Sa Ou Filifilia le Vaega Lelei

A o ou sauni mo le faaipoipoga a la’u tama teine, sa faatumulia lo’u mafaufau i fuafuaga o le faaipopoga lea sa seasea ai o’u mafaufau i se mea e ese mai le lisi o mea e fai. O se tasi taeao sa ou tilotilo ai i la’u lisi umi o galuega. O loo solo lelei lava, ae o loo ou manaomia ona faia ni galuega faamama lelei. Sa ou tuuesea le faamamaina o ie faamalama o le umukuka, o lea sa ou filifili ai e fai lena galuega.

A o ou a’e atu i luga o le kapoti ma a’u ieie, pulumu, ma mea faamama, na mafai ona ou vaaia o le a avea ma se galuega palapala. A o ou galue, sa tuufesili lo’u mafaufau i le tala ia Mareta ma Maria, le auso sa talileleia le Faaola i lo la fale. A o “tiga Mareta i le fatuaiga,” o Maria o loo “nofo o ia i lalo i tafatafa o vae o Iesu, ma faalogo i lana fetalaiga.” Sa fai atu Mareta ia Iesu e fetalai atu i lona uso e fesoasoani atu i feau, ae sa tau atu e le Faaola ia te ia e faapea “ua filifilia foi e Maria lea mea lelei” (tagai i le Luka 10:38–42).

“O le aso o le a avea ai au ma Mareta,” sa ou manatu ai. O le mea moni sa avea au ma Mareta mo le tele o vaiaso, “sa tiga” i le tele o feau masani ma tapenaga o le faaipoipoga.

Sa toe tuufesili foi lo’u mafaufau, ma taumafai e manatua le taimi mulimuli sa faamama lelei ai a’u ie faamalama. Sa ou mafaufau i teineiti e toalua ia sa o mai e fesoasoani ia te au e saunia mo se faatasiga i lo’u fale i le lua tausaga talu ai. Sa la fufulu faatasi la’u umukuka mai le fola e oo atu i le faalo, e aofia ai ie faamalama. O lena manatua sa faamanatu mai ai ia te au lo la tina, o se uo ua leva ou te le i toe talanoa i ai i le tele o tausaga.

I lena lava taimi sa ou piki ai i luga le telefoni ma vili lana numera e ta’u atu i ai le faaipoipoga a la’u tama teine. Ou te le i faamoemoeina e tali mai o ia ona e faiaoga i se aoga, ae sa ou vili i ai i le taimi o ona itula e sauniuni ai. Sa ma faaaluina le isi itula na sosoo ai e toē ai, fetagisi, ma fefaasoaai ai. E le i leva talu ona feagai o ia ma se taimi faigata o le tatalaina o le faaipoipoga ma sa lagonaina ai le tuuatoatasi ma le tuulafoaiina. A o ma talanoa, sa siitia o ma agaga ma faamafanafanaina o ma loto.

Sa ou maofa i le ala na mafai ai ona galue le Alii e ala atu ia te au e tusa lava pe sa ou faia se mea masani e pei o le faamamaina o ie faamalama. Sa ou maofa atili i le upumoni ua Ia silafia ma lava lona alofa ia i tatou taitoatasi e auina mai ai fesoasoaniga i le itula ma taimi lava tatou te manaomia ai.

Sa ou ataata i lena po a o o’u makaina la’u lisi i talaane o le “faamama ia ie faamalama o le umukuka.” E ui sa ou lagonaina se lagona o le faamalieina mai le faamaeaina o feau, ae sa ou lagonaina se lagona sili atu o le loto faafetai i le iloaina sa avea au ma se meafaigaluega i aao o le Alii. Sa Ia faaali mai ia te au le auala e mafai ona ou avea ai ma se Maria o le na filifilia le “mea lelei” e tusa lava pe na avea au ma se Mareta sa “tiga” i a’u feau.