E Te Le’i Anapogi

I le 1998 sa ou maua ai le fiafia i le avea ai ma se tina talavou. Peitai sa ou popole i se tasi aso ina ua ou iloaina le ī o le manava o la’u pepe tama e ono masina, pe a manava ma ua le mafai ona ia foloina se mea. Sa vave ona iloaina e le fomai e maua o ia i le bronchiolitis, o se fula i ona ala ea pito i laitiiti i totonu o ona mama ma e masani lava ona tupu ona o se siama. Sa ia faatonuina le inuina o vai ma togafitiga faaletino.

O asiasiga i tagata e faia togafiti o lona mai sa avea o se luitau mo maua ma si au tama. Sa faaminoia’i solo ma le faigata si tama i soo se itu, ma sa ou popole ina nei avea le togafiti ma mafuaaga o lona tiga. Ae peitai, sa ou maua le lototele, ina ua faamatala mai e le tagata e faia le fofo ia faamanuiaga o le fofo.

E ui i togafitiga faafomai ma le fofo, ae e lei manuia ai si au tama. Sa laitiiti sina mea e ‘ai, ma na faaauau pea le ī o lana manava. Sa faatonuina e le fomai nisi fofo se 5 ma le tagata e faia le fofo e faaopoopo i le 10 lea ua uma ona ma auai.

Ao ou faatalitali i le taimi o le fofo lona 13, sa ou faitauina se tusiga o loo faapipii i le ofisa o le fomai e faaautuina faapea “Bronchiolitis Kills.” Ao ou faitauina, sa ou iloa ai e mafai ona oti la’u tama. Sa ou lagona le pei ua tuia lou fatu. I le faaiuga o le fofo, sa ta’u mai ai e le fomai e le o tulaga lelei la’u tama. Ou te le o mautinoa pe na faapefea ona ou taunuu ma le saogalemu i le fale aua sa puaoa la’u vaai i loimata.

Sa ou valaau atu i lou toalua ona amata lea ona ou tatalo. Sa ou tau atu i lou Tama Faalelagi afai o Lona finagalo o le aveeseina atu o lau tama, e manaomia Lona tuuina mai ia te au o le malosi e tatalia ai.

Ina ua uma la’u tatalo sa ou fesili ifo ia te au lava ia po o le a se mea e mafai ona matou faia e faaopoopo atu i tatalo na matou faia ma faamanuiaga faaleperisitua na maua e le ma tama. Sa ou tepa atu i le fatatusi ma iloa atu ai se kopi o le Liahona (L’Étoile i lena taimi). Sa ou soona susueina, e saili mo se fesoasoani, ma maua ai se tusiga e faaautuina faapea “Sa Ou Anapogi mo La’u Pepe.” Ona ou faalogoina lea ma le manino o se leo o faapea mai, “E te lei anapogi mo lau tama.”

Ou te lei [anapogi mo ia], ma o lea sa vave ona ou anapogi mo ia. E oo atu i le taimi o le fofo i le aso na sosoo ai, o la e lava ou te anapogi. Ina ua uma ona faia suesuega o la’u tama, sa foliga mai ua ofo le fofo.

“Tamaitai,” na ia fai mai ai ia te au, “ua manuia lau tama. Ou te le o malamalama, ae e le o toe manaomia e ia nisi fofo.”

Sa le mafai ona taofia ou loimata o le fiafia. O le toe foi ai i le fale, sa ou tootuli e faafetai i le Atua mo Lona alofa tunoa ma le alofa. Sa ou valaau atu i lou toalua e tau atu ia te ia le tala fiafia. Ona faaiuina lea o la’u anapogi i le filemu, ma le le masalosalo i le tali mai o le Alii.

Sa faamaloloina lau tama, faafetai ai i le faatuatua, tatalo, faamanuiaga o le perisitua, ma le anapogi. Ou te le masalosalo i le alofa o lou Tama Faalelagi ia te au ma e alofa foi o Ia i la’u tama. Ou te mautinoa o le a faaauau pea ona Ia fesoasoani mai ia i tatou ina ia foia o tatou faafitauli.