Aoao e Auauna Atu i Isi

Sa faaigoa Thomas Spencer Monson i le igoa o lona tama matua o Thomas Condie. Sa tele ni lesona sa aoaoina e Tommy le laitiiti mai lona tama matua, lea e na o ni nai fale lava le mamao e nofo ai. O le lesona sili lava sa ia manatuaina e faatatau lea i le auauna atu i isi.

I se tasi aso ina ua faatoa valu tausaga o Tommy, sa la nofonofo ai ma le tamā o lona tina i luga o le suigi i le poletito i luma. Sa nofo ai foi se tama matua mai Egelani i lena lava auala. O lona igoa o Robert Dicks, ae o le toatele o tuaoi latou te valaauina ia “Papu Matua”. O ia o se tama ua maliu lona toalua ma e mativa foi.

Sa sau Papu Matua ma saofai faatasi ma Tommy ma lona tama matua i luga o le suigi i luma o le poletito. Sa ia fai mai o le a tala i lalo le tamai fale lea e nofo ai. Sa leai sona aiga, leai se tupe, ma e leai se mea e alu i ai.

Sa mafaufau Tommy po o le a se tali a lona tamamatua i lea tala faanoanoa. Sa aapa ifo lona tamamatua i totonu o lana taga ma toso mai i fafo se tamai ato pa’u o manu e tuu i ai ana sui. Sa ia aumaia se ki ma tuu atu i le lima o Papu Matua. “Mr. Dicks,” sa ia fai atu ai ma le alofa, “e mafai ona e aumaia au mea ma tuu i totonu o lo’u fale lea e i talaatu e leai se isi o i ai. E leai sau sene e alu ai, ma e mafai ona nofo ai iina po o le a lava le umi e te manao ai. Ma ia manatua, e leai lava se tagata o le a tuliesea oe.” Sa faatumulia mata o Papu Matua i loimata.

Sa aoao foi e le tina o Tommy o ia i le auala e alofa ma auauna atu ai i isi. O Aso Sa uma ao lei faia le toonai a le aiga o Monson, e saunia ai e le tina o Tommy se ipu meaai o fasi povi na tao, pateta, ma se kaleve mo Papu Matua. O nisi taimi e aofia ai ma le keke tautaua faalipine a le tina o Tommy e i ai ma isi fogafale lanu piniki, lanu meamata, ma se keke paepae e sukalati le kulimi e teu ai. O le galuega a Tommy o le tilivaina lea o le meaai a Papu Matua.

O le taimi muamua lava, sa lei malamalama ai Tommy pe aisea e le ‘ai ai muamua ona ave ai lea o le ipu meaai. Ae e lei muimui lava o ia. E tamoe faatopetope o ia i le fale o Papu Matua, a o tau faapaleni le u’uina o le ipu meaai tumu. Ona ia faatalitali lea ma le naunautai a o savali lemu ane Papu Matua e tatala le faitotoa.

Ona fesuiai lea e le toalua o ipu—o le ipu mama a Papu mai le Aso Sa ua mavae ae tuu atu e Tommy le ipu ua tumu i meaai. Ona ofo atu lea e Papu o se sefulu sene e avea o se totogi mo le agalelei.

O le tali masani lava a Tommy. “E le mafai ona ou taliaina se tupe. E sasa a’u e lou tina.”

Ona popo lea e le toeaina o le ulu lanu enaena o Tommy ma fai mai, “Atalii, e ese le lelei o lou tina. Fai i ai faafetai lava.” Ina ua ta’u atu e Tommy i lona tina le tala faavi’ivi’i a Papu Matua, sa iila ona mata i loimata.

O le faaalia o le alofa mama, foai atu ma le le manatu faapito i isi, faamuamua isi, ma avea o se uo lelei ma se tuaoi lelei o ni mea taua ia i le aiga o le au Monson. Ua avea ia ma se savali iloga i le soifuaga o Peresitene Monson.