Ina ua tusa ma le 13 o o’u tausaga, sa ou nofo ai i lo’u tinamatua. I se tasi aso sa ou mauaina ai nisi o mekasini sa le toe faaaogaina ma amata loa ona ou faitauina. Sa i ai ni tala mai tagata i le lalolagi atoa, sa faamatala ai e uiga i vavega na tutupu i o latou olaga. O nei mekasini o le Liahona; o le tamaitai o lo’u aiga, o lē sa avea ma se tagata o le Ekalesia, sa ia tuua ia mekasini i le fale o lo’u tinamatua.

Sa ou maofa i tala, ma sa ou lagonaina se mea faapitoa na ta’u mai ai ia te a’u e moni nei tala. O le tausaga mulimuli ane, sa ou papatiso ai, ma mai lava i lena taimi na ou maua ai la’u lava mekasini. Ua avea le mekasini ma se taiala ma se faamanuiaga. Ia te a’u o le faamaoniga lea o le alofa o le Atua ia i tatou ma e faaauau pea ona faaali mai Ana mealilo i Ana auauna o perofeta (tagai i le Amosa 3:7).

Ou te fiafia lava e faitau i le mekasini o le Liahona—e fesoasoani ia te au i le faaletino ma le faaleagaga. E faamalosia ai lo’u faatuatua, faaleleia atili ai a’u taleni ma agavaa, ma faamamāina ai lo’u mafaufau e ala i fautuaga faagaeetia a tagata o le Ekalesia ma o tatou perofeta soifua.