“Ua avea ponokalafi ma vaisu ia te au. Ua faaleagaina ai lo’u olaga. O le a se mea e mafai ona ou faia e taofia ai lea vaisu?”

Tatalo mo le malosi.Sa tatalo Enosa i le aso atoa, aioi atu i le Alii mo le faamagaloga o ana agasala, ma e ala atu i lona faatuatua, sa ia lagonaina ai le toafilemu tele ma aveesea ai le tausalaina. Faitau i tusitusiga paia e maua ai le Agaga Paia, talu ai ona o le a e maua Lana mafutaga, o le a e le toe mafaufau pe faia ni mea le mama. Faitau i leSalamo 24:3–5 (e uiga i le tausiaina o oe lava ia mama). Faaaoga taimi uma: taalo i ni taaloga, tafao ma ia faia ni mea malie mama, ma ia aua nei faatosinaina oe e ni tagata ua e manatu o ni uo. Pe a oo mai ni faaosoosoga, ia fai ni filifiliga ma tetee atu i ai. Ia manatua e silafia e le Tama Faalelagi mea uma e te mafaufau i ai ma faia.

Sa faaleagaina lo’u olaga e ponokalafi, ae na iu lava ina ou taofia lea vaisu ina ua mavae le tele o mafatiaga. O le a umi ma faigata le faagasologa o le salamo, ae ia tatalo ma le faamaoni i aso uma mo le fesoasoani a le Alii i le taimi o nei faigata. Aua nei e mafaufau e te le o agavaa e salamo, aua o le Togiola e mo tagata uma. Ia manatua foi o taimi uma lava e tofotofo ai oe, o loo taumafai Satani e faatoilalo oe i le agasala. Ae o le a avea pea lava ma au filifiliga le taliaina o le tofotofoga po o le aloese mai ai. Aua e te fiu ia te oe lava ia po o le Alii, aua Na te le tuuina atu ia te oe se tofotofoga e le mafai ona e tatalia (tagai i le 1 Nifae 3:7).

Alu e talanoa i lou epikopo i se taimi vave pe a mafai. E faigata ona faataunuuina lena laasaga muamua, ae e tatau lava ona e talanoa ia te ia e salamo ai. Na te le ulagia oe pe inoino ia te oe. E alofa o ia ia te oe ma e na o mea lelei lava e finagalo ai o Ia mo oe. Sa puapuagatia Iesu Keriso mo au agasala ina ia e toe lagonaina le saoloto mai le lofituina o le tausalaina ma le faanoanoa sa e lagonaina mo se taimi umi lava (tagai i le Alema 5:9). E le o tuai tele lava le suia. E mafai ona e toe lagonaina le fiafia moni. Aioi atu i le Atua e avatu ia te oe le lototoa e salamo ai.

O ponokalafi e lē mai le Atua. E umi ma tiga le faagasologa o le salamo, ae e mafai! E tatau ona ia te oe le naunau e suia, ina ia iloa ai le tuga o le agasala, ma o le mea sili i mea uma lava o le sailia lea o le fesoasoaniga mai le Tama Faalelagi. Ina ia aloese mai le pau atu i faaosoosoga, e i ai se ata o Iesu Keriso i talaane o la’u komepiuta. E i ai pea lava o Ia iina e silasila mai ia te au! Soo se taimi lava e oo mai ai i lo’u mafaufau ni ata mataga po o ni musika, ou te usuina se viiga ma e le umi lava ae galo nei mea leaga.

O le mana o le tatalo e le mafaamatalaina; e aumaia ia i tatou le malosi e tetee atu ai i le fili ma manumalo mai ai (tagai i le MF&F 10:5). Afai e te sailia le Tama Faalelagi i le tatalo, o le a Ia tuuina atu ia te oe le malosi e faasaolotoina mai ai oe lava mai faaosoosoga. A e faitau i tusitusiga paia i aso uma, o le a faamalosia atili oe lava. Afai e te faalagolago i le Alii ae le o lou lava malosi, o le a Ia faasaolotoina mai oe mai filifili lea o loo noatia ai oe. O le Togiola o le a mafai ai ona faamaloloina oe.

Sa ia te au lenei faafitauli. O loo taufaafefe mai pea ia te au. O le mea muamua lava, tuu lou matamata i ata mataga po o ponokalafi. Alu i le Tama Faalelagi. Sa ou lagonaina Lona faamagaloina o au i le taimi sa ou le mafaufau ai e mafai ona faamagaloina au. Ona ou mafaufau lea ua lelei. Ou te lei manao e iloa e se tagata; sa ou matuai maasiasi lava. Ae peitai o se mea e tatau ona e tauina i lou epikopo. Sa ou taumafai ou te le ta’uina. Ae o taimi uma lava sa ou faalogoina ai nei upu, “Afai e i ai sou faafitauli i ponokalafi, alu i lou epikopo.” I se tasi aso, i le faatalanoaga mo so’u pepa faataga o le malumalu, sa ou tauina atu ai ia te ia. Ma sa matua lelei ou lagona i le taimi mulimuli ane. Sa ou saoloto. Sa aveesea mai se avega. Sa ou tauina i ou matua, i se taimi mulimuli ane. Sa faanoanoa i la’ua, ae sa la taliaina. Aua e te fefe e faailoa atu.

Sa maileia a’u e ponokalafi mo se taimi umi lava. Pe ana leai le lagolagosua a ou matua faapea ma le fesoasoani a lo’u epikopo semanu e le mafai ona ou saoloto. O le faaitiitia o avanoa e faaaoga ai le Initoneti po o le le tagofia o le faamanatuga i ni nai vaiaso o se tamai tau lea e totogi mo le fiafia o le mama. E mafai foi ona fesoasoani ia te oe ia faufautua e i ai tomai faapitoa ma e latou te le faamasinoina oe. O i latou foi o ni meafaigaluega ua tuuina mai e le Alii ia i tatou.