Savali a Faiaoga Asiasi
Faatinoga e Fai i le Taimi o Mafatiaga
Suesue ma le agaga tatalo i mea nei, ma pe a talafeagai ai, ia talanoaina faatasi ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga.
Faatuatua, Aiga, Toomaga
I le avea ai ma faiaoga asiasi, o se tasi o a tatou faamoemoega o le fesoasoani lea ia faamalolosia aiga ma auaiga. O tuafafine tatou te asia e tatau ona mafai ona fai mai, “Afai e i ai so’u faafitauli, ou te iloa o le a fesoasoani mai ou faiaoga asiasi e aunoa ma le faatalitali ina ia fesiligia.” Ina ia mafai ona auauna atu, ua ia te i tatou se tiutetauave e magafagafa ai i manaoga o tuafafine tatou te asia. Pe a tatou saili atu i musumusuga, o le a tatou iloa le auala tatou te tali atu ai i manaoga faaleagaga ma faaletino o tuafafine taitasi ua tofi i ai i tatou e asi. Ona faaaoga lea o o tatou taimi, tomai, taleni, tatalo o le faatuatua, ma le lagolago faaleagaga ma faalelagona, e mafai ai ona tatou fesoasoani e tuu atu se auaunaga agaalofa i taimi o ma’i, maliu, ma isi tulaga faapitoa.1
O lipoti mai faiaoga asiasi, e fesoasoani e iloa ai e le au peresitene o le Aualofa i latou o loo i ai ia manaoga faapitoa ona o gasegase faaletino ma faalelagona, faalavelave faafuasei, le fananau mai o pepe, o maliu, le atoatoa o le malosi o le tino ma le mafaufau, tuuatoatasi, po o isi luitau. Ona lipoti atu lea e le peresitene o le Aualofa mea ia na maua i le epikopo. I lalo o le taitaiga a le epikopo, e faamaopoopo ai e le peresitene o le Aualofa ia fesoasoaniga.2
I le avea ai ma faiaoga asiasi e mafai ona “tele lava se pogai … e olioli ai” ona o “le faamanuiaga lenei ua faaee mai i o tatou luga, lea ua avea ai i tatou o ni meafaigaluega i aao o le Atua e faataunuu ai lenei galuega tele” (Alema 26:1, 3).
Mai Tusitusiga Paia
Mataio 22:37–40; Luka 10:29–37; Alema 26:1–4; Mataupu Faavae ma Feagaiga 82:18–19
Mai lo Tatou Talafaasolopito
I uluai tausaga o le Ekalesia, sa toalaiti lava tagata ma sa potopoto i le mea e tasi. Sa mafai ona vave tali atu tagata o le ekalesia pe a mafatia se tasi. O le taimi nei ua silia ma le 14 miliona le faitau aofai o tagata o le ekalesia ma ua salalau i le lalolagi atoa. O faiaoga asiasi o se vaega o le fuafuaga a le Alii e tuu atu ai le fesoasoaniga mo Ana fanau uma.
“E na o le pau le vaega lea e mafai ona tuu atu fesoasoaniga ma le faamafanafanaga i se ekalesia atoa ua telē naua i se lalolagi ua fesuisuiai tele, o auauna taitoatasi e latalata atu i tagata o mafatia,” sa saunoa ai Peresitene Henry B. Eyring, Fesoasoani Muamua i le Au Peresitene Sili.
“… Ua tofu epikopo ma peresitene o paranesi uma ma se peresitene o le Aualofa e faalagolago i ai,” sa ia faaauau ai. “E i ai i lena peresitene ana faiaoga asiasi, o ē iloa faigata ma manaoga o uso taitoatasi. E mafai e le peresitene, e ala atu ia i latou, ona iloa loto o tagata taitoatasi ma aiga. E mafai ona ia taulimaina manaoga ma fesoasoani i le epikopo i lona valaauga e tausia tagata taitoatasi ma aiga.”3
Ata na tusia e Bradley Slade