palaimelí mo au?”

Naʻe teʻeki ai ke u fanongo au he Palaimelí kimuʻa. Naʻá ku fehuʻi ange, “Ko e hā ia?”

Naʻe fakamatala ʻe Kilisitī ʻo pehē, “Ko e Palaimelí ko ha kalasi makehe ia ʻi hoku siasí maʻá e fānaú. Kapau te ke ʻalu ki ai te ke hiva ha ngaahi hiva, feʻiloaki ai mo ha ngaahi kaumeʻa foʻou, ako ki ha ngaahi meʻa foʻou pea te ke lava ʻo feʻiloaki mo ʻeku faiako Palaimelí, ʻa ia ko ha tokotaha lelei moʻoni ʻeni.”

“ʻOku angalelei ʻo hangē ko Mīsisi Palamá?” Naʻá ku fehuʻi ange pē mo ʻeku fakapapau ʻoku ʻikai ha faiako ʻe angalelei hangē ko ʻemau faiako kalasi tolú.

Naʻe kata ʻa Kilisitī mo ne pehē mai. “ʻIo, ʻoku angalelei ia ʻo hangē ko Mīsisi Palamá.”

ʻI he tuku ʻa e akó, naʻá ku lele ki ʻapi ʻo kole ki heʻeku faʻeé pe te u lava ʻo ʻalu ki he Palaimelí. Ka naʻe ʻikai fiefia ʻa ʻeku faʻeé ki he foʻi fakakaukaú ʻo hangē ko aú. Naʻá ne tali mai, “ʻOku ou fie maʻu ke u ʻilo ʻo lahi ange ki ai. Ko e hā ʻa e hingoa ʻo e Siasi ʻo Kilisitií?”

Ko hono moʻoní, ko ha fehuʻi faingataʻa moʻoni ʻeni ke ma kamata ai he naʻá ku talaange ki heʻeku faʻeé, “Oku ʻikai te u manatuʻi e hingoá. Ko e hingoa lōlōa ia pea ne teʻeki ke u fanongo ai au kimuʻa.” Naʻá ku lava ʻo tala mei heʻene hohaʻá ʻoku ʻikai ko ha meʻa totonu ia naʻá ku leaʻakí.

“Tatali angé. Te u telefoni kia Kilistī he taimi ni pē!” Naʻá ku lele ki he telefoní ʻo taaʻi ki he fika ʻo Kilisitií kimuʻa pea toe lava ha lea mai ʻeku fineʻeikí.

Naʻe tatangi tuʻo ua e telefoní kimuʻa pea toki tali mai ʻe Kilisitī. “Mālō e lelei?”

Naʻá ku lea leʻolahi atu “Kilisitī!” Ko e hā koā e hingoa homou siasí?” Naʻá ku fanongo fakalelei peá u pehēange. “Fineʻeiki, ko e hingoa ʻo e siasi ʻo Kilisitií ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.” ʻI heʻeku fakatokangaʻi ʻoku ʻikai puli ʻa e hohaʻá mei he mata ʻeku fineʻeikí, naʻá ku ʻilo ʻoku ʻikai te ne fiemālie. Naʻá ku pehē ange ʻi he telefoní, “Kilisitī, ʻe lava nai hoʻo fineʻeikí ke lea mai ki heʻeku fineʻeikí ʻo kau ki he Palaimelí?”

ʻOku ou tui naʻe fanongo mai pē ʻa Kilisitī ki heʻeku fie maʻu tokoní, naʻá ne ui fakavave ki heʻene fineʻeikí ke haʻu ki he telefoní ʻi ha lau sekoni pē. Ne pō talanoa mo kakata ʻema ongo fineʻeikí ʻi he telefoní ʻo hangē ko ha ongo kaungāmeʻa fuoloá. Pea talaange ʻe heʻeku fineʻeikí ki he fineʻeiki ʻa Kilisitií, ʻe lava ke u ʻalu ki he Palaimelí!

ʻI heʻeku fuofua ʻalu ki he Palaimelí, ne mahulu ange ia ʻi he meʻa ne fakamatala mai ʻe Kilisitī ʻo kau ki he Palaimelí. Naʻe moʻoni pē ʻa Kilisitī—ko ʻemau faiako Palaimelí naʻe fuʻu matuʻaki angalelei ʻaupito. ʻO hangē tofu pē, ko Mīsisi Palamá. Naʻá ne ʻomai haʻaku kiʻi tohi fekauʻaki mo e tui ki he ʻOtuá.

Naʻá ku foki ki ʻapi he ʻaho ko iá peá u fakaʻaliʻali ki heʻeku fineʻeikí ʻa ʻeku kiʻi tohí peá u fakamatala kiate ia ʻo kau ki he Palaimelí. Naʻá ku hivaʻi ange foki ʻa e “Ko e Hiva Mālō e Leleí” (Tohi Hiva ʻa e Fānaú, 130) kiate ia mo hoku ongo tuongaʻané, ʻa ia ne hivaʻi ʻe he fānaú katoa kiate au. ʻI he vakaiʻi ko ia ʻe heʻeku fineʻeikí ʻa e fakatātā ʻo Sīsū Kalaisí ʻi he takafi muʻá peá ne lau mo ha ʻū peesi ʻi lotó, naʻá ne fakalongolongo pē pea hā mei hono matá ʻokú ne fakakaukau. Naʻá ne talamai te u lava pē ke ʻalu mo Kilisitī ki he Palaimelí ʻi he uike kotoa ʻo kapau ʻoku ou loto ki ai.

