Aoao Lou Tiute

O le tele o i tatou e le afaina le faia o mea e ao ona tatou faia pe a le faalavelave i mea tatou te mananao e fai, ae e manaomia ai le lotopulea ma le faatagatamatua e fai ai mea e ao ona tatou faia e tusa lava pe tatou te mananao i ai pe leai. O le tiute e tele lava ina faamoemoeina e le tasi mai i isi ae le o mea e fai e se tagata. E taua uma mea e mafaufau ma talitonu ma fuafua e le tagata, ae o mea latou te fai o le mea lea e sili ona taulia. O se valaau ia tiai ese ai le manatu faapito ma mafaufau i le lelei lautele o tagata uma.

E ao ona tatou manatua pea o le tiute e faamanatu mai ai ia i tatou, o tatou o tausimea o mea uma ua tuu mai e lo tatou Foafoa ia i tatou. Pe a tatou taliaina ni tiute ma le loto i ai ma le faamaoni, tatou te maua le fiafia. O i latou e avea le fiafia ma faamoemoega autu o le olaga e au ina toilalo, ona o le fiafia o se feoi ae le o se iuga e tupu lava ia. E maua le fiafia i le faia e le tagata o lona tiute ma le iloaina o loo ogatusa lona olaga ma le Atua ma Ana poloaiga. …

O alii ma tamaitai faamanuiaina uma i le talafaasolopito o le lalolagi sa iloaina lona tiute ma sa i ai se manao mautu e faataunuuina. Sa i ai i le Faaola se lagona atoatoa o le tiute. E ui lava o le mea sa moomia mai ia te Ia na sili atu nai lo le malosi faatapulaaina o le tagata, ae sa gauai atu pea o Ia i le finagalo o Lona Tama ma faataunuuina Lona tiute paia e ala i le togiolaina mo agasala a tagata.

Sa faamaoni Iosefa Samita i lona valaauga ma faataunuuina lona tiute e oo lava i fetaiaiga ma sauaga matuia atoa ai ma osigataulaga sili faaletagata. Sa ia faapalepale, sa ia onosai, ma sa ia faataunuuina le Toefuataiga o le talalelei moni a Iesu Keriso. …

Sa taliaina e Peresitene Spencer W. Kimball [1895–1985] le poloaiga e avatu le talalelei i tuluiga o le lalolagi. Sa ia faataunuuina ma le faamaoni lona tiute ma o se faataitaiga matagofie ia i tatou i mea uma sa ia faia e faasalalau atu ai le talalelei o le alofa. O le taunuuga, o se Ekalesia i le lalolagi atoa ma le faataunuuga o valoaga o aso e gata ai.

O nei tamalii maoae … sa ono filifili e mulimuli i se ala e faigofie atu nai lo le ala lea e taitai ai e se tiute. Ae latou te le i faia lena mea. O le mea mautinoa e le i taitaia pea i latou e o latou tiute i se faamafanafanaga patino po o ni tulaga faigofie faasamasamanoa. O le uiga masani o lo latou tiute, o le ositaulaga sili ma faigata faaletagata lava ia; ae ui o lea, na latou filifilia tiute, ma sa latou faatinoina tiute.

Ua moomia e le olaga mai ia i tatou ona faatino le tele o tiute—o nisi o tiute masani, o isi tiute e sili atu ona anoa ma taua. O se vaega taua o le tiute o le faia lea o le faataitaiga talafeagai ma faaaoga avanoa uma e faamalolosia ai isi o i luga o le alatele maugā o le olaga. E mafai ona faia lenei mea i se upu faamalosiau, se faamalo, se faatalofa—soo se faailoaga lava o le alofa. Ma e manaomia ona tatou manatuaina a o tatou aoao lelei i o tatou tiute iinei, o loo tatou saunia foi mo le faatinoga o tiute e faavavau. …

O le mea e manaomia atoa i le faia o o tatou tiute i le aiga, i le Ekalesia, ma a tatou galuega i aso taitasi, faapea foi mo lo tatou atunuu pele … o loo faamatala mai ma le manino ma le matagofie e le Faiaoga Sili, o Iesu le Keriso. Sa Ia tautino mai:

“E leai foi se laau lelei e fua mai i fua leaga; e leai foi se laau leaga e fua mai i fua lelei.

“Aua o laau taitasi ma lona lava fua e iloa ai. Aua e le tau mai e tagata fua o le mati i laau tuitui, latou te le tau mai foi se fuifui vine i le laau talatala.

“Ua au mai mea lelei e le tagata amio lelei i mea lelei ua teu i lona loto; o le tagata amio leaga foi ua au mai e ia mea leaga i mea leaga ua teu i lona loto: aua o le tele o mea i le loto e tautala mai ai lona gutu.

“Se a ea le mea e ta’ua ai a’u e outou, Le Alii e, le Alii e, a e tou te le faia mea ou te fai atu ai?

“O se sau ia te au ma faalogo i a’u upu, ma faia e ia, ou te faailoa atu ia te outou le ua tusa i ai o ia:

“Ua tusa o ia ma le tagata ua fai lona fale, ua ia eli maulalo, ua tuu le faavae i luga o le papa: Ona sau ai lea o le tafe, ua fafati mai le vaitafe i lea fale, ua le magaoioi ai lava: aua ua faavaeina i luga o le papa.

A o le faalogo, a e le faia, e tusa ia ma le tagata ua fai lona fale i luga o le eleele, e leai sona faavae; ua fafati mai i ai le vaitafe, ona pa’ū loa lea; ona matua nutipalaina lea o lea fale” (Luka 6:43–49).

“Aua le faavaivai i le faia o mea lelei” (MF&F 64:33), ou uso e ma tuafafine. O lē faamaoni i lona tiute o se faailoga lea o soo moni o le Alii ma le fanau a le Atua. Ia e lototele i lou tiute. Tumau i laasaga. Aua le toilalo i lau galuega sili ona taua, o le tausiaina o lou tofi lona lua. Ia faamaoni i lou tiute, aua o le a avatu ai oe i le Atua.

Ou te tuu atu ia te outou la’u molimau loloto ma le faamaoni ua na o le pau lenei o le ala e maua ai le fiafia ma fesoasoani ai ia tuputupu ae ma uluola le malo.