Ou Te Filifili e Faatumulia Lo’u Olaga i Mea E Valaaulia ai le Agaga

E mafai ona tatou faitau i le Tusi Paia i le tala mataina ia Sataraka, Mesako, ma Apeteniko. Na lafo e le Tupu o Nepukanesa nei uo e toatolu i totonu o se ogaumu aasa aua sa latou teenaina le tapuai i se povi auro lea sana fausia. Sa tau atu e alii Isaraelu ia e toatolu i le tupu e na o le Atua latou te tapuai i ai. Ona o le faamaoni o ia alii talavou, sa laveaiina ai i latou e le Atua mai le ogaumu ma faasaoina o latou ola. (Tagai i le Tanielu 3.) O lenei tala e faatatau i le faalagolago atu i le Atua ma ia faamaoni ma lotototoa. E faatatau foi i ni faigauo lelei o e sa fesoasoani le tasi i le isi e filifili le mea sao.

Sa filifili faatasi Sataraka, Mesako, ma Apeteniko e tausia le latou folafolaga e na o le Atua e tapuai i ai. Sa latou filifili ia faatuatua o le a laveaiina i latou e le Atua. Sa latou filifili ia le fefefe i le tupu ae ia faalagolago i le Atua. Sa saunoa mai Peresitene Henry B. Eyring, Fesoasoani Muamua i le Au Peresitene Sili, faapea, “Tatou te taufai manaomia uma lava ni uo moni e alolofa ia i tatou, e faalogo mai ia i tatou, e faasino mai ia i tatou le ala, ma molimau mai ia i tatou i le upumoni” (“O Uo Moni,” Liahona, Iulai 2002, 32).

Ia manatua, e faia e uo lelei se eseesega i lou olaga e ala i le fesoasoani ia te oe ia filifili le mea sao. Saili ni uo e pei o Sataraka, Mesako, ma Apeteniko, ma ia avea o se uo faapei o i latou!