Naʻá ku fie ʻalu moʻoni ka naʻá ku ʻalu pē ʻi ha ngaahi uike siʻi mei ai, he naʻe tutuku e akó pea ʻalu hoku fāmili ʻo mālōlō ʻeveʻeva ʻi he faʻahitaʻu māfaná. Naʻe fakaheka ʻemau meʻalelé pea mau ʻalu mei Kalefōnia ki he faama ʻeku kui fefiné ʻi ʻIlinoisi.

ʻI he ʻaho hono ua ʻo ʻemau ʻevá ʻi heʻemau aʻu atu ki ʻIutaá, naʻa mau sio ki ha papa tuʻuaki he veʻe halá naʻe tohi ai e hingoa ʻo e siasi ʻo Kilisitií. Naʻa nau fakaafeʻi e kakaí ke nau mamata ʻi ha feituʻu ko e senitā takimamata ʻi Sōleki Sití. Naʻe talamai ʻe he fineʻeikí ʻoku fie afe ai ke ne ʻilo lahi ange ki he Siasí.

ʻI heʻemau hū atu ʻi he matapā ʻo e senitā takimamatá, naʻe talitali fiefia kimautolu ʻe ha tangata anga fakakaumeʻa naʻá ne tui ha foʻi pine naʻe tuʻu ai hono hingoá. ʻI heʻene takimamataʻi holo kimautolú, naʻe lahi ha ngaahi fehuʻi ʻeku fineʻeikí pea naʻe hā mai ʻoku fiefia ʻa e tangatá ni ke ne tali ʻa e fehuʻi taki taha. ʻI he ʻosi ʻemau mamatá, naʻe tohi ʻe heʻeku fineʻeikí hono hingoá mo e tuʻasilá ʻi he tohi tuʻasila e kau ʻaʻahí peá ne fakaʻilongaʻi e kiʻi puha ʻoku tuʻu ai e foʻi lea “ʻIO” hoko atu ai, ʻa ia ʻoku ʻuhingá ʻokú ne fie ʻilo lahi ange ki he Siasí.

ʻI heʻemau foki ki ʻapi hili ʻemau mālōlō ʻeveʻevá, naʻe ʻaʻahi ange ki homau ʻapí ha ongo talavou naʻe ui ko ha ongo ʻeletā. Naʻá na fakahā mai ko e ongo faifekau kinaua pea naʻá na maʻu ha fakamatala mei he senitā takimamata ʻi Sōleki Sití ko ia ne fie maʻu ʻe heʻeku fineʻeikí ha fakamatala lahi ange fekauʻaki mo e Siasí. Naʻá na talamai ʻokú na loto vekeveke ke akoʻi homau fāmilí ʻo fekauʻaki mo e palani ʻa e Tamai Hēvaní pea mo e ongoongolelei ʻo Sīsū Kalaisí. Ko e kamata ia hono akoʻi homau fāmilí ʻe he kau faifekaú.

Ko e fuofua taimi naʻa mau ō fakataha ai ki he lotú, naʻá ku fakahā ange ki hoku fāmilí ke fakapapauʻi ʻoku nau kūnima ʻi he taimi te mau hū ai ki falelotú. Kuó u ako ʻi he Palaimelí ko e founga ia ʻoku fakahā ai ʻa e ʻapasiá. Naʻa mau feinga ʻi he ʻaho ko iá ke mau kūnima, ka naʻe tokolahi e kakai naʻa nau ʻalu ange ke lulululu mo kimautolú mo fakahā ʻenau fiefia heʻemau ʻalu ange ki he lotú pea naʻe ʻikai fuoloa ʻemau kū-nimá.

ʻI he ʻosi hono fakahoko e ngaahi lēsoní mo e kau faifekaú, naʻa nau fehuʻi ki he fineʻeikí pe ʻokú ne fie papitaiso ʻo hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ne taliange ʻokú ne fie lotu ʻo kau ki he meʻá ni. ʻI he pongipongi hokó, ʻi he 6:00 pongipongí, naʻe telefoni ʻeku fineʻeikí ki he ongo faifekaú ʻo talaange naʻá ne lotu ʻi he poó kakato ʻo fekauʻaki mo ʻene papitaisó pea ko e talí ko e ʻio! Naʻá ku talaange mo hoku ongo tuongaʻané ʻoku mau loto ke mau papitaiso foki.

ʻOku ou kei manatuʻi ʻa ʻeku ʻalu hifo ki he vaí ʻi he faiʻanga papitaisó. Naʻá ku tui ha kofu hinehina pea naʻá ku fiefia loto pē, pea naʻá ku fakaʻamu ke u kata pea kalanga he taimi tatau pē. Naʻá ku sio hake peá u vakai naʻe tangi ʻeku fineʻeikí ko e loʻimata ʻo e fiefia. Pea naʻá ku sio hake kia Kilisitī, naʻá ne fuʻu fiefia lahi ʻo hangē pē ko aú koeʻuhí he naʻe kamata kotoa ʻeni mei heʻene fehuʻi mai, “Te ke fie ʻalu mo au ki he Palaimelí?”